ગાડી ખરીદતી વખતે જે માઇલેજ અને ખિસ્સાના બજેટનું ગણિત આપણે અગાઉ માંડતા હતા, તે હવે બદલાઈ ચૂક્યું છે. પેટ્રોલ પંપ પર બદલાયેલા ઇંધણના મિજાજે લોકોની ગાડીઓની ચોઈસ જ ફેરવી નાખી છે. આજે પરિસ્થિતિ એવી છે કે શો-રૂમમાં પેટ્રોલ કાર કરતાં ઇલેક્ટ્રિક અને સીએનજી વાહનો ખરીદવા માટે પડાપડીચી મચી ગઈ છે, જેના કારણે લાંબા વેઇટિંગ લિસ્ટથી ગ્રાહકો હેરાન પરેશાન છે.
E20 પેટ્રોલે બદલી નાખી ગ્રાહકોની ચોઈસ
ઇથેનોલ મિશ્રિત E20 પેટ્રોલના ઉપયોગથી વાહનોના માઇલેજમાં ઘટાડો થવાની અને મેન્ટેનન્સ ખર્ચ વધવાની વ્યાપક ફરિયાદો સામે આવી રહી છે. આ પરિસ્થિતિએ વાહન ખરીદનારા ગ્રાહકોની માનસિકતા પર સીધી અસર કરી છે. પરંપરાગત પેટ્રોલ વાહનો ખરીદવાને બદલે હવે લોકો ઇલેક્ટ્રિક વાહનો (EV) અને CNG મોડેલ્સ તરફ સુરક્ષિત વિકલ્પ તરીકે વળી રહ્યા છે. આ અચાનક વધેલી ડિમાન્ડને કારણે માર્કેટમાં સપ્લાય પર ભારે દબાણ સર્જાયું છે અને વાહનોનું વેઇટિંગ પિરિયડ રેકોર્ડ સ્તરે પહોંચી ગયું છે.
આ પણ વાંચો: ઘર તણાયું, માલિક ગુમ…! નેપાળ ત્રાસદીનો મૌન સાક્ષી, કાટમાળ પર બેઠો છે વફાદાર શ્વાન!
લોકપ્રિય EV અને CNG મોડેલો પર લાંબુ વેટિંગ
ઓટોમોબાઇલ બજારમાં હાલમાં ઇલેક્ટ્રિક અને સીએનજી ગાડીઓની બોલબાલા છે.
Mahindra XEV 9S: આ ગાડી માટે ગ્રાહકોએ સૌથી વધુ એટલે કે આશરે 6 મહિના સુધી રાહ જોવી પડી રહી છે.
Tata Punch EV & Tiago EV: આ મોડેલોના કેટલાક ખાસ વેરિઅન્ટ્સ પર 18 થી 24 અઠવાડિયા સુધીનું વેઇટિંગ ચાલી રહ્યું છે.
TVS iQube: ટૂ-વ્હીલર ઇલેક્ટ્રિક સેગમેન્ટમાં આ સ્કૂટર માટે 4 થી 5 મહિનાનું વેઇટિંગ છે.
Maruti Brezza: આ ગાડીની કુલ બુકિંગમાંથી 70% બુકિંગ માત્ર ટર્બો-પેટ્રોલ અને CNG વેરિઅન્ટ્સનું જ છે.
ઇન્ક્વાયરી અને બુકિંગમાં 30% થી વધુનો ઉછાળો
રિપોર્ટ્સ અનુસાર, E20 ફ્યુઅલ સામેની નકારાત્મક ચર્ચાઓ અને નવા મોડેલોના આકર્ષક લોન્ચિંગને કારણે EV અને CNG વાહનોની પૂછપરછ તથા બુકિંગમાં 30% કરતાં વધુનો વધારો નોંધાયો છે. ખાસ કરીને પોસાય તેવા સસ્તા EV વેરિઅન્ટ્સ (જેવા કે Tata Punch EV Smart 30) પર 12 થી 24 અઠવાડિયાનું વેઇટિંગ છે, જ્યારે મોંઘા વેરિઅન્ટ્સ જલ્દી મળી રહ્યા છે. થોડા સમય પહેલાં જ્યાં વેઇટિંગ પિરિયડ મહત્તમ 1 મહિનો હતો, તે વધીને હવે સીધો 3 થી 4 મહિના થઈ ગયો છે.
આગામી તહેવારોની સીઝન જેમ કે ઓણમ, ગણેશ ચતુર્થી, નવરાત્રી અને દિવાળી નજીક આવી રહી છે તેમ વાહનોની માંગ હજુ વધવાની પૂરેપૂરી શક્યતા છે. E20 પેટ્રોલના કારણે ઊભી થયેલી આ પરિસ્થિતિ સ્પષ્ટ સંકેત આપે છે કે ભવિષ્ય હવે ગ્રીન એનર્જી અને વૈકલ્પિક ઇંધણ એટલે કે EV અને CNG તરફ જ આગળ વધી રહ્યું છે.
