આતંકીઓના જનાજામાં પાક સેનાની હાજરી…વિદેશ મંત્રાલયે તસવીર અને પુરાવા સાથે પાકિસ્તાન પર કર્યા આકરા પ્રહાર

ઓપરેશન સિંદુરને અંજામ આપ્યા બાદ વિદેશ સચિવ વિક્રમ મિસ્ત્રી અને સોફિયા કુરેશી અને વીઓમીકા સિંઘે પ્રેસ કોન્ફરન્સ કરી હતી અને ઓપરેશનની સમગ્ર વિગતો આપી હતી ત્યારે આજે સતત બીજા દિવસે વિદેશ મંત્રાલયે પ્રેસ કોન્ફરન્સ યોજી હતી. બુધવારની જેમ, વિદેશ સચિવ વિક્રમ મિશ્રી સાથે કર્નલ સોફિયા કુરેશી અને વિંગ કમાન્ડર વ્યોમિકા સિંહ પણ હતા. પ્રેસ કોન્ફરન્સમાં વિદેશ સચિવ વિક્રમ મિશ્રીએ જણાવ્યું હતું કે TRF એ બે વાર પહેલગામ હુમલાની જવાબદારી સ્વીકારી હતી. પરંતુ પાકિસ્તાને TRFનો બચાવ કર્યો. અમે પાકિસ્તાનને કડક જવાબ આપ્યો છે. ઓપરેશન સિંદૂરની કાર્યવાહીમાં માર્યા ગયેલા આતંકવાદીઓના અંતિમ સંસ્કારમાં પાકિસ્તાની સેનાએ ભાગ લીધો હતો. આતંકવાદીઓના અંતિમ સંસ્કારમાં બેશરમ પાકિસ્તાની સેનાએ આંસુ વહાવ્યા હતા. અહીં ટ્રેક્ટરોમાં ભરાઈને આતંકીઓના શબ આવ્યા હતા.

વિદેશ સચિવ વિક્રમ મિશ્રીએ કહ્યું કે એ પણ વિચિત્ર છે કે નાગરિકોના અંતિમ સંસ્કાર તેમના રાષ્ટ્રધ્વજમાં લપેટાયેલા શબપેટીઓમાં અને રાજ્ય સન્માન સાથે કરવામાં આવી રહ્યા હતા. આર્મી અધિકારીઓ તેમાં સામેલ થઈ રહ્યા છે. ગઈકાલે પાકિસ્તાને જમ્મુ અને કાશ્મીરના શીખ સમુદાય પર લક્ષ્યાંકિત હુમલો કર્યો. પૂંછમાં એક ગુરુદ્વારા પર હુમલો કરવામાં આવ્યો હતો. આ હુમલામાં ત્રણ લોકો માર્યા ગયા હતા. પૂંછમાં કુલ 16 નાગરિકો માર્યા ગયા છે અને ઘણા લોકો ઘાયલ થયા છે.

વિદેશ સચિવ વિક્રમ મિશ્રીએ પ્રેસ બ્રીફિંગ દરમિયાન જણાવ્યું હતું કે સરહદ પારથી આપણા વિરુદ્ધ ઘણી ખોટી માહિતી આપવામાં આવી છે, કેટલીક બાબતો ધ્યાનમાં રાખવા જેવી છે જેમ કે તણાવ વધવાનો ઉલ્લેખ કરવામાં આવી રહ્યો છે. પરંતુ પહેલી વાત એ છે કે પહેલગામમાં થયેલો હુમલો તણાવ વધવાનું પહેલું કારણ છે, ભારતીય સેનાએ ગઈકાલે તેનો જવાબ આપ્યો છે. તેમણે કહ્યું કે ‘ધ રેઝિસ્ટન્સ ફ્રન્ટ’ (TRF) ગ્રુપ લશ્કર-એ-તૈયબાનું એક જાણીતું મોરચો છે. અમે પહેલગામ હુમલાની જવાબદારી લેનાર વ્યક્તિ વિશેની તમામ માહિતી સંયુક્ત રાષ્ટ્ર સુરક્ષા પરિષદ (UNSC) ને આપી રહ્યા છીએ. TRF વિશે સતત અપડેટ્સ આપવામાં આવી રહ્યા છે.

‘પાકિસ્તાન હજુ પણ વૈશ્વિક આતંકવાદનું કેન્દ્ર છે’

તેમણે કહ્યું કે પાકિસ્તાનના માહિતી મંત્રી દ્વારા આપવામાં આવેલું નિવેદન કે અહીં કોઈ આતંકવાદી નથી તે સંપૂર્ણપણે ખોટું અને ભ્રામક છે. પાકિસ્તાન હજુ પણ વૈશ્વિક આતંકવાદનું કેન્દ્ર છે. ઓસામા બિન લાદેન ત્યાં મળી આવ્યો હતો અને પાકિસ્તાને તેને ‘શહીદ’ ગણાવ્યો હતો. તેમણે કહ્યું કે પાકિસ્તાન દ્વારા “સંયુક્ત તપાસ” ની ઓફર ફરી એકવાર સમય બચાવવા અને પોતાને બચાવવાની રણનીતિ છે

📡 𝐋𝐈𝐕𝐄 Now 📡

Press Briefing by @MEAIndia on #OperationSindoor

Watch live on #PIB's📺

▶️Facebook: https://t.co/ykJcYlMTtL
▶️YouTube: https://t.co/Lj2sShW9tW https://t.co/ybct3LZ5rP
— PIB India (@PIB_India) May 8, 2025

વિક્રમ મિશ્રીએ એક ચોંકાવનારો ખુલાસો કર્યો કે જ્યારે UNSC ના નિવેદનમાં TRFનું નામ સામેલ કરવાની વાત આવી ત્યારે ફક્ત પાકિસ્તાને જ તેનો વિરોધ કર્યો અને નામ હટાવી દીધું. આ સ્પષ્ટ સંકેત છે કે પાકિસ્તાન હજુ પણ આ આતંકવાદી જૂથોને રક્ષણ અને સમર્થન આપી રહ્યું છે. તેમણે પુનરોચ્ચાર કર્યો કે ભારતની કાર્યવાહી આતંકવાદી માળખાને નષ્ટ કરવા સુધી મર્યાદિત હતી; અમે નાગરિકો કે લશ્કરી મથકો પર હુમલો કર્યો નથી, પરંતુ ફક્ત આતંકવાદીઓના ઠેકાણાઓ પર હુમલો કર્યો છે.

વિક્રમ મિશ્રીએ કહ્યું કે ભારતે 26/11 અને પઠાણકોટ જેવા હુમલાઓની તપાસમાં સહયોગ કર્યો હતો, પરંતુ પાકિસ્તાને કેસોને પડદા પર મૂકી દીધા હતા. મુંબઈ હુમલા અંગે વિગતવાર પુરાવા આપ્યા છતાં, કોઈ નક્કર કાર્યવાહી કરવામાં આવી ન હતી. પઠાણકોટ કેસમાં, પાકિસ્તાની ટીમને ડીએનએ વિશ્લેષણ અને આતંકવાદી સંગઠનોના અધિકારીઓની માહિતી પૂરી પાડવામાં આવી હતી, પરંતુ હજુ પણ કોઈ પ્રગતિ થઈ નથી.

હવે સમય આવી ગયો છે…ભારતે આતંકવાદ સામે વિશ્વને કરી અપીલ

વિદેશ સચિવ વિક્રમ મિશ્રીએ વિશ્વ સમુદાયને અપીલ કરતા કહ્યું કે હવે સમય આવી ગયો છે કે પાકિસ્તાનની છેતરપિંડી અને આતંકવાદની નીતિને ઓળખી શકાય અને તેની સાથે કડક કાર્યવાહી કરી શકાય. પાકિસ્તાન આતંકવાદનું કેન્દ્ર છે. વિશ્વભરમાં થયેલા ઘણા આતંકવાદી હુમલાઓમાં તેના નિશાન મળી આવ્યા છે.

વિદેશ સચિવે પાકિસ્તાનના આ દલીલને સ્પષ્ટપણે નકારી કાઢી હતી કે 7 મેના રોજ ભારતીય હુમલામાં ફક્ત નાગરિકો જ માર્યા ગયા હતા. તેમણે કડક શબ્દોમાં કહ્યું કે અમે સ્પષ્ટ કર્યું છે કે અમારું લક્ષ્ય ફક્ત આતંકવાદીઓના ઠેકાણા હતા, તે ઠેકાણા જ્યાં આતંકવાદ ખીલે છે, તે ‘અંતિમ સંસ્કાર’ પણ જ્યાં આતંકવાદીઓને સન્માન સાથે વિદાય આપવામાં આવે છે.

ભારતે ફક્ત આતંકવાદી ઠેકાણાઓને જ નિશાન બનાવ્યા

વિક્રમ મિશ્રીએ કહ્યું કે નીલમ-જેલમ ડેમ પ્રોજેક્ટને નિશાન બનાવવાના આરોપો ખોટા અને બનાવટી છે. ભારતે ફક્ત આતંકવાદી ઠેકાણાઓને જ નિશાન બનાવ્યા છે. જો આ ભારતીય માળખાગત સુવિધાઓને નિશાન બનાવવાનું બહાનું છે, તો ભારતના પ્રતિભાવના પરિણામો માટે પાકિસ્તાન જવાબદાર રહેશે.

અમે પાકિસ્તાની લશ્કરી સ્થાપનોને નિશાન બનાવ્યા નહોતા: કર્નલ સોફિયા

અગાઉ, પ્રેસને સંબોધતા, કર્નલ સોફિયા કુરેશીએ કહ્યું, “અમે પાકિસ્તાની લશ્કરી સ્થાપનોને નિશાન બનાવ્યા ન હતા. અમારી કાર્યવાહી પૂર્વ ચેતવણી પછી કરવામાં આવી હતી અને તેનો ઉદ્દેશ્ય અમારા નાગરિકો અને સંપત્તિનું રક્ષણ કરવાનો હતો.”

તેમણે ભારપૂર્વક જણાવ્યું હતું કે ભારત ફક્ત તે તત્વોને નિશાન બનાવે છે જે સીધો ખતરો ઉભો કરી રહ્યા હતા. ભારતે પહેલાથી જ સ્પષ્ટ કરી દીધું છે કે દેશના લશ્કરી સ્થાપનો પર કોઈપણ હુમલો યોગ્ય અને મજબૂત જવાબ આપશે. આમ છતાં, 7-8 મેની રાત્રે, પાકિસ્તાને ડ્રોન અને મિસાઇલો દ્વારા અવંતિપુરા, શ્રીનગર, જમ્મુ, પઠાણકોટ, અમૃતસર, કપૂરથલા, જલંધર, લુધિયાણા, આદમપુર, ભટિંડા, ચંદીગઢ, નાલ, ફલોદી, ઉત્તરલાઈ અને ભૂજ જેવા મહત્વપૂર્ણ લશ્કરી સ્થાપનોને નિશાન બનાવવાનો પ્રયાસ કર્યો. જોકે, ભારતના સંકલિત કાઉન્ટર યુએએસ ગ્રીડ અને હવાઈ સંરક્ષણ પ્રણાલીએ આ બધા હુમલાઓને નિષ્ફળ બનાવ્યા.