રાજકોટ : હિરાસર એરપોર્ટમાં વાહન સુરક્ષિત નથી !

ટેક્સીને પાર્ક કરવા માટે મહિને ૫૦,૦૦૦ ભાડું ચૂકવવા છતાં કારના કાચ ફૂટ્યા

જ્યાં કાર પાર્ક કરાય છે ત્યાં સીસીટીવીની કોઈ જ વ્યવસ્થા નહીં: કોઈ હરિફનું જ કારસ્તાન હોવાની શક્યતા

મુસાફર પાંચ મિનિટ વધુ વાહન પાર્ક કરે તો દંડ વસૂલતી સિક્યુરિટી કુંભકર્ણ જેવી નિદ્રા માણવામાં વ્યસ્ત

વોઈસ ઓફ ડે, રાજકોટ

રાજકોટના હિરાસર ગામે ઈન્ટરનેશનલ એરપોર્ટ નિર્માણ પામ્યું ત્યારથી લઈ આજ સુધી તેને લઈને વિવાદ ન થયો હોય તો જ નવાઈ પામવા જેવું રહે છે. અત્યારે એરપોર્ટ પર નિયમિત ૨૦૦૦ જેટલા મુસાફરોની અવર-જવર રહે છે. બીજી બાજુ રાજકોટથી એરપોર્ટ ૩૨ કિલોમીટર દૂર હોવાને કારણે મહત્તમ લોકો પોતાની કાર અથવા તો ટેક્સી મારફતે ત્યાં સુધી પહોંચે છે પરંતુ એરપોર્ટમાં હવે વાહન સુરક્ષિત જ ન રહ્યા હોય તેવી એક ઘટના બનવા પામી છે. તાજેતરમાં જ અહીં ટેક્સી પાર્કિંગમાં પડેલી એક કારના કાચ જાણીજોઈને ફોડી નાખવામાં આવ્યા હોવાનો કિસ્સો પ્રકાશમાં આવતાં આવું કારસ્તાન કોણે કર્યું તેને લઈને તપાસ શરૂ કરવામાં આવી હોવાનું જાણવા મળી રહ્યું છે.

એરપોર્ટ ઓથોરિટી દ્વારા `બઝ-વે’ ટેક્સી સર્વિસને અહીં મહિને ૫૦,૦૦૦ રૂપિયા ભાડુ વસૂલીને ૨૦ જેટલી નાની-મોટી કાર પાર્ક કરવા દેવામાં આવી રહી છે. આ કાર મારફતે મુસાફરોને રાજકોટ ઉપરાંત સૌરાષ્ટ્રના અન્ય સ્થળે લેવા-મુકવાનું કામ કરવામાં આવે છે ત્યારે આ પૈકીની એક અર્ટિગા કાર નં.જીજે૧૧સીડી-૯૯૮૫ ઉપર થોડા દિવસ પહેલાં કોઈએ પથ્થરમારો કરીને તેનો પાછળનો કાચ ફોડી નાખ્યો હતો. વળી, આ કાર જ્યાં પાર્ક કરાઈ હતી ત્યાં કોઈ પ્રકારના સીસીટીવી ન હોવાથી આ હરકત કોણે કરી તેનો ખુલાસો થઈ શક્યો નથી.

એવી ચર્ચાએ પણ જોર પકડ્યું છે કે એરપોર્ટ પર ટેક્સી સર્વિસમાં વર્ચસ્વ જમાવવા માટે છેલ્લા ઘણા સમયથી હરિફાઈ ચાલી રહી હોય તેના કારણે જ કોઈ હરિફ દ્વારા કાર ઉપર પથ્થર ફેંકવામાં આવ્યા હોઈ શકે છે. અત્રે મહત્ત્વનું એ પણ છે કે એરપોર્ટમાં વિશાળ સંખ્યામાં સિક્યુરિટી સ્ટાફ ઉપલબ્ધ હોય છે ત્યારે આ ઘટના સાંજે પાંચથી આઠ વાગ્યા વચ્ચે બની હોવા છતાં એક પણ સ્ટાફના ધ્યાન ઉપર તે આવ્યું ન્હોતું. અહીં જો કોઈ મુસાફર પોતાનું વાહન પાંચ મિનિટ વધુ પાર્ક કરી દે તો તુરંત જ દોડી આવીને દંડ વસૂલવામાં પાવરધા સિક્યુરિટી ગાર્ડ આ પ્રકારની ઘટના વખતે ક્યાં ખોવાઈ ગયા હશે તેની તો તેમને જ ખબર હશે !

કંપનીએ ફરિયાદ કરી તો એરપોર્ટે કહ્યું, આગલું બિલ ચૂકવો !

એવી વિગતો પણ જાણવા મળી રહી છે કે બઝ-વે કંપની દ્વારા કારના કાચ ફૂટ્યા હોવાની લેખિત ફરિયાદ એરપોર્ટ ઓથોરિટીને કરવામાં આવી હતી ત્યારે તેની તપાસ કરવાની જગ્યાએ ઓથોરિટી દ્વારા તમારું આગલું બિલ ચૂકવો તેવી `ઉઘરાણી’ કરવામાં આવતાં કંપની મુંઝવણમાં મુકાઈ જવા પામી છે.