આ ઇન્ટરનેશનલ એરપોર્ટ છે ?! 2600 કરોડના હીરાસર ઍરપોર્ટમાં બસપોર્ટ જેવી સુવિધા પણ નહીં : અઠવાડિયાથી AC બંધ
રૂપિયા 2600 કરોડના ખર્ચે બનેલા રાજકોટ ઇન્ટરનેશનલ એરપોર્ટ પર આંતરરાષ્ટ્રીય ફ્લાઇટ શરૂ થાય તે પહેલા બસપોર્ટ જેવી પ્રાથમિક સુવિધાઓ પણ મળતી ન હોવાની વ્યાપક ફરિયાદો વચ્ચે ફરી એક વખત છેલ્લા એક અઠવાડિયાથી આકરી ગરમી અને બફારા વચ્ચે એર કન્ડિશનર બંધ હાલતમાં છે અને કાલે ઓનલાઇન ચેક ઇન સિસ્ટમ ઠપ્પ થઈ જતાં સવારની ફ્લાઇટના પેસેન્જરો રઝળી પડ્યા હતા.
સાડા ત્રણ મહિના પહેલા રાજકોટ હીરાસર ઇન્ટરનેશનલ એરપોર્ટ પર ₹326 કરોડના ખર્ચે આકાર પામેલા ટર્મિનલમાં સેન્ટ્રલ એસી બંધ થઈ જતા પેસેન્જરો અકળાઈ ગયા હતા. આ અંગે બંને એરલાઇન્સ દ્વારા ઓથોરિટી ને જાણ કરવામાં આવતા તેમને જણાવ્યું હતું કે એર કન્ડિશન કામ કરી રહ્યા છે પરંતુ ભારે લોડનાં લીધે ટ્રીપિંગ થતું હોવાના લીધે બંધ થઈ જાય છે તેવા કારણ આપીને એરપોર્ટના ઇલેક્ટ્રિકલ સ્ટાફ દ્વારા જવાબ આપવામાં આવે છે પરંતુ કોઈ નિરાકરણ લાવવામાં ન આવતાં એરલાઇન્સ અને પેસેન્જરોમાં રોષ ફેલાયો છે.
આ દરમિયાન ગઈકાલે સવારે પણ એર ઇન્ડિયાની મુંબઈ માટેની ફલાઇટ પૂર્વે ઓનલાઇન ચેકઇન સિસ્ટમ ઠપ્પ થઈ ગઈ હતી.આજથી મેન્યુઅલ ચેકઇનમાં કલાકોનો સમય વેડફાઈ ગયો હતો.મોડેથી પહોંચેલા પેસેન્જરોને ઘણી વાર ઓનલાઈન ચેકઇનના આધારે એન્ટ્રી અપાઈ છે પણ આ સમસ્યા આવતા ગઈકાલે અનેક પેસેન્જરને ફ્લાઈટ ચુકાઈ ગઈ હતી.
