- 1.79 લાખ ઇ મેમો સામે માત્ર 40 હજાર વાહન ચાલકોએ ચલાનની ભરપાઈ કરી : જુલાઇ માસમાં સૌથી વધુ 27 હજાર ઈ-ચલાન વાહન ચાલકોને ફટકારવામાં આવ્યા : વર્ષ 2022માં 50% જેટલા ચલાન ભરી દેવામાં આવ્યા’તા
વોઇસ ઓફ ડે રાજકોટ
ટ્રાફિક નિયમોનું ઉલંઘન કરતા વાહનચાલકોને દંડ ફટકારવા ગુજરાત પોલીસે રસ્તાઓ પર સીસીટીવી લગાવી, ઈ-ચલાન મોકલવાનું શરુ કર્યું હતું. પરંતુ આ યોજનાનો ફિયાસ્કો થઇ રહ્યો હોય એવું જણાઈ રહ્યું છે. અને રાજકોટિયન્સ ઈ-ચલાન ભરવાનું નામ જ ન લેતા હોય તેવું ટ્રાફિક પોલીસના આંકડાકીય માહિતી પરથી લાગી રહ્યું છે.વર્ષ 2024માં આઠ માસમાં રાજકોટમાં ટ્રાફિકના ઉલ્લંઘન માટે કુલ 16.42 કરોડનો ઈ-ચલાન મારફત વાહન ચાલકોને દંડ ફટકારવામાં આવ્યો છે.પરંતુ તેની સામે માત્ર 3.51 કરોડનો જ દંડ ભરવામાં આવ્યો છે.અને 12.91 કરડોનું ઈ-ચલાન ભરવાનું બાકી બોલે છે.
શહેર ટ્રાફિક પોલીસ દ્વારા આપવામાં આવેલી માહિતી મુજબ છેલ્લા આઠ માસમાં કુલ.1,79,277 ઇ-ચલાન ઇશ્યૂ કરવામાં આવ્યા હતા.તેની સામે માત્ર 22.68% એટલે કે 40,668 જ રાજકોટના લોકો દ્વારા ઇ-ચલાનની ભરપાઈ કરવામાં આવી હતી.અને હજુ સુધી 1,38,609 ઇ-ચલાન ભરવાના બાકી બોલે છે. જેની ઉઘરાણી ટુંક સમયમાં જ ટ્રાફિક પોલીસ દ્વારા કરવામાં આવવાની છે.
ઉલ્લેખનીય છે કે, વર્ષ 2022માં ટ્રાફિક પોલીસ દ્વારા 1,93,090 ઈ-ચલાન ફટકારવામાં આવ્યા હતા.જેમાં રાજકોટના લોકોએ 56.49 ટકા જેટલા ચલાનની ભરપાઈ કરી દીધી હતી.પરંતુ 2022માં વધુ ચલાનની ભરપાઈ કર્યા બાદ વર્ષ 2023માં માત્ર 20.15% જેટલા જ ચલાનની ભરપાઈ કરી હતી.અને આ ચાલુ વર્ષે પર 22.68 % જેટલા ચલાન ભર્યા છે.અને 12.91 કરોડનું ઈ-ચલાન ભરવાનું બાકી છે.જેથી વહેલી તકે આ ચલાન ભરી દેવા લોકોને ટ્રાફિક પોલીસે અપીલ કરી છે.
કયા મહિનામાં કેટલા ઈ-ચલાન ઇશ્યૂ થયા
- સાયબર ફ્રોડ વધતાં લોકો ઓનલાઈન દંડ ભરતા અચકાય છે : જે.બી.ગઢવી (ટ્રાફિક ACP)
આ બાબતે ટ્રાફિક પોલીસના એસીપી જે.બી.ગઢવીએ ‘વોઇસ ઓફ ડે’ સાથેની વાતચીતમાં જણાવ્યું હતું કે, સાયબર ફ્રોડમાં વધારો એ એક કારણ છે કે લોકો ઓનલાઈન પેનલ્ટી ચૂકવવામાં અચકાય છે.લોકોને સાયબર ફ્રોડનો શિકાર બનાવવા ગઠિયાઓ તેમના નંબર પર ખોટી લીંક મોકલીને મેસજ કરતાં હોય છે.અને લોકો જો ખોટી લિંક પર ક્લિક કરે તો તેનું એકાઉન્ટ સાફ થઈ જવાની પણ ભીતિ રહે છે.જેના કારણે આ રીતે દંડની ભરપાઈ કરવા અવગણના કરે છે. જેથી લોકોએ www.parivahan.gov.in પર જઈને સરળતાથી ઈ-ચલાન ભરી શકે છે.જ્યાં કોઈ વ્યક્તિ વાહનના નંબર જેવી વિગતો દાખલ કરી શકે છે, અને જાણી શકે છે કે ઈ-ચલાન ખરેખર વાહન માલિકના નામે જનરેટ કરવામાં આવ્યું છે કે કેમ.
વર્ષ 2022-23માં ઈ-ચલાનથી 35,91,40,050નો ટ્રાફિક પોલીસે દંડ ફટકાર્યો
શહેરમાં ટ્રાફિકના નિયમોનો ભંગ કરતાં વાહન ચાલકોને કાયદાનું પાલન કરાવવા માટે મેઇન ચોક અને સિગ્નલ પર લગાવવામાં આવેલા સીસીટવી કેમેરાઓ મારફત ઇ-ચાલન ફટકારવામાં આવે છે.જો તમે સિગ્નલ તોડી કે રોંગ સાઈડમાં વાહન ચલાવો તો સીસીટીવીમાં તમારો ફોટો આવી જાય છે.અને ઇ-ચલાન સીધું તમારા એડ્રેસ પર મોકલી દેવામાં આવે છે.ત્યારે રાજકોટ ટ્રાફિક પોલીસ દ્વારા ગત વર્ષ 2022 અને 23માં 35.91 કરોડનો ઇ-ચલાન મારફત દંડ ફટકારવામાં આવ્યો હતો.પરંતુ તેની સામે 12.50 કરોડના દંડની જ ભરપાઈ વાહન ચાલકો દ્વારા કરવામાં આવી છે.