પાકિસ્તાનની કપટી નીતિ : આંદોલનો અને બળવો કચડવા આતંકી સંગઠનોનો ઉપયોગ

ટીટીપી, બલૂચ બળવાખોરો અને પીઓકેના આંદોલનથી પાકિસ્તાન ચારેબાજુથી ઘેરાયું

સુરક્ષા પડકારો વચ્ચે આતંકી સંગઠનોનો ફરી ઉપયોગ કરી રહ્યું હોવાના અહેવાલો

બલૂચિસ્તાનમાં વધતી બળવાખોરી, ખૈબર પખ્તૂનખ્વામાં તેહરીક-એ-તાલિબાન પાકિસ્તાન (ટીટીપી)ના સતત હુમલા અને પાકિસ્તાન અધિકૃત કાશ્મીર (પીઓકે)માં ઉગ્ર વિરોધ પ્રદર્શનોથી પાકિસ્તાન ગંભીર સુરક્ષા સંકટમાં ફસાયું છે.  અહેવાલો અનુસાર આ વધતા દબાણનો સામનો કરવા માટે પાકિસ્તાન ફરી એકવાર આતંકી સંગઠનોનો ઉપયોગ કરવાની જૂની નીતિ અપનાવી રહ્યું છે. કેટલાક અહેવાલોમાં એવો પણ દાવો કરવામાં આવ્યો છે કે તાલિબાન અને બલૂચ બળવાખોરોને નાથવા માટે ઇસ્લામિક સ્ટેટ ખોરાસાન (આઇએસકેએપી) જેવા સંગઠનોને પરોક્ષ ટેકો આપવામાં આવી રહ્યો છે.

નોંધનીય છે કે ગત એક વર્ષમાં ટીટીપી દ્વારા હજારો હુમલા કરવામાં આવ્યા છે, જેમાં પાકિસ્તાની સુરક્ષા દળોના અનેક જવાનો માર્યા ગયા છે. બીજી તરફ બલૂચિસ્તાનમાં બળવાખોરોએ ચીન-પાકિસ્તાન આર્થિક કોરિડોર (સીપીઈસી) સહિતના મહત્વના પ્રોજેક્ટોને નિશાન બનાવતાં સરકાર પર દબાણ વધ્યું છે.

આ દરમિયાન પીઓકેમાં વિધાનસભા ચૂંટણી પહેલાં ફાટી નીકળેલા વિરોધ પ્રદર્શનોએ પણ સ્થિતિ વધુ ગંભીર બનાવી છે. સંયુક્ત રાષ્ટ્રના માનવાધિકાર ઉચ્ચાયુક્ત વોલ્કર તુર્કે અશાંતિ દરમિયાન થયેલા પ્રદર્શનકારીઓ અને સુરક્ષા કર્મચારીઓના મોતની નિષ્પક્ષ તપાસની માંગ કરી છે અને તમામ પક્ષોને સંયમ રાખવા અપીલ કરી છે.

આ પણ વાંચો: અમેરિકાનો પ્રચંડ પ્રહાર, ઈરાનના વળતા હુમલા; મધ્યપૂર્વમાં યુદ્ધ બન્યું વધુ વિકરાળ”

નિષ્ણાતોના કહેવા મુજબ પાકિસ્તાન સામે અત્યંત ગભીર પડકારો ઊભા થાય છે.પાકિસ્તાનના સરહદી વિસ્તારોમાં ઊભા થયેલા આ સંકટો એ દર્શાવે છે કે સરકાર રાજકીય ઉકેલને બદલે માત્ર કડક સુરક્ષા અભિગમ અપનાવી રહી છે. બલૂચિસ્તાનમાં અલગતાવાદી ચળવળ અને પીઓકેમાં સ્વાયત્તતાની માંગ પાકિસ્તાન માટે વધતો પડકાર બની રહી છે. આ સ્થિતિ એ વાતનો સંકેત છે કે પાકિસ્તાન પોતાની સરહદી વિસ્તારોમાં લોકોની સંમતિ કરતાં બળના આધારે શાસન ચલાવવાની ક્ષમતા ગુમાવી રહ્યું છે.

અવિરત હુમલાઓથી ચીન અકળાયું

બલૂચિસ્તાનમાં ચીનના રોકાણો અને સીપીઈસી સાથે જોડાયેલા પ્રોજેક્ટો પર વારંવાર થતા હુમલાઓથી બેઇજિંગમાં ચિંતા વધી છે. અહેવાલો મુજબ ચીને પોતાના કર્મચારીઓ અને પ્રોજેક્ટોની સુરક્ષા અંગે પાકિસ્તાનના સર્વોચ્ચ સ્તરે ગંભીર ચિંતા વ્યક્ત કરી છે. ચીનના વધતા દબાણ વચ્ચે પાકિસ્તાની સેનાના વડા ફિલ્ડ માર્શલ આસિમ મુનીર પર સુરક્ષા સ્થિતિ સુધારવાનું ભારે દબાણ સર્જાયો હોવાનું માનવામાં આવે છે.

અનેક મોરચે પડકાર, સામનો કેવી રીતે કરવો તે જ સમજાતું નથી

એક તરફ ખૈબર પખ્તૂનખ્વામાં ટીટીપીના સતત હુમલાઓ અને બીજી તરફ બલૂચિસ્તાનમાં વધતી બળવાખોરીએ પાકિસ્તાનની સુરક્ષા વ્યવસ્થાને કસોટી પર મૂકી છે. આ સાથે પીઓકેમાં પ્રજાના વિરોધ પ્રદર્શનોએ રાજકીય સંકટ ઊભું કર્યું છે. તાલિબાન સાથેની વાતચીત સફળ રહી નથી, બલૂચ બળવાખોરો પર કાબૂ મળતો નથી અને પીઓકેમાં અસંતોષ વધતો જાય છે. પરિણામે પાકિસ્તાન સામે એકસાથે આંતરિક સુરક્ષા, રાજકીય અસંતોષ અને આંતરરાષ્ટ્રીય દબાણ જેવા અનેક પડકારો ઊભા થયા છે, જેના અસરકારક ઉકેલ અંગે ઇસ્લામાબાદ મૂંઝવણમાં હોવાનું ચિત્ર સામે આવી રહ્યું છે.