હિંદુઓને સત્વરે કેનેડા છોડી જવા શીખ આતંકીઓની ખુલ્લી ધમકી

જસ્ટિન ટુડોના આક્ષેપ બાદ માહોલ બગડ્યો

કેનેડામાં વસતા હિંદુઓમાં ગભરાટની લાગણી

કેનેડાના વડાપ્રધાન જસ્ટિન ટુડોએ શિખ આતંકી હરદીપસિંઘ નીજજરની હત્યા પાછળ ભારત સરકારનો હાથ હોવાનો આક્ષેપ કર્યા બાદ ખાલીસ્તાની આતંકવાદીઓ જોરમાં આવી ગયા છે અને બીજી તરફ કેનેડામાં વસતા હિન્દુઓમાં ચિંતા અને સલામતીની લાગણી પેદા થઈ છે. ખાલીસ્તાનવાદીઓ ખુલ્લેઆમ હિન્દુઓને ચેતવણી અને ધાકધમકી આપવા લાગ્યા છે.

અલગ ખાલીસ્તાન માટે ઝુંબેશ ચલાવતા મુખ્ય આતંકી સંગઠન શીખ ફીર જસ્ટિસના વડા ગુરુપતવંત સિંઘ પન્નુએ હિન્દુઓને કેનેડા છોડી જવાની ધમકી આપી હતી. હિન્દુ સમુદાયને સંબોધીને તેમણે કહ્યું કે તમે માત્ર ભારતને ટેકો જ નથી આપતા પણ સાથે જ ખાલીસ્તાન સમર્થક શીખોની અભિવ્યક્તિની આઝાદીને કચડવાના પણ સમર્થક છો. હરદીપ સિંઘ ની હત્યા બાદ હિન્દુઓએ ઉજવણી કરી હોવાનો અને તેને કારણે હિંસા વધી હોવાનો પણ તેમણે આક્ષેપ કર્યો હતો. સાથે જ 29 ઓક્ટોબરે યોજાનાર ખાલીસ્તાન માટેના રેફરેન્ડમમાં ઉમટી પડવા પણ તેમણે શીખ સમુદાયને હાકલ કરી હતી.
આ વિડીયો વાયરલ થયા બાદ કેનેડામાં વસતા હિન્દુઓમાં ગભરાટનો માહોલ વ્યાપી ગયો છે. એક હિન્દુ અગ્રણીએ કહ્યું કે જસ્ટિન ટુડોના નિવેદનને કારણે 1985 માં હિન્દુઓની જિંદગી સામે ખતરો સર્જાયો હતો તેવો માહોલ અત્યારે કેનેડામાં બની રહ્યો છે.

હિન્દુઓ પર હુમલા નો ભય
સૂત્રોના જણાવ્યા મુજબ ભારતની ઈન્ટેલીજન્સ એજન્સી એ પણ કેનેડામાં હિન્દુઓ પર હુમલા થવાનો ખતરો દર્શાવ્યો છે. હિન્દુ મંદિરો તેમજ કેનેડામાં વસતા ભારતીય વ્યાપારીઓ, ઉદ્યોગકારો અને નાગરિકો પર હુમલા થવાની સંભાવના વધી ગઈ હોવાનું એ અહેવાલમાં જણાવ્યું છે.કેનેડામાં સર્જાયેલી પરિસ્થિતિને કારણે ત્યાં નોકરી ધંધાર્થે સ્થાયી થયેલા લોકોના તેમ જ વિદ્યાર્થીઓના ભારત સ્થિત પરિવારજનો પણ ચિંતામાં મુકાઈ ગયા છે.

કેનેડાએ એડવાઇઝરી જાહેર કરી.
બંને દેશો વચ્ચે રાજદ્વારી તનાતની વચ્ચે કેનેડાએ ટ્રાવેલ એડવાઈઝરી જાહેર કરી ભારતમાં આવેલા કેનેડિયન નાગરિકોને જમમૂ અને કાશ્મીરની મુલાકાત ટાળવાની સલાહ આપી હતી. કાશ્મીરમાં ઘર્ષણ આતંકવાદ અને અપહરણ નો ખતરો હોવાનું તેમાં જણાવવામાં આવ્યું છે. સાથે જ પાકિસ્તાન સાથે સરહદ ધરાવતા ગુજરાત, રાજસ્થાન અને પંજાબ રાજ્યોની સરહદ નજીકના 10 કિલોમીટરના વિસ્તારમાં લેન્ડમાઈન હોવાની ચેતવણી પણ આપવામાં આવી છે.

આંતરરાષ્ટ્રીય પ્રતિક્રિયા

ઓસ્ટ્રેલિયાના વિદેશ મંત્રી એની વાંગે કહ્યું હતું કે હત્યામાં ભારતની સંડોવણી અંગેના અહેવાલ ચિંતાજનક છે. આ અંગેની તપાસ ચાલુ છે અને અમે અને અમારા સાથે દેશો સ્થિતિ ઉપર ચાંપતી નજર રાખી રહ્યા છીએ.ઓસ્ટ્રેલિયાએ ભારત સાથે આ મુદ્દો ઉઠાવ્યો હોવાનું પણ તેમણે જણાવ્યું હતું. યુકેના ફોરેન્સ સેક્રેટરી જેમ્સ ક્લેવરી એ કહ્યું કે ભારત અને કેનેડા બંને સાથે અમારે ગાઢ સંબંધો છે. તેમણે હત્યાની તપાસમાં ભારત પૂર્ણ સહકાર આપશે એવી અપેક્ષા વ્યક્ત કરી હતી. બીજી તરફ હરદીપસિંહની હત્યા ની જાહેરમાં નિંદા કરવા માટે અમેરિકા સહિતના સાથે રાસ્તોને વિનંતી કરી હતી પણ કોઈએ કોઠું આપ્યું નહોતું.