દેશમાં કેવી છે ઉત્પાદનની રફતાર ? શું આવ્યો અહેવાલ ? વાંચો
દેશમાં અર્થતંત્ર સારી રીતે ચાલી રહ્યું છે તેમ સરકાર કહે છે પણ વચમાં થોડો બ્રેક આવી જાય છે. ઉત્પાદન ક્ષેત્રની વૃદ્ધિ ઓગસ્ટમાં ધીમી પડી હતી કારણ કે ઉત્પાદન અને વેચાણ જાન્યુઆરી પછીના સૌથી ધીમા દરે વિસ્તર્યું હતું, જ્યારે સ્પર્ધાત્મક દબાણ અને ફુગાવાની ચિંતાએ વ્યવસાયના વિશ્વાસને અસર કરી હતી. સોમવારે જારી કરાયેલા માસિક સર્વેમાં આ માહિતી આપવામાં આવી હતી. પીએમઆઈ 3 માસના નીચલા સ્તરે રહ્યું હતું.
એચએસબીસી ઈન્ડિયા મેન્યુફેક્ચરિંગ પરચેઝિંગ મેનેજર્સ ઈન્ડેક્સ જુલાઈમાં 58.1ની સરખામણીએ ઓગસ્ટમાં 57.5 પર હતો. પીએમઆઈ હેઠળ, 50 થી ઉપરનો ઇન્ડેક્સ એટલે ઉત્પાદન પ્રવૃત્તિઓમાં વિસ્તરણ, જ્યારે 50 થી નીચેનો આંકડો ઘટાડો સૂચવે છે.
એચએસબીસીના ચીફ ઇકોનોમિસ્ટ (ભારત) પ્રાંજુલ ભંડારીએ જણાવ્યું હતું કે, “ભારતીય ઉત્પાદન ક્ષેત્રે ઓગસ્ટમાં વિસ્તરણ કરવાનું ચાલુ રાખ્યું હતું, જોકે વિસ્તરણની ગતિ થોડી ધીમી હતી. મુખ્ય વલણ નવા કોન્ટ્રાક્ટ અને ઉત્પાદનમાં જોવા મળ્યું હતું, જોકે કેટલાક વેપારીઓએ મંદીનું મુખ્ય કારણ કઠિન સ્પર્ધાને ટાંક્યું હતું. જો કે બિઝનેસમેનો ફુગાવાની ચિંતા અને પ્રતિસ્પર્ધાના દબાણને કારણભૂત ગણે છે.
સર્વે અનુસાર, નાણાકીય વર્ષ 2024-25ના બીજા ક્વાર્ટરમાં નવા બિઝનેસમાં ઝડપથી વૃદ્ધિ થઈ હતી, પરંતુ વિસ્તરણની ગતિ ધીમી પડીને સાત મહિનાની નીચી સપાટીએ પહોંચી ગઈ હતી. એ જ રીતે, નવા નિકાસ ઓર્ડર 2024 કેલેન્ડર વર્ષની શરૂઆતથી સૌથી ધીમી ગતિએ વધ્યા છે. કિંમતોના મોરચે, કોમોડિટી ઉત્પાદકોને ઓગસ્ટ દરમિયાન ઘટેલા ખર્ચના દબાણથી ફાયદો થયો હતો.
