ઉદયપુરમાંથી ચોંકાવનારી ઘટના: ચાલતી કારમાં મહિલા મેનેજર સાથે સામૂહિક દુષ્કર્મ,3 નરાધમની અટકાયત
ઉદયપુરમાંથી એક ચોંકાવનારી ઘટના સામે આવી છે. એક પ્રાઇવેટ આઈટી કંપનીની મહિલા મેનેજર સાથે ચાલું કારમાં સામૂહિક દુષ્કર્મ કરવામાં આવ્યું હતું. પીડિતાએ પોતાની જ કંપનીના CEO, મહિલા એક્ઝિક્યુટિવ હેડ અને તેના પતિ પર ગંભીર આરોપ લગાવ્યા બાદ પોલીસે ત્રણેય આરોપીઓની અટકાયત કરી લીધી છે. આ ઘટના ઉદયપુરના સુખેર પોલીસ સ્ટેશન વિસ્તારમાં બની છે.
જિલ્લા પોલીસ અધિક્ષક યોગેશ ગોયલે જણાવ્યું કે, ‘પીડિતાના નિવેદન અને મેઝિડકલ રિપોર્ટના આધારે આ કાર્યવાહી કરવામાં આવી છે. આ કેસની ગંભીરતાને જોતા તપાસ એડિશનલ એસપી માધુરી વર્માને સોંપવામાં આવી છે.’ પોલીસે ધરપકડ કરેલા ત્રણ આરોપીઓમાં આઇટી કંપનીના સીઇઓ જીતેશ, તેમની મહિલા સહકાર્યકર, એક્ઝિક્યુટિવ હેડ શિલ્પા અને તેમના પતિ ગૌરવનો સમાવેશ થાય છે.
આ પણ વાંચો :ભાયાવદર નગરપાલિકાના કારોબારી ચેરમેનના પતિ,પૂર્વ પ્રમુખ સંચાલિત જુગાર ક્લબ પકડાઇ: ભાજપ આગેવાન સહિત 6 શખ્સોને ઝડપી પાડ્યા
પોલીસના જણાવ્યાનુસાર, ઉદયપુરના શોભાગપુરા વિસ્તારની એક હોટલમાં કંપનીના સીઈઓનો જન્મદિવસ અને નવા વર્ષની પાર્ટી રાખવામાં આવી હતી. રાતે 1ઃ30 વાગ્યે પાર્ટી પૂરી થયા બાદ પીડિતાની તબિયત લથડી હતી. મહિલા એક્ઝિક્યુટિવ હેડ શિલ્પાએ તેને ઘરે છોડવાના બહાને પોતાની સાથે આફ્ટર પાર્ટીમાં આવવા દબાણ કર્યું હતું. રાત્રે 1:45 વાગ્યે પીડિતાને બળજબરીથી કારમાં બેસાડવામાં આવી હતી. કારમાં સીઈઓ જીતેશ અને ગૌરવ પહેલેથી હાજર હતા.
રસ્તામાં પીડિતાને નશાકારક ધૂમ્રપાન કરાવી બેભાન કરી દેવામાં આવી હતી અને ત્યારબાદ તેની સાથે છેડતી તથા સામૂહિક દુષ્કર્મ આચરવામાં આવ્યું હતું. સવારે 5 વાગ્યે પીડિતાને ઘરે છોડી દેવાઈ હતી. ભાનમાં આવ્યા બાદ પીડિતાએ શરીરે ઈજાના નિશાન જોતા પોલીસમાં ફરિયાદ કરી હતી. તપાસ દરમિયાન પોલીસને કારના ડેશકેમમાંથી આખી ઘટનાના ઓડિયો અને વીડિયો પુરાવા મળી આવ્યા છે.
