વિશ્વમાં ગમે ત્યાં ત્રાટકી શકે તેવી પરમાણુ મિસાઈલનું US દ્વારા પરીક્ષણ, આ દેશ પાસે છે આવી સૌથી વધુ મિસાઈલો

શક્તિ પ્રદર્શન તરીકે, યુએસએ કેલિફોર્નિયાના વેન્ડનબર્ગ સ્પેસ ફોર્સ બેઝમાંથી પૂરા વિશ્વમાં ગમે ત્યાં લક્ષ્યાંકને નિશાન બનાવી શકે તેવી પરમાણુ હથિયારો લઈ જવા સક્ષમ નિ:શસ્ત્ર મિનિટમેન III ઇન્ટરકોન્ટિનેન્ટલ બેલિસ્ટિક મિસાઈલ (ICBM) નું પ્રક્ષેપણ કર્યું હતું. પ્રક્ષેપણનો વિડિયો યુનાઇટેડ સ્ટેટ્સ એર ફોર્સ દ્વારા જાહેર કરવામાં આવ્યો હતો.

અહેવાલો અનુસાર મિસાઈલ 24,140 કિલોમીટર પ્રતિ કલાકથી વધુની ઝડપે લગભગ 6760 કિલોમીટર દૂર ઓસ્ટ્રેલિયાના ઉત્તર-પૂર્વ કિનારે આવેલા માર્શલ આઇલેન્ડ્સમાં યુએસ આર્મી સ્પેસ એન્ડ મિસાઈલ ડિફેન્સ કમાન્ડના રોનાલ્ડ રેગન બેલિસ્ટિક મિસાઈલ ડિફેન્સ ટેસ્ટ સાઇટ પર પહોંચી હતી.

યુએસના ડિપાર્ટમેન્ટ ઓફ ડિફેન્સ અનુસાર આ ICBM પરીક્ષણ પ્રક્ષેપણ રાષ્ટ્રના પરમાણુ નિવારણની શક્તિ અને ટ્રાયડના ICBM ભાગની તૈયારીરૂપે કરવામાં આવ્યું હતું. ટ્રાયડ પ્રોગ્રામમાં હથિયારો અને પ્લેટફોર્મનો સમાવેશ થાય છે જે જમીન, હવા અને પાણી પરથી કોઈપણ સંભવિત હુમલાને રોકવા માટે નિવારક તરીકે કાર્ય કરે છે. ટ્રાયડ પ્રોગ્રામના ભાગરૂપે, યુએસ પાસે યુદ્ધ માટે તૈયાર 400 LGM-30G મિનિટમેન III ઇન્ટરકોન્ટિનેન્ટલ બેલિસ્ટિક મિસાઈલો છે.

અન્ય દેશો પણ આવી મિસાઈલો ધરાવે છે: સૌથી વધુ રશિયા પાસે

વિશ્વમાં ગમે ત્યાં ત્રાટકી શકે એવી મિસાઈલો અન્ય દેશો પણ ધરાવે છે.રશિયા પાસે સૌથી વધારે ઇન્ટરકોન્ટિનેન્ટલ બેલિસ્ટિક મિસાઇલ્સ છે.તેની RS-28 Sarmat (Satan II), Topol-M, અને Yars જેવી મિસાઇલો 10,000 કિલોમીટરથી વધુની રેન્જ ધરાવે છે અને પરમાણુ હથિયારો લઈ જઈ શકે છે.ચીનની DF-41 અને DF-31A મિસાઈકોનિબ ખાસ ઉલ્લેખનીય છે. DF-41 ની રેન્જ 12,000-15,000 કિલોમીટર છે.ફ્રાન્સ પાસે 8,000-10,000 કિલોમીટરની રેન્જની ,યુકે પાસે 12000 કિલોમીટર રેન્જની અને ઉત્તર કોરિયા પાસે પરમાણુ હથિયારો લઈ જઈ શકે તેવી 13000 કિલોમીટર રેન્જ ધરાવતી મિસાઇલો છે. ભારત પાસે અગ્નિ-V ICBM છે, જેની રેન્જ 5,000-8,000 કિલોમીટર છે. જોકે, આ સંપૂર્ણ વૈશ્વિક રેન્જ ધરાવતી નથી, પરંતુ એશિયા અને યુરોપના મોટા ભાગોને આવરી લે છે.