કાશ્મીરમાં થયેલા આતંકી હુમલાઓમાં કોનો હાથ ? એનઆઈએના રિપોર્ટમાં ખુલાસો .. વાંચો
પાકિસ્તાન સમર્થિત આતંકી જૂથો દ્વારા ભારત વિરોધી પ્રવૃત્તિ સતત ચાલુ જ રહી છે. કાશ્મીરમાં ઘૂસણખોરીના પ્રયાસો વધી ગયા છે ત્યારે રાષ્ટ્રીય તપાસ એજન્સી એ ખુલાસો કર્યો છે કે જમ્મુ-કાશ્મીરમાં થયેલી છેલ્લી બે આતંકી ઘટનાઓમાં પાકિસ્તાનના લશ્કર-એ-તૈયબાની સંડોવણી હતી. જેમાંથી એક જાન્યુઆરી મહિનામાં રાજૌરી ગામમાં થયેલો હુમલો હતો જેમાં 7 નાગરિક માર્યા ગયા હતા અને બીજો હુમલો પૂંછ જિલ્લામાં થયો હતો, જ્યાં સેનાના વાહનોને નિશાન બનાવવામાં આવ્યા હતા. જો કે આતંકીઓને શોધવા માટે સર્ચ ચાલુ જ રાખવામાં આવશે.
જમ્મુ-કાશ્મીરમાં પહેલો આતંકી હુમલો 1 જાન્યુઆરીની રાતે રાજૌરીના ઢાંગરી ગામમાં થયો હતો જેમાં પાંચ લોકોના મોત નીપજ્યા હતા અને ઘણા ઈજાગ્રસ્ત થઈ ગયા હતા. રાત્રે એક ઘરમાં લગાવવામાં આવેલા આઇઇડીમાં બ્લાસ્ટ થવાથી વધુ બે લોકોના મોત થઈ ગયા હતા અને ઘણા ઈજાગ્રસ્ત થઈ ગયા હતા.
આઈઈડી બે આતંકવાદીઓ દ્વારા વરિષ્ઠ અધિકારીઓને નિશાન બનાવવા માટે લગાવવામાં આવ્યા હતા. મામલો શરૂઆતમાં રાજૌરી પોલીસ સ્ટેશનમાં નોંધાયો પરંતુ બાદમાં એનઆઈએએ આને પોતાના હાથમાં લીધો હતો. તપાસ દરમિયાન એનઆઈએને જાણ થઈ કે બંને હુમલાખોરોને લોકલ લોકોની તરફથી મદદ કરવામાં આવી હતી.
સપ્ટેમ્બરમાં ઢાંગરી હત્યાઓમાં સામેલ આતંકવાદીઓને શરણ આપવાના આરોપમાં પૂંછ જિલ્લાથી બે લોકોની ધરપકડ કરી હતી જેનું નામ નિસાર અહમદ અને મુશ્તાક હુસૈન હતુ. તેમની પૂછપરછ કર્યા બાદ એનઆઈએને જાણ થઈ કે નિસાર લશ્કર-એ-તૈયબાના એક હેંડલર અબૂ કતાલ ઉર્ફે કતલ સિંધીના સતત સંપર્કમાં હતો. ઓવરગ્રાઉન્ડ વર્કર નિસારની પહેલા ધરપકડ કરવામાં આવી હતી.
