લાંબા સમયથી આ પાપ થઈ રહ્યું હોવાનો દાવો; ચઢાવો સતત ચાલુ જ રહે છે
મહારાષ્ટ્ર નવનિર્માણ સેનાના રાષ્ટ્રીય અધ્યક્ષ રાજ ઠાકરેએ એક મોટો દાવો કરીને મહારાષ્ટ્રનું રાજકીય તાપમાન વધારી દીધું છે. તેમણે મુંબઈના પ્રખ્યાત સિદ્ધિવિનાયક મંદિરમાં પ્રતિવર્ષ 18 કરોડ રૂપિયાની ચોરી થતી હોવાની વાત કરી છે. એક કાર્યક્રમને સંબોધિત કરતા ઠાકરેએ કહ્યું કે આજના સમયમાં મંદિરો પણ સુરક્ષિત નથી.
વિદ્યાર્થી પાંખના કાર્યક્રમને સંબોધિત કરતા રાજ ઠાકરેએ દાવો કર્યો કે અયોધ્યાના રામ મંદિરમાં 1400 કરોડ રૂપિયાની ચોરી થઈ છે અને વડાપ્રધાન નરેન્દ્ર મોદીએ આ મુદ્દે ચોક્કસ બોલવું જોઈએ. તેમણે જણાવ્યું કે નિરાશ યુવાનો મંદિરોનો આશરો લે છે, પરંતુ મંદિરો પણ ભ્રષ્ટાચારથી મુક્ત નથી. મહારાષ્ટ્રના ઉપમુખ્યમંત્રી એકનાથ શિંદેને સિદ્ધિવિનાયક મંદિરના 8 ટ્રસ્ટીઓ દ્વારા લખવામાં આવેલા પત્રનો હવાલો આપતા તેમણે કહ્યું કે મંદિરની દાનપેટીમાંથી પૈસા ચોરનારા કેટલાક કર્મચારીઓને ટ્રસ્ટીઓની સતર્કતાને કારણે પકડી લેવામાં આવ્યા છે.
આ પણ વાંચો: CAPF કાનૂન સામે કેન્દ્રીય સશસ્ત્ર પોલીસ દળના 3000 અધિકારીઓએ જંગ માંડ્યો
ઠાકરેનું કહેવું છે કે સિદ્ધિવિનાયક મંદિરમાં આ ચોરી પકડાઈ તે પહેલાં અહીં દાન થતી સાપ્તાહિક આવક આશરે 50 લાખ રૂપિયાથી પણ ઓછી હતી, પરંતુ ચોરીની જાણકારી બાદ આ દાન રકમ વધીને 1.5 કરોડ રૂપિયા થઈ ગઈ. રાજ ઠાકરેનો દાવો છે કે દર વર્ષે મંદિરથી 18 કરોડ રૂપિયાની ચોરી થાય છે. આમ દેશના અનેક મંદિરોમાં આ રીતે ચોરી થતી હોવાની વાતોથી લોકોમાં પણ ભારે દુખની લાગણી છે.
સિદ્ધિવિનાયક મંદિર ટ્રસ્ટના અધ્યક્ષ અને ઉપમુખ્યમંત્રી એકનાથ શિંદેના નેતૃત્વવાળી શિવસેનાના નેતા સદા સરવણકરે જણાવ્યું કે આ મામલામાં 9 કર્મચારીઓની અગાઉ જ ધરપકડ કરવામાં આવી છે. તેમણે દાવો કર્યો કે જ્યાં પણ જરૂરી હતું, ત્યાં તેમના વિરુદ્ધ ગુના નોંધવામાં આવ્યા છે. સરવણકરનું કહેવું છે કે મંદિરમાં દાનમાં વધારો ટ્રસ્ટ દ્વારા કરવામાં આવેલા પ્રયાસોના કારણે થયો છે.
