ઈરાનની ધમકીઓ વચ્ચે ફૂડ કેટરિંગ ટ્રકમાં છુપાઈને ‘ગુપ્ત વિમાન’માં નીકળવું પડ્યું ડોનાલ્ડ ટ્રમ્પને!

વૈશ્વિક રાજકારણ અને સુરક્ષા એજન્સીઓ વચ્ચેના અત્યંત ખતરનાક અને રોમાંચક ઓપરેશનો ભાગ્યે જ બહાર આવતા હોય છે, પરંતુ જ્યારે આવે છે ત્યારે દુનિયા ચોંકી જાય છે. અમેરિકી રાષ્ટ્રપતિ ડોનાલ્ડ ટ્રમ્પની સુરક્ષાને લઈને એક એવો જ અત્યંત ચોંકાવનારો ઘટસ્ફોટ સામે આવ્યો છે. ઈરાન તરફથી મળેલી જાનથી મારી નાખવાની ગંભીર ધમકીઓના પગલે અમેરિકી સિક્રેટ સર્વિસે એક એવું ગુપ્ત ઓપરેશન પાર પાડ્યું હતું, જેના વિશે જાણીને કોઈપણ હોલિવૂડની સ્પાય મૂવી જેવો અહેસાસ થાય. દુશ્મનોની નજરથી બચવા માટે ખુદ અમેરિકાના રાષ્ટ્રપતિએ ફૂડ કેટરિંગ ટ્રકમાં છુપાઈને મુસાફરી કરવી પડી હતી.

ઈરાની જોખમ વચ્ચે વ્હાઈટ હાઉસનો હાઈ-સિક્યોરિટી માસ્ટરપ્લાન

પ્રતિષ્ઠિત અખબાર ‘ધ વોશિંગ્ટન પોસ્ટ’ અને ‘ધ ન્યૂયોર્ક ટાઈમ્સ’ના અહેવાલો મુજબ, આ ઘટના 8 જુલાઈના રોજ બની હતી, જ્યારે ડોનાલ્ડ ટ્રમ્પ નાટો સમિટમાં ભાગ લેવા માટે તુર્કીયેના અંકારા પહોંચ્યા હતા. તુર્કીયેની સરહદ ઈરાનને અડીને આવેલી હોવાથી અને ત્યાં ઈરાની પ્રોક્સી દળો (આતંકવાદી સંગઠનો અને સહયોગીઓ) તરફથી મોટો સુરક્ષા ખતરો તોળાઈ રહ્યો હતો.

ટ્રમ્પની સુરક્ષાને સર્વોચ્ચ પ્રાથમિકતા આપીને વ્હાઈટ હાઉસના સિક્યોરિટી અધિકારીઓએ એક અત્યંત ગુપ્ત ‘ડિસેપ્શન ઓપરેશન’ (ગેરમાર્ગે દોરવાની યુક્તિ) ઘડી કાઢ્યું હતું, જેથી દુશ્મનોની ગુપ્તચર એજન્સીઓ છેતરાઈ જાય.

આ પણ વાંચો: પ્રાકૃતિક ખેતીને વેગ આપવા ગુજરાતમાં ચાર ‘સૅન્ટર ઑફ ઍક્સેલન્સ’ બનશે

કેવી રીતે રચાયો સુરક્ષાનો આ અદભુત વ્યૂહ? (ઓપરેશનની ચાર મુખ્ય કડીઓ)

૧. કેમેરા સામે મુખ્ય પ્લેનમાં એન્ટ્રી: અંકારા એરપોર્ટ પર જાહેરમાં મીડિયા અને કેમેરાની સામે ટ્રમ્પ પોતાના જૂના ‘એર ફોર્સ વન’ પ્લેનમાં સવાર થયા હતા, જેથી સૌ કોઈને એવું જ લાગે કે તેઓ આ જ વિમાનમાં પ્રવાસ કરી રહ્યા છે.

૨. કેટરિંગ ટ્રકમાં ગુપ્ત શિફ્ટિંગ: પ્લેનમાં ચડ્યાની મિનિટોની અંદર જ, સિક્યોરિટી ટીમે ગુપ્ત રીતે ટ્રમ્પને એરપોર્ટ પર ખોરાક અને સામાન લોડ કરવા માટે વપરાતા એક સામાન્ય ‘કેટરિંગ ટ્રક’માં બેસાડી દીધા.

૩. સિક્રેટ મિલિટ્રી પ્લેન તરફ પ્રયાણ: તે કેટરિંગ ટ્રક ટ્રમ્પને થોડે દૂર અગાઉથી જ તૈયાર રાખવામાં આવેલા નાના અને ગુપ્ત ‘C-32A’ મિલિટ્રી વિમાન સુધી સુરક્ષિત રીતે લઈ ગયો.

૪. પત્રકારો અને સ્ટાફ અંધારામાં: મુખ્ય પ્લેનમાં બેઠેલા પત્રકારો અને વ્હાઈટ હાઉસના અન્ય સ્ટાફને આ બાબતની કોઈ જ ભનક નહોતી. તેમને આખી ફ્લાઈટ દરમિયાન બારીઓના પડદા કડકપણે બંધ રાખવાની સૂચના આપવામાં આવી હતી, જેથી કોઈ બહારની ગતિવિધિ જોઈ ન શકે.

બ્રિટન લેન્ડિંગ અને ટ્રમ્પનો કટાક્ષ

નાનું ‘C-32A’ મિલિટ્રી વિમાન રાત્રે અંદાજે 10:20 વાગ્યે બ્રિટનના ‘RAF મિલ્ડનહોલ’ એરબેઝ પર સુરક્ષિત રીતે લેન્ડ થયું હતું. તેના થોડા સમય બાદ મીડિયાવાળું મુખ્ય પ્લેન પણ ત્યાં પહોંચ્યું હતું. યોજના મુજબ, દુશ્મનોને ભ્રમણામાં રાખવા માટે ટ્રમ્પે અંતે જૂના પ્લેનની સીડીઓ પરથી નીચે ઉતરીને મીડિયાને ‘પીસ સાઈન’ (શાંતિનું પ્રતીક) બતાવ્યું હતું, જેને કેમેરામાં રેકોર્ડ કરવામાં આવ્યું હતું.

બાદમાં જ્યારે પત્રકારોને આ ગુપ્ત ઓપરેશનની ખબર પડી અને તેમણે આ અંગે સવાલ પૂછ્યા, ત્યારે ડોનાલ્ડ ટ્રમ્પે હસતાં-હસતાં કટાક્ષમાં કહ્યું હતું કે, “કદાચ તમે લોકો એક ખતરનાક ફ્લાઈટમાં મુસાફરી કરી રહ્યા હતા, પણ જો હું જઈશ તો તમે પણ મારી સાથે જશો ને?”

ઈતિહાસ પર નજર કરીએ તો, વર્ષ 2000માં પણ રાષ્ટ્રપતિ બિલ ક્લિન્ટનની પાકિસ્તાન યાત્રા વખતે આવો જ એક સિક્રેટ પ્લાન ઘડવામાં આવ્યો હતો, જેમાં મુખ્ય પ્લેનને ચકમો આપવા માટે એક અનમાર્ક્ડ જેટનો ઉપયોગ કરાયો હતો. આ ઘટના ફરી એકવાર સાબિત કરે છે કે વૈશ્વિક નેતાઓની સુરક્ષા પાછળ કેટલા ખતરનાક અને જોખમી પડદા પાછળના ખેલ ખેલાતા હોય છે.