ગુજરાત વિધાનસભામાં કોંગ્રેસના ધારાસભ્ય ઈમરાન ખેડાવાલા વિવાદમાં: માફીની માંગ સાથે ભાજપે માંગ્યો ખુલાસો
ગુજરાત વિધાનસભાના ચોમાસુ સત્રની શરૂઆત સાથે જ રાજકીય ગલિયારામાં ભારે હલચલ મચી ગઈ છે. સત્રના પ્રારંભે જ રાષ્ટ્રગીત કે રાષ્ટ્રીય ગીતના સન્માન સાથે જોડાયેલા મુદ્દાઓ પર અવારનવાર વિવાદો થતા હોય છે, ત્યારે તાજેતરમાં જમાલપુર-ખાડિયાના કોંગ્રેસના ધારાસભ્ય ઈમરાન ખેડાવાલા સામે ‘વંદે માતરમ’નું અપમાન કરવાનો ગંભીર આરોપ લાગતા મામલો અત્યંત ટોક ઓફ ધ ટાઉન બન્યો છે.
‘વંદે માતરમ’ વખતે બેસી જવાનો આરોપ
સંસદથી લઈને વિધાનસભા સુધી સત્રની શરૂઆત રાષ્ટ્રીય ગીત ‘વંદે માતરમ’થી કરવાની લાંબી પરંપરા રહી છે. પ્રાપ્ત વિગતો અનુસાર, આજે વિધાનસભા સત્રના પ્રારંભે ‘વંદે માતરમ’ની ધૂન વાગી રહી હતી ત્યારે જમાલપુર-ખાડિયાના કોંગ્રેસ ધારાસભ્ય ઈમરાન ખેડાવાલા પોતાની જગ્યા પર ઊભા તો થયા, પરંતુ તરત જ પાછા બેસી ગયા હતા. ભાજપના નેતાઓએ આ કૃત્યને રાષ્ટ્રીય ગીતનું સીધું અને ગંભીર અપમાન ગણાવ્યું છે.
આ પણ વાંચો: મતદારયાદીમાં નામ મિસમેચ થતાં 92 વર્ષીય વૈજ્ઞાનિકને રૂબરૂ હાજર રહેવા આદેશ
ભાજપના આકરા પ્રહારો અને કોંગ્રેસ પાસે સ્પષ્ટતાની માંગ
આ ઘટના સામે આવતા જ ભાજપ દ્વારા આક્રમક વલણ અપનાવવામાં આવ્યું છે. ભાજપે કોંગ્રેસ પાર્ટી પાસે સવાલો કરતા પૂછ્યું છે કે, ‘વંદે માતરમ’ વખતે બેસી જવું એ ઈમરાન ખેડાવાલાનું વ્યક્તિગત વલણ છે કે પછી સમગ્ર કોંગ્રેસ પાર્ટીનું સત્તાવાર સ્ટેન્ડ છે? ભાજપના અગ્રણીઓએ જણાવ્યું હતું કે દેશનું કે રાષ્ટ્રીય ગીતનું અપમાન દેશના નાગરિકો ક્યારેય સહન કરશે નહીં, અને ધારાસભ્ય દ્વારા આ બાબતે જાહેરમાં માફી માંગવી જોઈએ.
આ વિવાદે સત્રના પહેલા જ દિવસે ગૃહમાં રાજકીય ગરમાવો લાવી દીધો છે. રાષ્ટ્રીય સન્માન અને પ્રતીકો સાથે જોડાયેલા આવા મુદ્દાઓ આગામી દિવસોમાં બંને પક્ષો વચ્ચે વધુ ઘમાસાણ મચાવે તેવી પૂરી સંભાવના છે.
