દિવાળી પૂર્વે અમદાવાદમાં હિટ એન્ડ રનની વણઝાર: 4 અલગ-અલગ અકસ્માતમાં 2 મહિલા સહિત 4નાં મોત

દિવાળીના તહેવારોની શરૂઆત સાથે જ અમદાવાદ શહેરના અંતરિક માર્ગો અને એસ.પી. રિંગ રોડ પર ખરીદી તેમજ અવરજવરને કારણે ટ્રાફિકનું ભારણ નોંધપાત્ર રીતે વધ્યું છે. આ ભીડભાડ વચ્ચે બેફામ દોડતા ભારે વાહનો, અતિશય સ્પીડ અને રોંગ સાઇડ ડ્રાઇવિંગના કારણે શહેરના માર્ગો લોહિયાળ બન્યા છે. વિવિધ વિસ્તારોમાં સર્જાયેલી હિટ એન્ડ રનની 4 અલગ-અલગ દુર્ઘટનાઓમાં બે મહિલા સહિત 4 નિર્દોષ નાગરિકોએ જીવ ગુમાવ્યા છે, જેના પગલે તહેવારોના માહોલમાં પરિવારોમાં શોકનું મોજું ફરી વળ્યું છે.

હાથીજણ સર્કલ પાસે ટ્રકની અડફેટે 22 વર્ષીય નવપરણિતાનું મોત

ન્યુ વટવા વિસ્તારમાં રહેતી 22 વર્ષીય યુવતીના લગ્ન 6 મહિના પૂર્વે જ હીરાવાડી ખાતે થયા હતા. ગત 4 નવેમ્બરની સાંજે તે પોતાના મોપેડ પર સાસરે જવા નીકળી હતી. એસ.પી. રિંગ રોડ સ્થિત હાથીજણ સર્કલ નજીક પાછળથી પૂરઝડપે આવેલા એક બેફામ ટ્રકે મોપેડને જોરદાર ટક્કર મારી હતી. ટક્કર વાગતાં જ યુવતી રસ્તા પર પટકાઈ હતી અને ટ્રકનું વ્હીલ તેના પગ પર ફરી વળ્યું હતું. ગંભીર હાલતમાં સારવાર દરમિયાન તેણે દમ તોડ્યો હતો, જ્યારે ટ્રકચાલક વાહન સ્થળ પર જ રેઢું મૂકીને નાસી ગયો હતો.

વટવા GIDCમાં કન્ટેનર ટ્રકે મોપેડને ઉડાવ્યું, વૃદ્ધાનું કમકમાટીભર્યું મોત

વટવા જીઆઈડીસી વિઠ્ઠલનગરના ટેકરા પાસે રહેતા કાપડના એક વેપારી 5 નવેમ્બરના રોજ પત્ની સાથે મહેમદાવાદ ખાતે દીકરીના સાસરે ગયા હતા. સાંજના સુમારે પરત ફરતી વખતે વટવા જીઆઈડીસી એસ.પી. રિંગ રોડ પર ટ્રાફિક વચ્ચે ઊભા હતા ત્યારે પાછળથી ધસી આવેલા એક કન્ટેનર ટ્રકે તેમના મોપેડને પાછળથી ઠોકી દીધું હતું. અકસ્માતમાં વેપારી એક તરફ ફંગોળાયા હતા, જ્યારે તેમના પત્ની કન્ટેનરની બાજુમાં પટકાતાં તેના વ્હીલ નીચે કચડાઈ જવાથી ઘટનાસ્થળે જ પ્રાણ પંખેરું ઊડી ગયું હતું. આ બનાવમાં પણ ટ્રકચાલક વાહન છોડીને ફરાર થઈ ગયો હતો.

આ પણ વાંચો: ઈઝરાયલમાં રાજકીય ઉથલપાથલ: આઈઝનકોટને 67 સાંસદોનો ટેકો, નેતન્યાહૂ 46 પર અટક્યા

ઓગણજ ટોલટેક્સ પાસે રોંગ સાઇડમાં ઘૂસેલા બાઇક ચાલકે જીવ ગુમાવ્યો

શીલજ ચાર રસ્તા પાસે છૂટક મજૂરી કરતો યુવક 30 ઓક્ટોબરના રોજ રાત્રે આશરે 8 વાગ્યે પોતાના મિત્ર સાથે અડાલજથી બાઇક પર સામાન લઈને પરત ફરી રહ્યો હતો. એસ.પી. રિંગ રોડ પર ઓગણજ ટોલટેક્સથી 200 મીટર પહેલાં, સામેથી ઓગણજ તરફથી રોંગ સાઇડમાં પૂરઝડપે આવી રહેલા એક બાઇક સવારે તેમના વાહનને સીધી ટક્કર મારી દીધી હતી. અકસ્માતમાં ત્રણેય જણા રસ્તા પર ફેંકાઈ જતાં ગંભીર ઈજાઓ પહોંચી હતી. સોલા સિવિલ ખાતે સારવાર દરમિયાન રોંગ સાઇડમાં બાઇક હંકારનાર ચાલકનું મોત નીપજ્યું હતું.

રાજેન્દ્રપાર્ક બ્રિજ પાસે અજાણ્યા વાહને માર્બલ કારીગરને કચડ્યા

રાજસ્થાનના સિરોહી જિલ્લાના મૂળ વતની અને અમરાઈવાડીમાં મંદિર બનાવવાનું કામ કરતા એક માર્બલ કારીગર 22 ઓક્ટોબરના રોજ વહેલી સવારે 3 વાગ્યા આસપાસ રાજેન્દ્રપાર્ક બ્રિજ ચડતાં પહેલાં રસ્તો ઓળંગી રહ્યા હતા. તે દરમિયાન અજાણ્યા કારચાલકે તેમને જોરદાર ટક્કર મારી દીધી હતી. માથા અને શરીરના ભાગે ગંભીર ઈજાઓ થતાં સિવિલ હોસ્પિટલમાં સારવાર દરમિયાન તેમનું મોત થયું હતું. બનાવ બાદ કારચાલક વાહન ભગાવી ગયો હતો. મૃતકની ઓળખ સ્પષ્ટ થયા બાદ પુણે રહેતા તેમના સંબંધીએ ‘આઈ’ ડિવિઝન ટ્રાફિક પોલીસ સ્ટેશનમાં ફરિયાદ નોંધાવી હતી.

અમદાવાદમાં સર્જાયેલા 4 જીવલેણ અકસ્માતોની રૂપરેખા

તહેવારો ટાણે શહેર અને હાઇવે પર સર્જાયેલા આ તમામ અકસ્માતોમાં વાહનચાલકોની ઘોર બેદરકારી, અતિશય ગતિ અને ટ્રાફિક નિયમોના ઉલ્લંઘન સ્પષ્ટપણે જવાબદાર સાબિત થયા છે. ચારેય કેસમાં ટ્રાફિક પોલીસે ગુના નોંધી સીસીટીવી ફૂટેજના આધારે ફરાર વાહનચાલકોની શોધખોળ શરૂ કરી છે. તહેવારો દરમિયાન માર્ગો પર ટ્રાફિક પોલીસનું કડક મોનિટરિંગ અને સ્પીડ કંટ્રોલ સુનિશ્ચિત કરવામાં આવે તે હવે અનિવાર્ય બની ગયું છે.