આતંકવાદીઓના અંતિમ સંસ્કારમાં પાકિસ્તાની અધિકારીઓ ઉપસ્થિત

ઓપરેશન સિંદૂર દરમિયાન ભારતે પાકિસ્તાનના વિવિધ આતંકવાદી વડામથકો નેસ્તનાબુદ કર્યા તે ઓપરેશનમાં
માર્યા ગયેલા આતંકવાદીના અંતિમ સંસ્કારમાં ઉપસ્થિત રહેલા પાકિસ્તાની સેના, પોલીસ અને અન્ય ઉચ્ચ અધિકારીઓની તસવીરો જાહેર કરી ભારતે આતંકવાદી સંગઠનો અને પાકિસ્તાન સરકારના ગઠબંધનનો સમગ્ર વિશ્વ સમક્ષ પર્દાફાશ કરી દીધો હતો.
ઓપરેશન સિંદૂર હેઠળ, ભારતીય સશસ્ત્ર દળોએ નવ આતંકવાદી સ્થળોને નિશાન બનાવ્યા હતા, જેમાં મુરીદકેમાં લશ્કર-એ-તૈયબાનું મરકઝ તૈબા, બહાવલપુરમાં જૈશ-એ-મોહમ્મદ (JeM)નું મરકઝ સુભાન અલ્લાહ અને સિયાલકોટમાં હિઝબુલ મુજાહિદ્દીનની મહમૂના જોયા ફેસિલિટીનો સમાવેશ થાય છે.

ભારતીય અધિકારીઓના જણાવ્યા અનુસાર, મુરીદકેમાં માર્યા ગયેલા આતંકવાદીઓના અંતિમ સંસ્કારનું નેતૃત્વ અબ્દુલ રૌફે કર્યું હતું, જે LeTનો કમાન્ડર છે અને અમેરિકાએ તેને વૈશ્વિક આતંકવાદી જાહેર કર્યો છે.

બાદમાં, પાકિસ્તાની સેના અને આતંકવાદીઓ વચ્ચેના સંબંધોને ઉજાગર કરતા, અધિકારીઓએ એક તસવીર જાહેર કરી હતી જેમાં લેફ્ટનન્ટ જનરલ ફૈયાઝ હુસૈન શાહ, મેજર જનરલ રાઓ ઇમરાન સરતાજ અને બ્રિગેડિયર મોહદ ફુર્કાન શબ્બીર અંતિમ સંસ્કારમાં હાજર હતા.તસવીરમાં એક વરિષ્ઠ પાકિસ્તાની પોલીસ અધિકારી ઉસ્માન અનવર અને રાજકારણી મલિક સોહૈબ અહમદ પણ નમાઝ અદા કરતા જોવા મળ્યા હતા. અંતિમ સંસ્કાર પૂર્ણ રાજ્ય સન્માન સાથે કરવામાં આવ્યો હતો, જેમાં આતંકવાદીઓના તાબૂતોને પાકિસ્તાનના રાષ્ટ્રધ્વજમાં લપેટવામાં આવ્યા હતા.ઉલ્લેખનીય છે કે જમ્મુ અને કાશ્મીરના પહલગામમાં થયેલા ઘાતક હુમલા બાદ શરૂ કરાયેલા ઓપરેશન સિંદૂરમાં 100થી વધુ આતંકવાદીઓ માર્યા ગયા હતા.