રાજકોટ મહાપાલિકાનો ગજબ ‘ખેલ’ : 31 વર્ષ પહેલાં જમીન આપી, હવે કહ્યું, ખાલી કરો !

રાજકોટ મહાપાલિકા દ્વારા આજથી 31 વર્ષ પહેલાં એટલે કે 4-3-1994ના વોર્ડ નં.14ના લલૂડી વોંકળી વિસ્તારમાં રહેતાં લોકોને 25 ચોરસમીટરના પ્લોટની ફાળવણી સ્ટેન્ડિંગ કમિટી સમક્ષ ઠરાવ કર્યા બાદ કરવામાં આવી હતી. જો કે હવે મહાપાલિકા દ્વારા હવે આ જગ્યા ખાલી કરવા માટે દબાણ કરવામાં આવી રહ્યાનું અને જો જગ્યા નહીં ખાલી કરાય તો ડિમોલિશન કરી નાખવાની ધમકી આપવામાં આવી રહ્યાના આક્ષેપ સાથે મેયર સહિતનાને રજૂઆત કરવા માટે લોકોનું ટોળું ધસી આવ્યું હતું.

કુંદનબેન ગોસ્વામીએ કરેલી રજૂઆતમાં જણાવ્યું કે વોર્ડ નં.14માં ટીપી સ્કીમ નં.6નો અંતિમ ખંડ-160નો સબપ્લોટ નં.35 કે જે લલૂડી વોંકળી વિસ્તારમાં આવ્યો છે તેની ફાળવણી જરૂરી ફી વસૂલ કરીને 1994માં કરવામાં આવી હતી. જો કે છેલ્લે ત્રણેક વર્ષથી મહાપાલિકાની અલગ-અલગ બ્રાન્ચ દ્વારા પોલીસ પ્રોટેક્શન લઈને રજાના દિવસોમાં પણ વિવિધ પ્રકારની સંમતિ લેવા, આધાર-પૂરાવા રજૂઆ કરવા અને વિસ્તાર ખાલી કરીને મહાપાલિકાની આવાસ યોજનામાં ચાલ્યા જવાની ફરજ પાડવામાં આવી રહી છે.

આ પણ વાંચો : રાજકોટનો લોકમેળો ચકડોળે ચડયો : SOPમાં છૂટછાટ નહીં મળે તો ક્યાંય મેળા નહીં યોજાય તેવી રાઇડ્સ સંચાલકોની ચીમકી

આ પ્રકારની કાર્યવાહીથી થોડા દિવસ પહેલાં આઘાતમાં ગરકાવ થયેલા મહિલાનું મૃત્યુ પણ નિપજ્યું હતું.એવો પણ આક્ષેપ કરાયો હતો કે તંત્ર દ્વારા જો જગ્યા ખાલી નહીં થાય તો ડિમોલિશન કરી નાખવાની ધમકી પણ અપાઈ રહી છે.