DRSમાં જ લોચો ?

વિમેન્સ પ્રિમીયર લીગની બેંગ્લોર-યુપી વચ્ચેની મેચમાં મોટો વિવાદ

મહિલા પ્રિમીયર લીગ-૨૦૨૪નો ૧૧મો મુકાબલો વિવાદિત રહ્યો છે. આ વિવાદ બીજા કોઈ કારણથી નહીં બલ્કે જાણીતી ડિસીઝન રિવ્યુ સિસ્ટમ (ડીઆરએસ)ને કારણે થયો છે. રોયલ ચેલેન્જર્સ બેંગ્લોરની ટીમે યુપી વોરિયર્સને ૨૩ રને હરાવ્યું હતું. યૂપી વોરિયર્સની ઓપનર ચમારી અટ્ટાપટ્ટુને ફિલ્ડ અમ્પાયર દ્વારા નોટઆઉટ અપાયા બાદ ડીઆરએસે તેને આઉટ આપી હતી. જો કે જે રિવ્યુ સામે આવ્યો તેના કારણે વિવાદ થયો છે અને આ અંગેનો વીડિયો પણ સોશ્યલ મીડિયા પર જોરદાર વાયરલ થઈ રહ્યો છે.
યુપીની બેટિંગમાં સાતમી ઓવર લઈને જ્યોર્જિયા વેયરહૈમ આવી હતી. તેની બોલિંગમાં સ્વિપ શોટ રમવાના ચક્કરમાં અટ્ટાપટ્ટુ બોલને મીસ કરી ગઈ અને દડો તેના પગ પર લાગ્યો હતો. આ પછી આરસીબીના ખેલાડીઓએ જોરદાર અપીલ કરી હતી પરંતુ ફિલ્ડ અમ્પાયરે તેને નોટઆઉટ આપી હતી. ત્યારબાદ આરસીબીની કેપ્ટન સ્મૃતિ મંધાનાએ ડીઆરએસનો ઉપયોગ કર્યો હતો. બોલ ટે્રકિંગમાં દેખાયું કે દડો બેટ સાથે ટકરાયો ન્હોતો જે પછી એલબીડબલ્યુ ચેક કરાયું હતું. અસલ વીડિયો જોવાથી લાગતું હતું કે દડો સ્પીન થશે અને ડાબી બાજુ ચાલ્યો જશે અને સ્ટમ્પને મીસ કરી દેશે પરંતુ હૉકઆઈએ તેને ગૂગલીને જેમ બીજી તરફ વળતો હોય તેવું બતાવ્યું હતું. આ પછી અમ્પાયરે અટ્ટાપટ્ટુને આઉટ આપી હતી. આ જોઈને ટીમની કેપ્ટન એલિસા હિલી પણ આશ્ચર્યચકિત થઈ ગઈ હતી. અત્યારે આ મુદ્દે દિગ્ગજ ક્રિકેટરો સવાલ ઉઠાવી રહ્યા છે.