જૂનાગઢમાં યુવતી પર દુષ્કર્મ બાદ પિતા-પુત્રએ ધર્મપરિવર્તન કરાવ્યું: ઘરમાંથી બુરખો અને કલમા પુસ્તક મળતાં SIT રચાઈ

જૂનાગઢ શહેરમાં બીમારી અને લાચારીનો લાભ ઉઠાવીને એક અસહાય યુવતીનું ધર્મપરિવર્તન કરાવવાનું અને તેની પર દુષ્કર્મ આચરવાનું અત્યંત ગંભીર કાવતરું સામે આવતાં ભારે ચકચાર મચી ગઈ છે. દરગાહમાં આસ્થા સાથે દર્શને જતી યુવતી સાથે મુંજાવરના પુત્રએ બળજબરીથી શરીર સંબંધ બાંધી ધાકધમકીઓ આપી હતી, જ્યારે ખુદ મુંજાવર પિતાએ ધાર્મિક લાલચ અને પ્રલોભનો આપી યુવતીનું ધર્માંતરણ કરાવી નાખ્યું હોવાનો ચોંકાવનારો પર્દાફાશ થયો છે. યુવતીના વિગતવાર નિવેદન બાદ પોલીસે કેસમાં ગુજરાત ધર્મ સ્વતંત્ર અધિનિયમની કલમો ઉમેરીને તપાસનો વ્યાપ વધાર્યો છે.

બીમારીની લાચારીનો લાભ લઈ પુત્રએ આચર્યું વારંવાર દુષ્કર્મ

જૂનાગઢમાં એકલી રહેતી યુવતી અવારનવાર શારીરિક બીમારીઓથી પીડાતી હોવાના કારણે સંઘાડીયા બજારમાં આવેલી મોનીસા પીરની દરગાહ ખાતે જતી હતી. આ પરિસ્થિતિનો ગેરલાભ લઈને દરગાહના મુંજાવરના પુત્રએ યુવતી સાથે નિકટતા કેળવી લગ્ન કરવા દબાણ કર્યું હતું. યુવતીએ લગ્ન કરવાનો ઈનકાર કરતાં યુવકે તેના પર હિંસક હુમલો કરી, છરી બતાવી જાનથી મારી નાખવાની ધમકી આપીને દુષ્કર્મ આચર્યું હતું. આરોપીએ યુવતીના અંગત ફોટો અને વીડિયો ઉતારી લઈને સગાં-સંબંધીઓમાં બદનામ કરવાની ધમકીઓ આપી અવારનવાર શારીરિક શોષણ કર્યું હતું. આ મામલે યુવતીએ જ્યારે યુવકના પિતાને રાવ કરી ત્યારે તેણે પણ મદદ કરવાને બદલે ધમકીઓ આપી હતી, જેથી આખરે ભોગ બનનારે ‘એ’ ડિવિઝન પોલીસ મથકે ફરિયાદ નોંધાવી હતી.

‘બીમારી મટી જશે’ કહી મુંજાવર પિતાએ કરાવ્યું ધર્માંતરણ

પોલીસ દ્વારા યુવતીનું વિસ્તૃત નિવેદન લેવામાં આવતાં કેસમાં વધુ એક ભયાનક સત્ય સામે આવ્યું હતું. દરગાહના મુંજાવરે યુવતીને માનસિક રીતે પ્રભાવિત કરીને જણાવ્યું હતું કે, ‘તું મારી દીકરી સમાન છે, જો તું ઈસ્લામ અંગીકાર કરી લઈશ તો તારી તમામ બીમારીઓ અને દુઃખો દૂર થઈ જશે.’ આમ ખોટા પ્રલોભનો અને અંધશ્રદ્ધાનો સહારો લઈને યુવતીનું ધર્મપરિવર્તન કરાવી દેવામાં આવ્યું હતું. આરોપી પિતા-પુત્ર યુવતીને ઉનાવા, ઉના, જાંબુર અને અજમેર સહિતની વિવિધ દરગાહોમાં લઈ ગયા હતા અને ત્યાં સલામી કરાવી ધાર્મિક વિધિઓ કરાવી હતી, જેના ફોટોગ્રાફ્સ અને વીડિયો પણ પોલીસે કબ્જે કર્યા છે.

આ પણ વાંચો: કાલુપુર રેલવે સ્ટેશન પર 9 દિવસ પાર્સલ સેવા બંધ: દિવાળી-છઠ પૂજાની ભીડને પગલે પશ્ચિમ રેલવેનો મોટો નિર્ણય

પીડિતાના ઘરમાંથી બુરખો, કલમા પુસ્તક અને સામગ્રી જપ્ત

તપાસ દરમિયાન પોલીસ ટીમે પીડિતાના રહેણાંક સ્થળની તલાશી લેતાં ત્યાંથી ઈસ્લામ ધર્મના પાલન માટે અપાયેલી સામગ્રી મળી આવી હતી. જેમાં નમાજ પઢવા માટે અપાયેલી કલમાની બુક, બુરખો, નમાજ માટેનું ખાસ આસન, દરગાહના ફોટોગ્રાફ્સ અને લીલા રંગના પ્રતીકાત્મક ઘોડા સહિતની ધાર્મિક ચીજવસ્તુઓ મળી આવતાં પોલીસે તેને મુદ્દામાલ તરીકે સીઝ કરી લીધી છે. ઉલ્લેખનીય છે કે અગાઉ કોડીનાર પંથકની સગીરાઓને પણ ઉનાવા દરગાહ ખાતે લઈ જઈ ધર્માંતરણ કરાવવાનો મામલો સામે આવી ચૂક્યો છે, ત્યારે આ કેસમાં પણ ઉનાવા દરગાહનું નામ બહાર આવતાં તંત્ર સતર્ક બન્યું છે.

ધર્મ સ્વતંત્ર અધિનિયમની કલમોનો ઉમેરો અને ‘SIT’ની રચના

આ સમગ્ર કાવતરાની ગંભીરતાને જોતાં જૂનાગઢ પોલીસે દરગાહના મુંજાવર અને તેના પુત્ર વિરુદ્ધ ‘ગુજરાત ધર્મ સ્વતંત્ર અધિનિયમ-2003’ ની કડક જોગવાઈઓ ઉમેરવા અદાલતમાં રિપોર્ટ રજૂ કર્યો હતો, જેને કોર્ટે માન્ય રાખ્યો છે. ડીવાયએસપીના સીધા સુપરવિઝન હેઠળ એક સ્પેશિયલ ઈન્વેસ્ટિગેશન ટીમ (SIT) ની રચના કરવામાં આવી છે. આ ટીમ દ્વારા ડિજિટલ પુરાવાઓ, મુસાફરીના રેકોર્ડ્સ તેમજ આ નેટવર્કમાં અન્ય કોઈ ઈસમો સંડોવાયેલા છે કે કેમ અને અન્ય કોઈ યુવતીઓ આ જ રીતે ભોગ બની છે કે કેમ તેની ઊંડાણપૂર્વક તપાસ શરૂ કરવામાં આવી છે.

જૂનાગઢ ધર્મપરિવર્તન અને દુષ્કર્મ કેસની મુખ્ય વિગતો

આસ્થાના ઓથા હેઠળ શારીરિક શોષણ અને ત્યારબાદ ધાકધમકી તથા પ્રલોભનો આપીને ધર્માંતરણ કરાવવાની આ ગંભીર મોડસ ઓપરેન્ડીએ સુરક્ષા તંત્રને ચોંકાવી દીધું છે. કાયદાકીય જોગવાઈઓ હેઠળ SIT દ્વારા હવે એ દિશામાં તપાસ તેજ કરવામાં આવી છે કે આ માત્ર એકલદોકલ બનાવ હતો કે પછી સુનિયોજિત રીતે ચાલતા કોઈ મોટા નેટવર્કનો ભાગ હતો. આરોપીઓ સામે કડકમાં કડક પુરાવા એકત્ર કરી પીડિતાને ન્યાય અપાવવા પોલીસે કાયદેસરની કાર્યવાહી આગળ ધપાવી છે.