બોર્ડની પરીક્ષાનું ટેન્શન છે..? ચિંતા કરવાને બદલે વાત કરો
બોર્ડ પરીક્ષા ફક્ત સ્ટૂડન્ટ્સ માટે જ નહીં પરંતુ તેમના ભાઈ-બહેનો, માતા-પિતા સહિત આખા પરિવાર માટે સ્ટ્રેસનું કારણ બની શકે છે
ધોરણ 10 અને 12 બોર્ડની પરીક્ષા નજીક છે અને વિદ્યાર્થીઓની સાથે સાથે વાલીઓની ચિંતામાં વધારો જોવા મળી રહ્યો છે. પરીક્ષા વખતે શું થશે તેની ખોટી ચિંતા કરી રહેલા કેટલાંક તો વળી સલાહ લેવા ફરી રહ્યા છે. બોર્ડની પરીક્ષા માટે તૈયારી કરી રહેલા વિદ્યાર્થીઓને બેશક અમુક પ્રશ્નો સતાવતા હોય છે પણ તેનો અર્થ એ નથી કે ટેન્શનને હાવી રહવા દેવું. પરીક્ષામાં સફળતા મેળવવા માગતા વિદ્યાર્થીઓમાં વાલીઓ જ વિશ્વાસ જગાડી શકે છે.
પરીક્ષા સમયે વિદ્યાર્થીઓની માનસિકતા કેવી હોય છે એ અંગેના અભ્યાસુ કહે છે કે, પરીક્ષાનું પરિણામ સારું નહિ આવે, સારી કોલેજમાં એડમિશન નહીં મળે, આ વર્ષે ડ્રોપ લઈ લઈએ, નાપાસ થઈશું તો શું થશે જેવા અનેક પ્રશ્નો સતાવતા હોય છે. અનેકવાર વિદ્યાર્થીઓને સ્યુસાઇડ કરવાનો વિચાર આવે, ઘર છોડીને ચાલ્યા જવાનો વિચાર આવે જેવી ફરિયાદો આવતી હોય છે. કેટલાક કિસ્સામાં વિદ્યાર્થીઓની ફરિયાદ હોય છે કે તેમના હાથ-પગ દુઃખે છે, ઊંઘ આવતી નથી હોતી, માથું દુખતું રહેતું હોય, કળતરની સમસ્યા હોય છે.
વાલીઓને ટિપ્સ આપતા આ અભ્યાસુએ જણાવ્યું કે, આ તમામ સમસ્યાઓ માટે બાળકની આજુબાજુનું વાતાવરણ મહત્વનું છે, અનેક વાલીઓ બાળકને કહેતા હોય છે કે તું પાસ થઈ જશે, સારા માર્ક્સ લાવજે નહીં તો સારી કોલેજમાં એડમિશન નહીં મળે, સારું પરિણામ નહીં આવે તો આગળ અભ્યાસમાં ખૂબ ખર્ચ થશે, પૈસા ક્યાંથી લાવીશું? આ ચિંતાઓ વાલીઓની હોય છે, જેની અસર બાળક પર પડે છે અને બાળક ડિપ્રેશનમાં જતું હોય છે. વાલીઓની ભૂમિકા ખૂબ મહત્વપૂર્ણ હોય છે, વાલીઓ બાળક સાથે હકારાત્મક રહે એ જરૂરી છે. બાળક કોઈ સમસ્યા અનુભવે તો વાલી પોતે બાળક સાથે ચર્ચા કરે. સ્કૂલ – ટ્યુશનના શિક્ષક સાથે વાતચીત કરે અને જરૂર હોય તો મનોચિકિત્સક સાથે મળીને ઉકેલ કાઢવો જોઈએ. બાળક જ્યારે પણ તેના અભ્યાસને લઈને કોઈ સમસ્યા અથવા ચિંતા અનુભવે તો એની સાથે ચર્ચા કરવી જરૂરી છે.
વાલીઓ ફરિયાદ કરે છે કે વાંચન કરતી વખતે બાળક મોબાઈલનો ઉપયોગ કરે છે, મોબાઈલમાં જોડાયેલા કેટલાક નકારાત્મક કન્ટેન્ટ બાળક જુવે છે, જો મોબાઈલ ના આપવામાં આવે તો બાળક વાંચન નથી કરતું.
અનેક બાળકોમાં મોબાઈલ, લેપટોપ અને કમ્પ્યુટરના વપરાશને કારણે પોર્ન વીડિયો જોવાની વાલીઓમાં ફરિયાદ પણ વધી છે. જો કે હવે ગણતરીના દિવસો બોર્ડની પરીક્ષા માટે બાકી રહ્યા છે એટલે તમામ સમસ્યાઓ વાલીઓ બાજુમાં રાખી બાળકનો ખાવાનો સમય સાચવે. બાળકના શારીરિક સ્વાસ્થ્ય પર ધ્યાન આપે, સુવા અને ઉઠવાનો સમય સાચવે, બાળક સમજ્યા વગર બિનજરૂરી વાંચન ના કરે એ ધ્યાન આપે. બાળકે જે અભ્યાસ કર્યો છે એના પર ફોક્સ કરવામાં આવે, નકારાત્મક વસ્તુ જોવાનું અને વાંચન કરવાનું બાળક ટાળે આ તમામ તકેદારી રાખવી જોઈએ.
વાલીને પોતાના બાળકના વર્તન વિશે ખ્યાલ હોય છે, બાળક વાંચવા ના બેસે, વાતે વાતે રડવા લાગે, વાંચનની ઈચ્છા ના થાય, સ્યુસાઈડનો પ્રયાસ કરે, ખાવાનું બંધ કરી દે, ઊંઘ ના આવતી હોય તો બાળક સાથે વાલીએ વાત કરવી જોઈએ.
પરીક્ષા ક્યારે છે ?
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ, ગાંધીનગર દ્વારા ધોરણ 10 અને ધોરણ 12 વિજ્ઞાન પ્રવાહ અને સામાન્ય પ્રવાહના પરીક્ષાનો જે કાર્યક્રમ જાહેર કરવામાં આવેલો છે તે પ્રમાણે ધોરણ 10 એસએસસી, સંસ્કૃત પ્રથમા અને ધોરણ 12 એચએસસી વિજ્ઞાન પ્રવાહ તથા સામાન્ય પ્રવાહ, ઉચ્ચતર ઉત્તર બુનયાદી પ્રવાહ, વ્યવસાયલક્ષી પ્રવાહ, સંસ્કૃત માધ્યમના ઉમેદવારોની માર્ચ 2024ની પરીક્ષા આગામી 11 માર્ચ 2024થી 26 માર્ચ 2024 દરમિયાન લેવામાં આવશે.આ સિવાય ધોરણ-12 પછી લેવાથી ગુજકેટની પરીક્ષા 2 એપ્રિલે લેવામાં આવશે. ધોરણ 10ની પરીક્ષાનો સમય સવારનો રહેશે જ્યારે ધોરણ 12ની પરીક્ષાનો સમય બપોરનો રહેશે.
થોડા સમય પહેલાથી શરૂ કરી દો તૈયારી
પરીક્ષા શરૂ થવાના થોડા સમય પહેલાથી જ અભ્યાસ શરૂ કરી દો. તેનાથી તમને સ્ટ્રેસ નહીં થાય અને સિલેબસ પુરો કરી શકાશે. તમારા સિલેબસને તમે નાના અને મેનેજેબલ સેશનમાં વહેચી લો. જેનાથી તમે તેને સરળતાથી પુરો કરી શકો. બધા વિષયો માટે એક સ્લોટ બનાવો અને આ સુનિશ્ચિત કરો કે તમે બધાને સમાન સમય આપો. પોતાની તૈયારીને જાણવા માટે મોક ટેસ્ટ, પ્રેક્ટિસ પેપરને સોલ્વ કરો.
પોતાને ફ્રેશ રાખવાનો પ્રયત્ન કરો
પોતાના મન અને શરીરને શાંત રાખવા માટે ઉંડો શ્વાસ લઈને વ્યાયામ કરો. ઘીરે અને ઉંડા શ્વાસ લો. પોતાના નાકથી શ્વાસ લો અને પોતાના મોંઢાથી શ્વાસ છોડો. દરરોજ ધ્યાન લગાવવા માટે અમુક સમય કાઢો. પોતાના વિચારોમાં કોઈ નકારાત્મક વિચાર ન લાવો. યોગનો અભ્યાસ સ્ટ્રેસને ઓછો કરવા અને આરામને પ્રોત્સાહન આપવામાં મદદ કરી શકે છે. પોતાની દિનચર્યામાં યોગ મુદ્રાઓ સામેલ કરો.
પોતાને પ્રિપેર રાખો
પરીક્ષાની તૈયારી વખતે લાસ્ટ સમયની એન્ઝાઈટીને ઓછી કરવા માટે પ્રિપેર રહેવું જરૂરી છે. ફોકસ અને પ્રોડક્ટીવિટીને વધારવા માટે અભ્યાસની સામગ્રી, નોટ્સ અને સંસાધનોને સંભાળીને મુકો. જ્યારે તમારી વસ્તુઓ વધારે અવ્યવસ્થિત રહેતી હોય તો ધ્યાન વધારે ભટકે છે. સારી રીતે વસ્તુઓને ઓર્ગેનાઈઝ કરવાથી તમારો સમય બચે છે. જેનાથી તમે બ્રેક લઈ શકો છો અને બર્નઆઉટથી બચી શકો છો.
એક્ટિવ લર્નિંગનો પ્રયત્ન કરો
કોઈ પણ વિષયને ગોખી નાખવાનો પ્રયત્ન ન કરો. આ આદત છોડી દો. તેની જગ્યા પર તમારે એક્ટિવ લર્નિંગ કરવું જોઈએ. નોટ્સ લેવા, બીજાને શિખવાડવા અને પોતાની સાથે પ્રશ્ન ઉત્તર કરવાના માધ્યમથી તમે વધુ સારી રીતે મહેનત કરી શકશો.