રાજકોટમાં સિક્યોરિટી પાછળ 39 કરોડનો ખર્ચ:3 વોર્ડમાં ડીઆઈ લાઈન નાખવાનું કામ પેન્ડીંગ
રાજકોટ મહાપાલિકામાં ગુરૂવારે મળેલી સ્ટેન્ડિંગ કમિટીની બેઠકમાં પોતાના હસ્તકની માલ-મિલકતના રક્ષણ માટે સિક્યોરિટી ગાર્ડસ રાખી બે વર્ષના કોન્ટ્રાક્ટ પાછળ 39.84 કરોડનો ખર્ચ થઈ રહ્યો હોય જે અત્યંત વધુ લાગતાં ફરીવાર આ દરખાસ્ત પેન્ડીંગ રાખવામાં આવી છે. આ જ રીતે વોર્ડ નં.7,14 અને 17ના વિસ્તારોમાં 44.95 કરોડના ખર્ચે ડીઆઈ પાઈપલાઈન નાખવાના કામની દરખાસ્ત પણ પેન્ડીંગ રખાઈ હતી.
આ અંગે સ્ટેન્ડિંગ કમિટી ચેરમેન જયમીન ઠાકરે જણાવ્યું કે સિક્યોરિટી ગાર્ડસ રાખવાના કોન્ટ્રાક્ટનો ખર્ચ વધુ પડતો હોવાથી વધુ અભ્યાસાર્થે દરખાસ્ત પેન્ડીંગ રાખવામાં આવી છે. આ ઉપરાંત ત્રણ વોર્ડમાં ડીઆઈ પાઈપલાઈન નાખવાના કામની દરખાસ્ત પણ પેન્ડીંગ રખાઈ છે. આ પાછળનું કારણ તેમણે એવું જણાવ્યું કે આખા શહેરમાં ડીઆઈ લાઈનનું નેટવર્ક કેટલું પથરાઈ ગયું અને કેટલુ બાકી છે તે જાણવા ઉપરાંત અલગ-અલગ વિસ્તારમાં લાઈન નાખવાની જગ્યાએ એક સાથે જ દરેક વિસ્તારમાં આ કામ થઈ શકે તેના માટે દરખાસ્ત પેન્ડીંગ રાખવામાં આવી છે.
જ્યારે સ્ટેન્ડિંગ કમિટીની છેલ્લી ચારેક બેઠકથી ખેંચાતી આવતી વોર્ડ નં.7ના રણછોડનગર શેરી નં.10માં આવેલી મહાપાલિકાની માલિકી માધ્યમિક શાળાનું બિલ્ડિંગ શ્રી સૌરાષ્ટ્ર શિક્ષણ અને સેવા સમાજ ટ્રસ્ટને લીઝ આપવા માટેની દરખાસ્ત આખરે મંજૂર કરવામાં આવી હતી. અત્યાર સુધી આ બિલ્ડિંગ મહિને 251 રૂપિયાના ભાડે અપાતું હતું જેમાં વધારો કરી ભાડું 2500 રૂપિયા નક્કી કરવામાં આવ્યું છે. આ ઉપરાંત મહાપાલિકામાં જુદી-જુદી જગ્યાઓના પગારધોરણમાં સુધારો કરવાની દરખાસ્ત પણ પેન્ડીંગ રખાઈ હતી.
આજી-1 ડેમ પાસે 75 MLDનો ફિલ્ટર પ્લાન્ટ સહિત 210 કરોડના કામને બહાલી
સ્ટેન્ડિંગ કમિટી ચેરમેન જયમીન ઠાકર દ્વારા આજી-1 ડેમ પાસે 75 એમએલડીનો ફિલ્ટર પ્લાન્ટ કે જેના પાછળ 60.48 કરોડનો ખર્ચ થશે તે સહિત 210 કરોડના કામને બહાલી આપવામાં આવી હતી. મહત્ત્વની દરખાસ્તોમાં માધાપર ખાતે ડોગ ફ્રેન્ડલી સેન્ટર, ઘંટેશ્વર વિસ્તારમાં ડીઆઈ પાઈપલાઈન, વોર્ડ નં.11માં કણકોટ રોડ અને ન્યારી ડેમને જોડતો 24 મીટરના રસ્તાનું ડેવલપિંગ સહિતના કામનો સમાવેશ થાય છે.
