રાજકોટ મહાપાલિકા એક સ્પીડબ્રેકર બનાવવામાં વામણી :છેક સરકાર સુધી જવું પડ્યું, મુખ્ય સચિવને કરી ફરિયાદ

રાજકોટ મહાપાલિકા દ્વારા શહેરમાં અત્યારે જરૂર નથી ત્યાં મસમોટા સ્પીડબે્રકર ખડકીને લોકોને રીતસરની `પીડા’ આપવામાં આવી રહી છે અને ખરેખર જ્યાં જરૂર છે ત્યાં લોકો માંગણી કરી કરીને થાક્યા છતાં બનાવી આપવામાં આવતું ન હોવાનો મામલો સામે આવ્યો છે. એકંદરે તંત્ર એક સ્પીડબ્રેકર બનાવવામાં વામણું પૂરવાર થતાં લોકોએ સરકારના દ્વાર ખખડાવવા પડ્યા હતા અને ત્યાંથી આદેશ છૂટતાં જ તુરંત જ સ્પીડબ્રેકર બનાવવા માટે દોડધામ શરૂ કરી દેવામાં આવી હતી.

શહેરની ભાગોળે મોટામવા વિસ્તાર નજીક રંગોલી પાર્ક સોસાયટી આવેલી છે જ્યાંથી બસ-ટ્રક સહિતના મોટા વાહન વારંવાર પસાર થઈ રહ્યા હોય અહીં સ્પીડબ્રેકર ન હોવાને કારણે ઘણીવાર અકસ્માત થઈ રહ્યા હોય અહીં રહેતા લોકો દ્વારા વોર્ડ નં.10ના કોર્પોરેટરોને વારંવાર રજૂઆત કરાઈ હતી છતાં કોઈ જ કાર્યવાહી નહીં થતાં મહાપાલિકાના અધિકારીઓ સુધી રજૂઆત પહોંચાડવામાં આવી હતી.

આ પણ વાંચો :આજથી દક્ષિણ ગુજરાતમાં તો આવતી કાલથી સૌરાષ્ટ્રમાં મેઘરાજાની સટાસટી : આ જિલ્લાઓમાં હળવાથી ભારે વરસાદની આગાહી

આમ છતાં તંત્રના પેટનું પાણી ન હલતાં આખરે ગાંધીનગર ખાતે મુખ્ય સચિવને રજૂઆત કરવામાં આવતાં ત્યાંથી આ દિશામાં તુરંત કાર્યવાહી કરવાનો આદેશ છૂટતાં જ સ્પીડબ્રેકર બનાવવા માટે કાર્યવાહી શરૂ કરવામાં આવ્યાનું જાણવા મળી રહ્યું છે.