થર્ટી ફર્સ્ટને લઈને રાજકોટ પોલીસ એલર્ટ: પીધેલા, છરી તથા દારૂ સાથે 30થી વધુ શખ્સોને પકડી પાડયા
થર્ટી ફર્સ્ટની ઉજવણી પૂર્વે રાજકોટ પોલીસ એક્શન મોડમાં આવી છે. શહેરમાં કાયદો અને વ્યવસ્થા જળવાઈ રહે તે માટે તમામ મુખ્ય માર્ગો અને સંવેદનશીલ વિસ્તારોમાં રાત્રિ પેટ્રોલિંગ સખત કરી દેવામાં આવ્યું છે. આ ચેકિંગ દરમિયાન પોલીસે દારૂ પીધેલા, છરી રાખતા અને દારૂના વેચાણ સાથે સંકળાયેલા કુલ 30 થી વધુ શખસોની અટકાયત કરી
વિગતો મુજબ, શહેરમાં હવે વ્યાવસાયિકો પણ છરી સાથે નીકળવા લાગ્યા હોય તેવું ચિત્ર પોલીસ કાર્યવાહીમાં સામે આવ્યું છે. ગાંધીગ્રામ પોલીસે શીતલ પાર્ક પાસેથી પ્રકાશ ચંદુભાઈ શિશાંગિયા નામના શખસને છરી સાથે ઝડપ્યો હતો જે પૂછપરછમાં હેર સલૂન ચલાવતો હોવાનું સામે આવ્યું હતું.એવી જ રીતે કુવાડવા રોડ પોલીસે ફેબ્રિકેશનના ધંધા સાથે સંકળાયેલા રવિ નીતિનભાઈ આસોડિયાને પણ છરી સાથે ઝડપી લીધો હતો. તેમજ પોલીસના રાત્રિ ચેકિંગ દરમિયાન હથિયારબંધીના જાહેરનામાના ભંગ બદલ કુલ 14 શખસોને છરી સાથે પકડવામાં આવ્યા છે.
આવી જ રીતે છાટાપાણી કરીને વાહનો લઈને નીકળેલા 16 થી વધુ લોકો સામે પોલીસે કાર્યવાહી કરી છે. પોલીસે પ્રશાંત વિનોદભાઈ બારસિયા નામનો શખસ પોતાની થાર કારમાં નશાની હાલતમાં તેમજ નિઝામ અબ્દુલ દોલકિયા નામનો ગેરેજ સંચાલક ઈનોવા કારમાં નશો કરેલી હાલતમાં ઝડપાયો હતો. આ ઉપરાંત ફર્નિચરનો વ્યવસાય કરતો એક શખસ પણ બાઈક પર નશાની હાલતમાં નીકળતા પોલીસના હાથે ચડી ગયો હતો.
માત્ર રસ્તા પર જ નહીં, પરંતુ દારૂના વેચાણ કરતા બૂટલેગરો પર પણ ધોંસ બોલાવી છે. શહેરના વિવિધ વિસ્તારોમાં 8 જેટલા દરોડા પાડીને દેશી અને ઈંગ્લીશ દારૂનો જથ્થો જપ્ત કરવામાં આવ્યો છે અને વેચાણ કરતા તત્વોની ધરપકડ કરવામાં આવી છે. રાજકોટ પોલીસ દ્વારા કરવામાં આવેલી આ કડક કાર્યવાહીથી અસામાજિક તત્વોમાં ફફડાટ ફેલાયો છે. 31stની રાત્રે કોઈ પણ પ્રકારની નશાખોરી ન થાય તે માટે પોલીસ દ્વારા હજુ પણ સઘન ચેકિંગ ચાલુ રાખવામાં આવશે તેવું જાણવા મળ્યું છે.
