રાજકોટમાં ભલે વોર્ડ ક્રમમાં નં.3 પણ ગંદકી (કચરા)માં 1 નંબર: વોર્ડ નંબર 3માં તોબા-તોબા,જાહેર માર્ગ પર ગંદકીના ઢગલા
રાજકોટ શહેરમાં સ્વચ્છતા અભિયાન માટે મહાપાલિકા દ્વારા કાર્યક્રમો યોજવામાં આવે, સ્વચ્છતા સફાઈ કામગીરી, સોલીડ વેસ્ટ વિભાગના કર્મચારીઓથી લઈ મશીનરીઓ પાછળ વર્ષે કરોડો રૂપિયા ખર્ચાય છે પરંતુ ઘણી ખરી એવી જગ્યાઓ હોય કે ગંદકીના ગંજ ખડકાયેલા મળે. શહેરના 18 વોર્ડમાં ભલે વોર્ડના ક્રમમાં વોર્ડ નં.3 આવે પરંતુ ઉપરોક્ત ગંદકી (કચરા) જાણે ઉકરડા જેવા દૃશ્યોથી એવું જ કહી શકાય કે ગંદકીમાં વોર્ડ નં.1. રેલનગરની લાલ બહાદુર ટાઉનશિપ પાસેના જાહેર માર્ગ એ માર્ગ નહીં પરંતુ કચરો ઠલવવાનો નાકરાવાડીનો ભાગ હોય તેવા ગંદકીના ઢગલા છે.
ગંદકી પાછળ માત્ર મહાપાલિકા જવાબદાર હોય એવું ન હોઈ શકે, સફાઈ પણ થતી હશે પરંતુ આસપાસના રહેવાસીઓ, વિસ્તારવાસીઓ પણ જો પોતાની નૈતિક ફરજ ન સમજે અને આવી રીતે જ્યાં ત્યાં કચરો ફેંકીને ગંદકી ફેલાવે તો મહાપાલિકા પણ ક્યાં ક્યાં પહોંચે. જ્યારે કચરો લેવા માટે ડોર ટુ ડોર ગાર્બેજ કલેક્શન વ્હિકલ આવે છે તો તેમાં જ બે ડગલા ચાલીને કચરો નાખવામાં આવે તો આવી ગંદકી ન થાય.
આખરે ત્યાં રહેનારા લોકોએ પણ સમજવું જોઈએ તો કે ગંદકીથી ફેલાનારો રોગચાળો તેમને જ નળશે. એક નાગરિક તરીકે પોતાની જવાબદારી સમજીને જાહેરમાં ગંદકી ફેલાવવી ન જોઈએ. આવા ઈસમોને મહાપાલિકાએ પણ દંડવા જોઈએ તો જ ગંદકી અટકી શકે એ પણ હકિકત છે.
