વડાપ્રધાન તરીકે નરેન્દ્ર મોદીના 11 વર્ષ પૂર્ણ : મોદી શાસનમાં ગરીબ કેન્દ્રમાં રહ્યા, વિરાસત સાથે વિકાસનું સૂત્ર સાર્થક
વડાપ્રધાન તરીકે નરેન્દ્રભાઈ મોદીના 11 વર્ષ પૂર્ણ થતાં રાજકોટ સહિત સમગ્ર દેશમાં તેમના સુ-કાર્યોના લેખાંજોખાં ભાજપ દ્વારા કરવામાં આવી રહ્યા છે તે અંતર્ગત રાજકોટ શહેર ભાજપ દ્વારા આયોજિત પત્રકાર પરિષદમાં સાંસદ પરસોત્તમ રૂપાલા સહિતે જણાવ્યું હતું કે મોદીના શાસનમાં ગરીબ કેન્દ્રમાં રહ્યા છે સાથે સાથે વિરાસત સાથે વિકાસનું સૂત્ર પણ વડાપ્રધાને સાર્થક કરી બતાવ્યું છે.
સાંસદ રૂપાલાએ જણાવ્યું કે વડાપ્રધાન બન્યા બાદ નરેન્દ્રભાઈએ સૌથી પહેલાં ગ્રામ પંચાયતોને મજબૂત કરવાનું કાર્ય કર્યું હતું. ગ્રામ પંચાયત વિકાસનો પાયો છે અને અહીંથી જ તાલુકા પંચાયત, જિલ્લા પંચાયત, નગરપાલિકા, મહાનગરપાલિકા, વિધાનસભા અને લોકસભા સુધીના તબક્કા આવે છે. આ મુદ્દાને ધ્યાનમાં રાખી વડાપ્રધાન દ્વારા પંચાયતના ખાતામાં સીધા પૈસા જમા થાય તેવી વ્યવસ્થા કરવામાં આવી હતી. ભાજપના શાસનમાં જ દિલ્હીથી જે રૂપિયો નીકળતો તે પૂરેપૂરો રૂપિયો પંચાયતના ખાતામાં જમા થતો હતો. આ ઉપરાંત આયુષ્યમાન કાર્ડ થકી અત્યારે 50 કરોડ પરિવારોને વિનામૂલ્યે સારવારનું કવચ પૂરું પાડવાનો શ્રેય પણ વડાપ્રધાનને જાય છે.
વડાપ્રધાન તરીકે તેમણે જીએસટીનું અમલીકરણ કરાવ્યું હતું ત્યારે સૌને જાણીને આશ્ચર્ય થશે કે ભારત એકમાત્ર એવો દેશ છે જ્યાં જીએસટીના તમામ નિર્ણય બહુમતિથી નહીં બલ્કે સર્વાનુમત્તે લેવામાં આવે છે. આ ઉપરાંત જનધન યોજના થકી 50 કરોડ બેન્ક એકાઉન્ટ ઝીરો બેલેન્સથી ખોલાવવામાં આવ્યા જેમાં અત્યારે બે લાખ કરોડ રૂપિયા જમા છે. રાજકોટ હોય કે દેશનું કોઈ પણ રાજ્ય કે શહેર હોય ત્યાંના રસ્તા, હાઈ-વે, બ્રિજ ટનલ સહિતનું ઈન્ફ્રાસ્ટ્રક્ચર વિશ્વકક્ષાનું બનાવવામાં આવ્યું છે.
આ પણ વાંચો : રાજ્યના 241 PSIને PIના પ્રમોશન તો મળ્યા પણ હાલત જૈસે થે, પોસ્ટિંગની જોવાતી રાહ
આ પત્રકાર પરિષદ દરમિયાન ભારત દ્વારા પાકિસ્તાન પર કરવામાં આવેલા `ઓપરેશન સિંદૂર’ને પણ બિરદાવાયું હતું. આ પત્રકાર પરિષદમાં પ્રદેશ ઉપાધ્યક્ષ ડૉ.ભરત બોઘરા, સાંસદ પરસોત્તમ રૂપાલા, શહેર ભાજપ પ્રમુખ ડૉ.માધવ દવે, ધારાસભ્ય ડૉ.દર્શિતાબેન શાહ, રમેશભાઈ ટીલાળા, મહેન્દ્ર પાડલિયા, જીતુભાઈ સોમાણી, મેયર નયનાબેન પેઢડિયા, જિલ્લા પંચાયત પ્રમુખ પ્રવિણાબેન રંગાણી, ભાજપના સૌરાષ્ટ્ર ઝોન પ્રવક્તા રાજુ ધ્રુવ, મહામંત્રી અશ્વિન મોલિયા, વિરેન્દ્રસિંહ ઝાલા સહિતના ઉપસ્થિત રહ્યા હતા.
