15 જિલ્લામાં હવામાન વિભાગે યલો એલર્ટ જાહેર કર્યું: ખેડૂતોમાં ખુશીની લહેર
બંગાળની ખશડીમાં સર્જાયેલ લો-પ્રેશર અને સાયક્લોનિક એર સરક્યુલેશનના કારણે ગુજરાત પર એકસાથે ત્રણ-ત્રણ સિસ્ટમ સક્રિય બની છે ત્યારે સોમવારથી રાજ્યના ૧૫ જિલ્લામાં મેઘરાજાનો વધુ એક રાઉન્ડ આવી રહ્યો હોવાની હવામાન વિભાગે આગાહી કરી છે.
ગુજરાતમાં જુલાઈ મહિનામાં મેઘરાજાએ તાંડવ મચાવી દક્ષિણ ગુજરાત, મધ્ય ગુજરાત, ઉત્તર ગુજરાત અને સૌરાષ્ટ્રના અમુક ભાગોને ધમરોળી નાખ્યા હતા. છેલ્લા એક સપ્તાહથી મેઘરાજાએ વિરામ લીધો છે અને સમગ્ર રાજ્યમાં ઉઘાડ નીકળ્યો છે.
ત્યારે બંગાળની ખાડીમાં વધુ એક લો-પ્રેશર સર્જાયું છે જે ગુજરાત તરફ આગળ વધ્યું છે. આ ઉપરાંત અન્ય બે-બે વરસાદી સિસ્ટમ સક્રિય થતાં તા.૧૦-૧૧ અને ૧૨ ઓગસ્ટ ત્રણ દિવસ સુધી રાજ્યના ૧૫ જિલ્લામાં હવામાન વિભાગે યલો એલર્ટ જાહેર કરી મધ્યમ વરસાદથી ભારે વરસાદની આગાહી કરી છે.
આ પણ વાંચો: રાજકોટની યુવતીએ લંડનમાં વડાપ્રધાન માટે બોલેલા શબ્દોથી વિવાદ સર્જાયો
હવામાન વિભાગની યાદી મુજબ આગામી ત્રણ દિવસ ઉત્તર ગુજરાત અને મધ્ય ગુજરાતના બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લલી, ખેડા, અમદાવાદ, આણંદ, પંચમહાલ, દાહોદ, મહિસાગર, વડોદરા, છોટા ઉદેપુર અને નર્મદા જિલ્લામાં છૂટાછવાયા સ્થળે સાર્વત્રિક વરસાદ જોવા મળશે.
ઉત્તર ગુજરાત અને મધ્ય ગુજરાતમાં સાર્વત્રિક વરસાદની આગાહીના કારણે ખેડૂતોમાં ખુશીની લહેર જોવા મળી છે. વાવણીકાર્ય પૂર્ણ થઈ ગયા બાદ ઉભા મોલ પર મધ્યમ વરસાદની આગાહીથી ધરતી પર કાચુ સોનુ વરસશે અને ખરીફ પાકને જીવતદાન મળશે.
