અમેરિકામાં વિઝાના દુરુપયોગ સામે ટ્રમ્પ પ્રશાસનનું એક્શન

અમેરિકામાં સ્થાયી થવાનું કે ત્યાં જઈને કાયમી આશ્રય મેળવવાનું સપનું સેવતા વિદેશી નાગરિકો માટે એક મોટા અને ચિંતાજનક સમાચાર સામે આવ્યા છે. યુએસ ઇતિહાસના સૌથી મોટા કથિત માસ વિઝા રિવોકેશનની તૈયારીઓ વચ્ચે ટ્રમ્પ પ્રશાસને ઇમિગ્રેશન સિસ્ટમના કથિત દુરુપયોગ સામે શિકંજો કસવાનું શરૂ કરી દીધું છે. આ કડક પગલાંને કારણે માત્ર વિદેશીઓ જ નહીં, પરંતુ અમેરિકા જવા માટે અસાઈલમનો સહારો લેનારા હજારો ગુજરાતીઓ પણ સીધા પ્રભાવિત થઈ શકે છે, જેના કારણે સમગ્ર સમુદાયમાં ચિંતાનું મોજું ફરી વળ્યું છે.

B1/B2 વિઝા ધારકો સામે ટ્રમ્પ પ્રશાસનનું સૌથી મોટું એક્શન

અમેરિકામાં ટૂરિસ્ટ (B2) અથવા બિઝનેસ (B1) વિઝા પર પ્રવેશ મેળવ્યા બાદ અસાઈલમ (આશ્રય) માટે અરજી કરનારા અથવા પેન્ડિંગ કેસો ધરાવતા વિદેશીઓ પર હવે તલવાર લટકી રહી છે. યુએસ તંત્ર દ્વારા આવા અંદાજે 2 લાખ જેટલા લોકોના વિઝા ગમે ત્યારે રદ કરવામાં આવી શકે છે. જો આ નિર્ણય સત્તાવાર રીતે અમલમાં આવે છે, તો તે યુએસ ઇતિહાસનું અત્યાર સુધીનું સૌથી મોટું સામૂહિક વિઝા રિવોકેશન બની રહેશે, જે ઇમિગ્રેશન નીતિઓમાં કઠોર પરિવર્તનના સંકેત આપે છે.

અંદાજે 14 હજાર ગુજરાતીઓ પર તોળાઈ રહ્યું છે સંકટ

ગુજરાતીઓ માટે અમેરિકા હંમેશાંથી સૌથી લોકપ્રિય વિદેશી ડેસ્ટિનેશન રહ્યું છે. ફેડરેશન ઓફ ગુજરાતી એસોસિએશન ઓફ યુએસએના ડેટા અનુસાર, અમેરિકામાં અંદાજે 17 લાખ જેટલા ગુજરાતી મૂળના લોકો વસે છે. જોકે યુએસ સરકારે અસરગ્રસ્ત ગુજરાતીઓનો કોઈ અધિકૃત આંકડો જાહેર કર્યો નથી, પરંતુ જ્હોન્સ હોપકિન્સ યુનિવર્સિટીના ડેટા મુજબ 2001થી 2022 દરમિયાન ભારતીય અસાઈલમ અરજદારોમાં આશરે 7% લોકો ગુજરાતી ભાષી હતા. આ ટકાવારીના આધારે ગણતરી કરીએ તો, આ નવા નિયમની ઝપેટમાં આશરે 14,000 જેટલા ગુજરાતીઓ આવી શકે છે.

આ પણ વાંચો: ભૂકંપ કે ભારે વરસાદ વગર નેપાળમાં કેમ સર્જાઈ મહાવિનાશક હોનારત? વૈજ્ઞાનિકોએ ખોલ્યા ચોંકાવનારા રાઝ

ઇમિગ્રેશન સિસ્ટમના દુરુપયોગ સામે આકરા પગલાં

અમેરિકન ઇમિગ્રેશન અધિકારીઓના મતે, ઘણા લોકો પ્રવાસી કે વ્યવસાયિક વિઝા પર કાયદેસર રીતે દેશમાં પ્રવેશ કરે છે અને ત્યારબાદ અસાઈલમની અરજી કરીને લાંબો સમય સુધી ગેરકાયદેસર કે અનિશ્ચિત રૂપે રોકાવાનો રસ્તો અપનાવે છે. ટ્રમ્પ સરકારે આ પદ્ધતિને ઇમિગ્રેશન સિસ્ટમનો સીધો દુરુપયોગ ગણાવ્યો છે અને આવા તમામ કેસો સામે ઝીરો ટોલરન્સ નીતિ અપનાવીને કડક કાર્યવાહી કરવાનો સ્પષ્ટ સંકેત આપ્યો છે.

અમેરિકાની આ બદલાતી અને કડક નીતિઓ માત્ર વિદેશી નાગરિકો માટે જ નહીં, પરંતુ વિદેશ જઈને નવું ભવિષ્ય ઘડવા માગતા પરિવારો માટે પણ મોટા પડકારો સર્જી રહી છે. કાયદાકીય છટકબારીઓનો ઉપયોગ કરીને લાંબા સમય સુધી રોકાવાની પ્રવૃત્તિ સામે અમેરિકન તંત્ર હવે સંપૂર્ણપણે સજ્જ થઈ ગયું છે. આ પરિસ્થિતિ જોતાં વિદેશ પ્રવાસ કે સ્થળાંતર કરતા પહેલાં કાયદાકીય નિયમોનું પાલન કરવું અનિવાર્ય બની ગયું છે, અન્યથા આવા નિર્ણયો અનેક પરિવારો માટે મોટી મુસીબતો નોતરી શકે છે.