સરધારમાં સરકારી જમીનમાં કોમર્શિયલ કોમ્પ્લેક્સ બની ગયું !તાલુકા સ્વાગતમાં પ્રશ્ન આવતા ભાંડો ફૂટ્યો, અધિકારી ચોંકી ઉઠ્યા

રાજકોટ શહેર અને જિલ્લામાં સરકારી જમીનને વડીલો પાર્જીત મિલ્કત સમજી જમીન કૌભાંડિયા તત્વો દ્વારા સૂચિત સોસાયટી, રાવળાહક્ક, લેખના નામે હડપ કરી રહ્યા છે ત્યારે તાજેતરમાં કોઠારીયા, ઘંટેશ્વર, અમરગઢ ભીચરી અને મહીકા ગામે સરકારી જમીન હડપ કરવાના કારસા સામે આવ્યા બાદ બુધવારે રાજકોટ તાલુકાના સરધાર ગામે વધુ એક કિસ્સો સામે આવ્યો છે જેમાં જમીન કૌભાંડી તત્વોએ સરકારી જમીન ઉપર કોમર્શિયલ કોમ્પ્લેક્સ ખડકી દીધુ હોવા છતાં મામલતદારને જાણ સુધા ન હોવાનું સામે આવ્યું છે. બીજી તરફ આ ગંભીર બાબત તાલુકા સ્વાગતમાં આવતા ઉચ્ચ અધિકારીઓ પણ ચોકી ઉઠ્યા હોવાનું જાણવા મળે છે.

આ પણ વાંચો : રાજકોટની આર.કે.પ્રાઈમ-2 બિલ્ડીંગ ગેરકાયદેસર ! ખરીદનારા અસામીઓએ ક્લેક્ટરમાં શરતભંગ અંગે કરી ફરિયાદ

પ્રાપ્ત વિગતો મુજબ રાજકોટ શહેર-જિલ્લામાં સરકારી જમીન ઉપર બેફામપણે દબાણ ઉભા થવાની સાથે જ ખાસ કરીને રાજકોટ તાલુકામાં જમીન કૌભાંડી તત્વો દ્વારા સરકારી જમીન હડપ કરવા માટે સૂચિત સોસાયટી બનાવવાના બે કિસ્સા સામે આવ્યા છે જેમાં અમરગઢ ભીચરી અને મહિકામાં તપાસનો ધમધમાટ ચાલુ છે તેવા સમયે જ રાજકોટ તાલુકાના સરધાર ગામમાં જમીન કૌભાંડી તત્વો દ્વારા સરકારી જમીન ઉપર ગેરકાયદેસર રીતે કોમર્શિયલ કોમ્પ્લેક્સ ખડકી દેવામાં આવ્યું હોય જાગૃત નાગરિક દ્વારા ગંભીર બાબતે રજુઆત કરવા છતાં પગલાં લેવામાં ન આવતા મુખ્યમંત્રી ઓનલાઇન ફરિયાદ નિવારણ તાલુકા સ્વાગત કાર્યક્રમમાં પ્રશ્ન રજૂ કરવામાં આવતા ઉચ્ચ અધિકારી ચોકી ઉઠ્યા હોવાનું અને આ ગેરકાયદેસર દબાણ તાત્કાલિક તોડી પાડવા સૂચના અપાઈ હોવાનું સૂત્રો જણાવી રહ્યા છે. નોંધનીય છે કે, આ કિસ્સામાં સરકારી જમીનમાં ઉભા થયેલ કોમ્પ્લેક્સમાં વીજ જોડાણ આપવા મામલે મામલતદાર દ્વારા દોષનો ટોપલો પીજીવીસીએલ ઉપર નાખવા પ્રયાસકરાયો હોવાનું પણ જાણવા મળે છે.

ઉચ્ચ અધિકારીઓ તાલુકા સ્વાગતમાં હાજર રહેતા જ પ્રજાના પ્રશ્નોનો ફટાફટ નિકાલ

રાજકોટના નવનિયુકત જિલ્લા કલેકટર ડો.ઓમપ્રકાશ દ્વારા પ્રજાના પ્રશ્નોનો ફટાફટ ઉકેલ આવે તે માટે મુખ્યમંત્રી ઓનલાઇન ફરિયાદ નિવારણ એટલે કે તાલુકા સ્વાગત કાર્યક્રમમાં ઉચ્ચ અધિકારીઓને ફરજીયાત હાજર રહેવા આદેશ કરી પોતે પણ તાલુકા સ્વાગતમાં હાજર રહેશે તેવી જાહેરાત કરી બુધવારે જિલ્લા કલેકટર કોટડા સાંગાણી ખાતે હાજર રહ્યા હતા. જયારે અધિક નિવાસી કલેકટર પૂર્વ મામલતદાર કચેરીમાં સ્વાગતમાં હાજર રહેતા જ રગડધગડ ચાલતા સ્વાગત કાર્યક્રમ ખરેખર સિરિયસ બન્યો હતો અને પ્રજાના પ્રશ્નનો ફટાફટ ઉકેલ આવે તે દિશામાં કાર્યવાહી થઇ હતી.