જમાઈ પર સાસુ-સસરા અને સાળાનો છરી-પાઇપ વડે હિચકારો હુમલો
દસ માસથી માધાપર રહેતા માવતરને ત્યાં પત્ની જતી રહી હતી : દીકરીને મળવા ગયો ત્યારે બોલાચાલી કરી યુવકને માર માર્યો
શહેરમાં પીડીએમ કોલેજ પાછળ રહેતો યુવક માધાપર માવતરને ત્યાં રહેલી પત્ની પાસે ગયો હતો.ત્યારે તેણીના સાસુ-સસરા અને સાળાએ બોલાચાલી કરીને છરી-પાઇપ વડે હિચકારો હુમલો કરી માર મારતા યુવકને લોહીલુહાણ હાલતમાં સારવાર માટે હોસ્પિટલમાં ખસેડવામાં આવ્યો હતો.અને આ મામલે ગાંધીગ્રામ પોલીસે ગુનો નોંધ્યો છે.
વિગત મુજબ પીડીએમ કોલેજ પાછળ રહેતાં અભય રમેશચંદ્ર ત્રિવેદી (ઉ.વ.૩૦)એ નોંધાવેલી ફરિયાદમાં આરોપીમાં માધાપર ગામ ઇશ્વરીયા મેઇન રોડ પર સિંધોઇનગર ચિત્રકુટ મકાન ખાતે રહેતાં તેના સસરા રાજેશભાઇ જોષી, સાસુ હેતલબેન જોષી અને સાળા શુભમ જોષીનું નામ આપતા જણાવ્યું હતું કે, ચારેક વર્ષ પહેલા પ્રિયંકા રાજેશભાઈ જોષી સાથે લગ્ન કર્યા હતા.જેનાથી સંતાનમાં એક દિકરી છે. છેલ્લા દસેક મહિનાથી પત્નિ પ્રિયંકા તેનારી અલગ માવતરના ઘરે રહેતી હતી.અને દિકરી વેદીકા પણ તેની સાથે જ રહે છે. સસરાના નક્કી કર્યા પ્રમાણે અભયને દીકરી વેદિકાને દર બુધવારે રાતે નવ વાગ્યાથી સાડાનવ વાગ્યા સુધી મળવા દેવામાં આવતું હતું.યુવક ગત બુધવારે ગયો ત્યારે તેને ફોન ન ઉપાડવા બાબતે સસરાને પૂછતાં જ તેઓ ઉશ્કેરાયા હતા.અને સસરાએ બોલાચાલી કરી હતી.બાદમાં મામલો બીચકતા યુવક પર સાસુ-સસરા અને સાળાએ છરી અને પાઇપ વડે હિચકારો હુમલો કર્યો હતો.તેને ગંભીર ઇજા પહોંચતા સારવાર માટે હોસ્પિટલમાં ખસેડાયો હતો.જ્યારે આ મામલે ગાંધીગ્રામ પોલીસે ગુનો નોંધી આરોપીઓની અટકાયત કરવા તજવીજ કરી છે.
