હવે બેન્કમાં 2-5 દિવસ માટે પણ FD કઢાવી શકાશે : ટૂંક સમયમાં રીઝર્વ બેન્ક નવા નિયમો જાહેર કરશે

એક બહુ મોટો વર્ગ પોતાના રૂપિયાની બચત માટે બેન્કની ફિક્સ ડીપોઝીટ પસંદ કરે છે. અત્યારે બેન્કમાં FD કઢાવવા માટેનો ન્યુનત્તમ સમય સાત દિવસનો છે પરંતુ હવે સાત દિવસથી પણ ઓછા સમયની FD કઢાવી શકાશે.

સુત્રોના જણાવ્યા અનુસાર, રીઝર્વ બેંક FDનાં આ નિયમોમાં ફેરફાર કરવાનું વિચારી રહી છે અને આ માટે બેંકો પાસેથી સૂચનો પણ માગ્યા છે. રીઝર્વ બેંક ઈચ્છે છે કે, લોકો સાત દિવસથી પણ ઓછા સમય માટે બેન્કમાંથી FD કઢાવી શકે તે માટે નિયમો ફેરવવા જોઈએ. આ માટે રીઝર્વ બેન્કે જુદી જુદી બેંકો પાસેથી સૂચનો માગ્યા છે. આ ઉપરાંત SBI અને પંજાબ નેશનલ બેંક જેવી મોટી બેંકો અને ખાનગી બેંકો સાથે પણ વાત કરી છે.

કેટલીક બેન્કોએ આ વિચાર સાથે સહમતી દર્શાવી છે કારણ કે તેને લીધે બેન્કના ગ્રાહકોની સંખ્યામાં વધારો થશે. કેટલીક બેન્કોએ એવું કહ્યું છે કે, આટલી નાની મુદ્દત માટે FD ઉપર વ્યાજ આપવામાં સમસ્યા ઉભી થઇ શકે છે.

આ પણ વાંચો :Operation Shield : આજે યોજાનાર મોકડ્રીલ મોકૂફ, નવી તારીખ જાહેર કરાશે

રીઝર્વ બેંક માને છે કે, ઓછી મુદતની FD ને લીધે બેન્કમાં ડીપોઝીટ વધશે.દેશની બેન્કોમાં જુન-23માં 191.6 લાખ કરોડની એફ.ડી. હતી. જયારે જુન -2024માં 212.9 લાખ કરોડ અને એપ્રિલ-2025માં 230.3લાખ કરોડની થઇ છે.