Operation Shield : આજે યોજાનાર મોકડ્રીલ મોકૂફ, નવી તારીખ જાહેર કરાશે

દેશમાં ગત તા.7મી મે ના રોજ દેશભરના સરહદી જિલ્લાઓમાં સિવિલ ડિફેન્સ મોકડ્રીલ યોજવામાં આવ્યા બાદ આજે કેન્દ્ર સરકારના ગૃહ વિભાગના આદેશ મુજબ દેશભરમાં ઓપરેશન શિલ્ડ હેઠળ ફરી મોકડ્રિલ યોજવાનું જાહેર કરાયું હતું. જો કે વહીવટી કારણોસર મોડીરાત્રે મોકડ્રિલ અને બ્લેક આઉટ મુલતવી રાખવામાં આવ્યા હોવાનું સરકાર દ્વારા જાહેર કરવામાં આવ્યું હતું. નોંધનીય છે કે, સિવિલ ડિફેન્સ મોકડ્રિલ અન્વયે રાજકોટમાં માધાપર ગામ તેમજ જામનગર રોડ વિસ્તારમાં રાત્રે 8.30 કલાકથી 15 મિનિટ સુધી બ્લેક આઉટ અનેમોકડ્રિલ કરવાનું જાહેર કરાયું હતું.

ભારત સરકારના આદેશ અન્વયે દેશના સરહદી રાજ્યોમાં મોકડ્રિલ યોજવા જાહેરાત કરવામાં આવી હતી. ઓપરેશન સિદૂરની સફળતા બાદ દુશ્મન દેશ તરફથી થતા કોઈપણ સંભવિત હુમલા સામે ટક્કર ઝીલવા આગોતરી તૈયારીના ભાગરૂપે ગુજરાતના દરેક જિલ્લામાં આજે સાંજે ૫ કલાકે મોકડ્રીલનું આયોજન કરી ઓપરેશન શિલ્ડ મોકડ્રીલ સંદર્ભે મહેસૂલ વિભાગના અધિક મુખ્ય સચિવ ડૉ. જયંતી રવિએ બુધવારે ગુજરાતના તમામ જિલ્લા કલેકટરો સાથે વિડીયો કોન્ફરન્સના માધ્યમથી જિલ્લા વહીવટી તંત્ર દ્વારા મોકડ્રીલ અન્વયે કરવામાં આવેલી તૈયારીઓની વર્ચ્યુઅલ સમીક્ષા કરી હતી.

આ પણ વાંચો :રાજકોટમાં કોરોના ઈઝ બેક?! 6 મહિનાના બાળકનો રિપોર્ટ પોઝિટિવ, 10 દિવસમાં નોંધાયા 12 કેસ

જેમાં ડૉ. જયંતી રવીએ કહ્યું હતું કે, આ કવાયત દરમિયાન નાગરિક સુરક્ષાને લગતી સ્થાનિક પ્રશાસનની સુસજ્જતા, ગઈઈ, ગજ્જુ ભારત સ્કાઉટ એન્ડ ગાઈડ જેવા યુવા વોલીન્ટીયર્સની સેવાઓ લેવાની, દુશ્મનના વિમાની અને મિસાઈલ હુમલા સંદર્ભે એરફોર્સ અને નાગરિક સુરક્ષા કંટ્રોલ રૂમ વચ્ચે હોટલાઈન ઉભી કરવાની, એર રેપિંડ સાયરન કાર્યરત કરવાની, સંપૂર્ણ અંધારપટ કરી નાગરિકો અને તેમની જાનમાલની સુરક્ષા સુનિશ્ચિત કરવા જેવી વિવિધ કાર્યવાહી હાથ ધરવામાં આવશે.

સંભવિત હુમલા બાદ ઇજાગ્રસ્તોને તાત્કાલિક સારવાર માટે મેડિકલ ટીમ અને રકતદાન સંદર્ભે જરૂરી કાર્યવાહી કરવા તેમજ સંભવિત યુદ્ધની પરિસ્થિતિમાં બોર્ડર વિગના હોમ ગાર્ડ્સ, આર્મ્ડ વિગના જવાનોનું તાત્કાલિક ડીપ્લોયમેન્ટ કરવા સંદર્ભે જરુરી એક્શન પ્લાન બનાવવા સંદર્ભે પણ જિલ્લા કલેકટરને જરૂરી સૂચનાઓ આપવામાં આવી હતી.

જો કે, કોઈપણ કારણોસર મોડીરાત્રે રાજ્ય સરકાર દ્વારા મોકડ્રિલ મુલતવી રાખવા સૂચના આપવામાં આવી હતી. રાજ્યના માહિતી વિભાગ દ્વારા વહીવટી કારણોસર ઓપરેશન શિલ્ડ હેઠળ રાજ્યના તમામ જિલ્લામાં આજે યોજાનાર મોકડ્રિલ મુલતવી રાખવામાં આવી હોવાનું અને હવે પછી મોકડ્રિલ અંગે નવી તારીખ જાહેર કરવામાં આવશે તેમ જાહેર કરવામાં આવ્યું હતું.

નોંધનીય છે કે રાજકોટ શહેરમાં માધાપર ગામ તેમજ જામનગર રોડ ઉપર રેલવે લાઈન વિસ્તારમાં મોકડ્રિલ યોજવા નક્કી કરાયું હતું પરંતુ છેલ્લી ઘડીએ મોકડ્રિલ તેમજ બ્લેક આઉટ મુલતવી રાખવામાં આવ્યું છે. હવે પછી મોકડ્રિલ અંગે નવી તારીખ જાહેર કરવામાં આવશે.