અયોધ્યામાં રામ મંદિરનું કયું કામ પૂરું થયું ? જુઓ

અયોધ્યામાં રામ મંદિરના પહેલા માળનું કામ પૂર્ણ થઈ ગયું છે. જ્યારે બીજા માળનું કામ પણ શરૂ થઈ ગયું છે. ડિસેમ્બર 2024 સુધીમાં મંદિર તૈયાર કરવાનું લક્ષ્ય છે. કામની ઝડપ વધારવા માટે મજૂરોની સંખ્યામાં પણ વધારો કરવામાં આવ્યો છે. મંદિરના બીજા માળનું કામ નવેમ્બરના અંત સુધીમાં પૂર્ણ કરવાનો લક્ષ્યાંક છે.

રામ મંદિરના પહેલા માળ અને બીજા માળનું કામ એક સાથે ચાલી રહ્યું હતું. પ્રાણ પ્રતિષ્ઠા પહેલા પણ રામ મંદિરના પહેલા માળની છત અને માળખું બનાવવામાં આવ્યું હતું. હવે ફિનિશિંગનું કામ પણ પૂર્ણ થઈ ગયું છે જ્યારે બીજા માળના થાંભલાને જોડવાનું કામ તેજ ગતિએ ચાલી રહ્યું છે.

ફર્સ્ટ ફ્લોર અને ગ્રાઉન્ડ ફ્લોરના બાકીના 70 થાંભલાઓ પર કોતરણીનું કામ પણ ઝડપી કરવામાં આવ્યું છે. મૂર્તિ કારીગરોની સંખ્યા વધારીને 60 કરવામાં આવી છે. અત્યાર સુધી 40 કારીગરો મૂર્તિઓ કોતરતા હતા. બીજી તરફ પહેલા માળે રામ દરબારની સ્થાપના માટે મહાપીઠનું નિર્માણ શરૂ કરવામાં આવ્યું છે. મહાપીઠ એ સ્થાન છે જ્યાં રામ દરબાર એટલે કે રામ, સીતા, લક્ષ્મણ અને હનુમાનજીની મૂર્તિઓ સ્થાપિત કરવામાં આવશે. રામ મંદિરના ટ્રસ્ટી ડૉ.અનિલ મિશ્રાએ જણાવ્યું હતું કે પરકોટામાં નિર્માણ થનારા છ મંદિરો અને સપ્તમંડપની ડિઝાઇન રામ મંદિરના આર્કિટેક આશિષ સોમપુરા દ્વારા તૈયાર કરવામાં આવી રહી છે.

મંદિર નિર્માણ પૂર્ણ થયા બાદ ભક્તો કુબેર ટીલાના દર્શન કરી શકશે.
ટ્રસ્ટી ડૉ.અનિલ મિશ્રાએ જણાવ્યું કે રામ મંદિર નિર્માણની સાથે અન્ય પ્રોજેક્ટ પર પણ કામ ચાલી રહ્યું છે. કુબેર ટીલા સુધી પહોંચવા માટે હાલમાં 40 ફૂટ પહોળો રોડ બનાવવામાં આવી રહ્યો છે. કુબેર ટીલાના બ્યુટિફિકેશનનું કામ પૂર્ણ થઈ ગયું છે, પરંતુ હાલમાં ભક્તોના ત્યાં જવા પર પ્રતિબંધ છે. તેમણે કહ્યું કે તમામ જરૂરી વ્યવસ્થા અને સુરક્ષા વ્યવસ્થા કર્યા પછી જ ભક્તો કુબેર ટીલાના દર્શન કરી શકશે. આ માટે પાસની વ્યવસ્થા કરવામાં આવશે.