ટાઇગર શ્રોફ સાથે ફિલ્મી ડેબ્યૂ કરશે એલ્વિશ યાદવ
રેમો ડિસૂઝાની નવી એક્શન ફ્રેન્ચાઇઝીમાં મળશે મુખ્ય ભૂમિકા
યૂટ્યુબર અને રિયાલિટી શો સ્ટાર એલ્વિશ યાદવ હવે મોટા પડદા પર એન્ટ્રી કરવા તૈયાર છે. તેઓ કોરિયોગ્રાફર અને નિર્દેશક રેમો ડિસૂઝાની નવી એક્શન ફ્રેન્ચાઇઝી ફિલ્મથી બોલિવૂડમાં ડેબ્યૂ કરશે. આ ફિલ્મમાં તેમની સાથે ટાઈગર શ્રોફ અને અભિષેક બેનર્જી મુખ્ય ભૂમિકામાં જોવા મળશે. ફિલ્મનું નિર્માણ અભિનેત્રી અંકિતા લોખંડેના પતિ અને ઉદ્યોગપતિ વિકી જૈનના નવા પ્રોડક્શન હાઉસ VJ Frames હેઠળ થઈ રહ્યું છે. ફિલ્મનું શૂટિગ ૧ ઓગસ્ટથી શરૂ થઈ ગયું છે.
એલ્વિશે પોતાના કરિયરની શરૂઆત યૂટ્યુબ પર ક્નટેન્ટ ક્રિએટર તરીકે કરી હતી. ત્યારબાદ `બિગ બોસ OTT ૨’, `પ્લેગ્રાઉન્ડ’, `MTV રોડીઝ XX: ડબલ ક્રોસ’ અને `લાફ્ટર શેફ્સ’ જેવા રિયાલિટી શોમાં ભાગ લઈને દેશભરમાં લોકપ્રિયતા મેળવી હતી. ગયા વર્ષે તેમણે વેબ શો `ઔકાત કે બહાર’થી અભિનયની શરૂઆત કરી હતી અને હવે પ્રથમ વખત બોલિવૂડ ફિલ્મમાં જોવા મળશે. એલ્વિશના બોલિવૂડ ડેબ્યૂની જાહેરાત થતાં જ સોશિયલ મીડિયા પર ચાહકોએ તેમને અભિનંદન પાઠવ્યા હતા.
ઉલ્લેખનીય છે કે રેમો ડિસૂઝા અને ટાઈગર શ્રોફ અગાઉ વર્ષ ૨૦૧૬માં આવેલી `એ ફ્લાઈંગ જટ્ટ’ ફિલ્મમાં સાથે કામ કરી ચૂક્યા છે. હવે બંને ફરી એક વખત નવી એક્શન ફ્રેન્ચાઇઝી સાથે દર્શકો સામે આવશે.
