આતંકવાદ મુદ્દે બેવડા માપદંડ અસ્વીકાર્ય, SCO સમિટમાં વડાપ્રધાન મોદીનો ધ્રુજારો
યુદ્ધો વડે નહીં, સંવાદ દ્વારા સમસ્યાઓ ઉકેલવા અનુરોધ
કિર્ગિસ્તાનમાં યોજાયેલી શાંઘાઈ કોઓપરેશન ઓર્ગેનાઇઝેશન (SCO)ની સમિટમાં વડાપ્રધાન નરેન્દ્ર મોદીએ આતંકવાદ સામે કડક વલણ વ્યક્ત કરતાં કહ્યું કે આતંકવાદ અંગે કોઈપણ પ્રકારના બેવડા માપદંડ સ્વીકાર્ય હોઈ શકે નહીં. આતંકવાદ, તેના નાણાંકીય સ્ત્રોતો, ભરતી, કટ્ટરપંથીકરણ અને સુરક્ષિત આશ્રયસ્થાનોના સમગ્ર માળખાને નષ્ટ કરવા માટે તમામ દેશોએ એકજૂટ થઈને કામ કરવા તેમણે ભારપૂર્વક અનુરોધ કર્યો હતો.
ચીનના રાષ્ટ્રપતિ શી જિનપિંગ, રશિયાના રાષ્ટ્રપતિ વ્લાદિમીર પુતિન અને પાકિસ્તાનના વડાપ્રધાન શેહબાઝ શરીફની હાજરીમાં મોદીએ કહ્યું કે વિશ્વમાં ચાલી રહેલા યુદ્ધો અને સંઘર્ષોનો ઉકેલ યુદ્ધભૂમિ પર નહીં પરંતુ સંવાદ અને રાજદ્વારીના માર્ગે જ મળી શકે છે.
મોદીના નિવેદનને પાકિસ્તાન પ્રત્યેનો સ્પષ્ટ સંદેશ માનવામાં આવી રહ્યો છે. તેમણે કહ્યું કે વિવિધ દેશો વચ્ચેના ઇન્ફ્રાસ્ટ્રક્ચર પ્રોજેક્ટ્સમાં સહકાર જરૂરી છે, પરંતુ તે અન્ય દેશોની સાર્વભૌમતા અને પ્રાદેશિક અખંડિતતાનો સન્માન કરતા હોવા જોઈએ.
આ પણ વાંચો: રશિયા ભારતને S-400 મિસાઇલ સિસ્ટમની વધુ 5 યુનિટ આપશે
ચીન અને પાકિસ્તાન બંનેને ગર્ભિત સંદેશો
SCO સમિટમાં ચીન અને પાકિસ્તાન બંનેના સર્વોચ્ચ નેતાઓ હાજર હોવાથી ભારત માટે પોતાની સત્તાવાર સ્થિતિ સ્પષ્ટ રીતે રજૂ કરવાની આ મહત્વપૂર્ણ તક બની ગઈ હતી. ખાસ કરીને ચીન-પાકિસ્તાન ઇકોનોમિક કોરિડોર (CPEC)નો માર્ગ પાકિસ્તાન કબજાવાળા કાશ્મીર (PoK)માંથી પસાર થતો હોવાથી ભારત લાંબા સમયથી તેનો વિરોધ કરતું આવ્યું છે. અંદાજે 3,000 કિમી લાંબો આ કોરિડોર ચીનના શિનજિયાંગ પ્રાંતને પાકિસ્તાનના ગ્વાદર બંદર સાથે જોડવાનો મહત્ત્વાકાંક્ષી પ્રોજેક્ટ છે. મોદીના સાર્વભૌમતા સંબંધિત નિવેદનને આ સંદર્ભમાં મહત્વપૂર્ણ માનવામાં આવી રહ્યું છે.
સમિટમાં અનેક દેશોના નેતાઓની હાજરી
આ વખતે SCO સમિટનું આયોજન વિસ્તૃત ‘SCO-પ્લસ’ સ્વરૂપમાં કરવામાં આવ્યું છે, જેમાં સભ્ય દેશો ઉપરાંત અનેક સહયોગી દેશોના નેતાઓએ પણ ભાગ લીધો. તેમાં તુર્કીના રાષ્ટ્રપતિ રજબ તૈયબ એર્દોગાન, અઝરબૈજાનના રાષ્ટ્રપતિ ઇલહામ અલીયેવ, આર્મેનિયાના વડાપ્રધાન નિકોલ પશિન્યાન, મંગોલિયાના રાષ્ટ્રપતિ ઉખનાગીન ખુરેલસુખ, લાઓસના રાષ્ટ્રપતિ થોંગલૂન સિસોલિથ અને ટોગોના રાષ્ટ્રપતિ ફોરે ગ્નાસિંગ્બેનો સમાવેશ થાય છે. 2001માં સ્થાપિત થયેલા 10 સભ્યોના SCOમાં ભારત અને પાકિસ્તાન 2017માં, ઈરાન 2023માં અને બેલારુસ 2024માં પૂર્ણ સભ્ય તરીકે જોડાયા હતા.
