જાપાનના નાગોયામાં Asian Games 2026ની ભવ્ય ઓપનિંગ સેરેમની : મનુ ભાકર-પવન સેહરાવતે લહેરાવ્યો ત્રિરંગો

જાપાનના નાગોયામાં શનિવારે 20મી એશિયન ગેમ્સની ભવ્ય શરૂઆત થઈ હતી. નાગોયાના મિઝુહો પાર્ક એથ્લેટિક સ્ટેડિયમમાં રંગારંગ અને આધુનિક ટેક્નોલોજીથી સજ્જ કાર્યક્રમ યોજાયો હતો. જાપાનના સમ્રાટ નરુહિતોએ મહારાણી માસાકો, જાપાનના શાહી પરિવારના સભ્યો, એશિયન ઓલિમ્પિક કાઉન્સિલના પ્રમુખ શેખ જોવાન બિન હમદ અલ થાની અને આંતરરાષ્ટ્રીય ઓલિમ્પિક સમિતિના પ્રમુખ ક્રિસ્ટી કોવેન્ટ્રીની હાજરીમાં એશિયન ગેમ્સની સત્તાવાર શરૂઆત કરી હતી.

જાપાનના રાષ્ટ્રગીત સાથે શરૂઆત

કાર્યક્રમની શરૂઆત જાપાનના રાષ્ટ્રગીત સાથે થઈ હતી. ત્યારબાદ જાપાનનો રાષ્ટ્રધ્વજ ફરકાવવામાં આવ્યો હતો. જાપાનના સેલ્ફ ડિફેન્સ ફોર્સના 9 જવાનો ધ્વજને સ્ટેજ પર લઈને આવ્યા હતા. ધ્વજ ફરકાવ્યા બાદ સ્ટેડિયમમાં અંધારું કરવામાં આવ્યું અને રાષ્ટ્રધ્વજ પર પ્રકાશ પાડવામાં આવ્યો હતો.

45 દેશોના ખેલાડીઓની પરેડ

કાર્યક્રમ બાદ 45 દેશોના ખેલાડીઓની પરેડ યોજાઈ હતી. આ પરેડમાં 45 દેશોની ટીમો ઉપરાંત OCA રેફ્યુજી ટીમે પણ ભાગ લીધો હતો. પરેડમાં સૌથી પહેલા અફઘાનિસ્તાનની ટીમે પ્રવેશ કર્યો હતો. જ્યારે ચીનના 800થી વધુ ખેલાડીઓના મોટા દળે પણ સૌનું ધ્યાન ખેંચ્યું હતું.

469 ગોલ્ડ મેડલ માટે ખેલાડીઓ વચ્ચે સ્પર્ધા

એશિયન ગેમ્સ 19 સપ્ટેમ્બરથી 4 ઓક્ટોબર સુધી યોજાશે. એશિયન ગેમ્સનો શરૂઆત અને અંતનો કાર્યક્રમ નાગોયાના મિઝુહો પાર્ક એથ્લેટિક સ્ટેડિયમમાં જ યોજાશે. આ રમતોમાં 45 દેશોના આશરે 11 હજાર ખેલાડીઓ અને OCA રેફ્યુજી ટીમ ભાગ લઈ રહી છે. ખેલાડીઓ 43 અલગ-અલગ રમતોમાં કુલ 469 ગોલ્ડ મેડલ માટે સ્પર્ધા કરશે.

મનુ ભાકર અને પવન સેહરાવતે સંભાળ્યો તિરંગો

ભારતીય ટીમની પરેડમાં બે વખતની ઓલિમ્પિક મેડલ વિજેતા મનુ ભાકર અને 2022ની એશિયન ગેમ્સમાં ગોલ્ડ મેડલ જીતનાર કબડ્ડી ખેલાડી પવન સેહરાવતે ભારતનું નેતૃત્વ કર્યું હતું. બંનેએ ઘેરા વાદળી રંગના પરંપરાગત વસ્ત્રો પહેરીને ગર્વ સાથે તિરંગો હાથમાં લીધો હતો. શોટપુટ ખેલાડી તજિન્દરપાલ સિંહ તૂરને સમયસર કપડાં ન મળતાં પવન સેહરાવતે ભારતના ધ્વજવાહક તરીકે જવાબદારી સંભાળી હતી. ભારતે એશિયન ગેમ્સ માટે 501 સભ્યોનું દળ મોકલ્યું છે.

હાંગઝોઉ કરતાં વધુ મેડલ જીતવાનું ભારતનું લક્ષ્ય

ભારત આ વખતે 2023માં હાંગઝોઉમાં કરેલા પોતાના શ્રેષ્ઠ પ્રદર્શન કરતાં વધુ સારું પરિણામ મેળવવાનો પ્રયાસ કરશે. હાંગઝોઉ એશિયન ગેમ્સમાં ભારતે 28 ગોલ્ડ સહિત કુલ 106 મેડલ જીત્યા હતા અને મેડલની યાદીમાં ચોથું સ્થાન મેળવ્યું હતું.

એશિયન ગેમ્સના સત્તાવાર કાર્યક્રમ પહેલાં જ કેટલીક રમતો શરૂ થઈ ગઈ હતી. મહિલા ક્રિકેટમાં હરમનપ્રીત કૌરની આગેવાની હેઠળની ભારતીય ટીમે શુક્રવારે યજમાન જાપાનને 8 વિકેટે હરાવીને સેમિફાઇનલમાં સ્થાન મેળવ્યું હતું.આ ઉપરાંત એશિયન ગેમ્સમાં પ્રથમ વખત રમાઈ રહેલી ટેકબોલ રમતમાં પણ ભારત મેડલની દોડમાં છે. મહિલા સિંગલ્સમાં ક્વિન્સી ડિસૂઝા શનિવારે સેમિફાઇનલમાં હારી ગઈ હતી. હવે તે કાંસ્ય ચંદ્રક માટે રમશે.