રાજકોટમાં કોરોનાની રફ્તાર ચિંતાજનક : જિલ્લા પોલીસવડા, બે મહિનાની બાળકી સહિત 13 કોરોનાગ્રસ્ત

અમદાવાદની જેમ જ રાજકોટ શહેર-જિલ્લામાં કોરોનાએ રફ્તાર પકડી લીધી હોય તેવી રીતે દરરોજ 10થી 12 કેસ મળી રહ્યા છે. દરમિયાન રાજકોટ જિલ્લા પોલીસવડા હિમકરસિંહ ઉપરાંત શાપર વેરાવળમાં બે મહિનાની બાળકી કોરોનાગ્રસ્ત થઈ જતાં આરોગ્ય તંત્રમાં દોડધામ મચી જવા પામી હતી. એકંદરે 24 કલાકમાં શહેર-જિલ્લામાંથી કોરોના 13 કેસ મળ્યા હોવાનું તંત્ર દ્વારા સત્તાવાર રીતે જાહેર કરવામાં આવ્યું હતું.

રાજકોટ શહેરની વાત કરવામાં આવે તો એસપી હિમકરસિંહને તાવ સહિતનાં લક્ષણો જણાતાં તેમણે કોરોના ટેસ્ટ કરાવ્યો હતો જે પોઝિટીવ આવતાં તેઓ હોમ આઈસોલેટ થઈ ગયા હતા અને હાલ તેમની તબિયત સ્થિર હોવાનું જાણવા મળ્યું છે. આ ઉપરાંત ર્વો નં.9માં યુનિવર્સિટી રોડ ઉપર 48 વર્ષીય પુરુષ, વોર્ડ નં.8ના વૈશાલીનગરમાં 30 વર્ષીય મહિલા, વોર્ડ નં.12માં રામધણ સામે 44 વર્ષીય પુરુષ, વોર્ડ નં.8ના નવજ્યોત પાર્કમાં 45 વર્ષીય પુરુષ, વોર્ડ નં.11માં કોકોનટ પાર્ટી પ્લોટ રોડ પર 62 વર્ષીય વૃદ્ધ, વોર્ડ નં.3ના રેલનગરમાં 44 વર્ષીય અને 40 વર્ષીય પુરુષ, વોર્ડ નં.2ના નહેરુનગરમાં 79 વર્ષીય વૃદ્ધ અને વોર્ડ નં.7ના કિસાનપરામાં 26 વર્ષીય પુરુષ કોરોનાગ્રસ્ત થયા હતા. આ આઠ પૈકી કોઈની પણ ટ્રાવેલ હિસ્ટ્રિ ન હોવાનું જાહેર કરવામાં આવ્યું છે. વળી, તમામે વેક્સિનના પણ બેથી ત્રણ ડોઝ લીધેલા છે. આ રીતે શહેરમાં પંદર દિવસની અંદર કોરોનાના કુલ 53 કેસ નોંધાયા છે જેમાંથી 12 સાજા થઈ ગયા છે તો 40 હજુ સારવાર હેઠળ છે.

આ પણ વાંચો : 7મી જૂને જેક્વેલિન ફર્નાન્ડીઝ-સલીમ-સુલેમાન રાજકોટમાં મચાવશે ધમાલ : STPLના ઉદ્ઘાટન સમારોહમાં કરશે પરફોર્મન્સ

જ્યારે રાજકોટ જિલ્લામાં જેતપુરના દેરડીમાંથી 32 વર્ષીય મહિલા, શાપર વેરાવળમાંથી બે મહિનાની માળકી, ગોંડલમાંથી 30 વર્ષીય મહિલા અને કોટડાસાંગાણીમાંથી 26 વર્ષીય યુવતીનો કોરોના રિપોર્ટ પોઝિટીવ આવતાં તેમને હોમ આઈસોલેટ કરવામાં આવ્યાં હતાં.