અમદાવાદ ઝોન 7માંથી 190 આરોપીની ધરપકડ, 20-26 વર્ષ જૂના વોન્ટેડ પણ ઝડપાયા
149મી અમદાવાદ રથયાત્રાને લઈને શહેર પોલીસ એક્શન મોડમાં આવી ગઈ છે. રથયાત્રા દરમિયાન કાયદો-વ્યવસ્થા જળવાઈ રહે તે માટે ઝોન 7 DCPએ “ઓપરેશન ક્લીન સ્વીપ” નામે મેગા કોમ્બિંગ હાથ ધર્યું. આ કાર્યવાહીમાં પ્રોહિબિશન, M.V એક્ટ અને વોન્ટેડ ગુનાઓ સહિત કુલ 190 આરોપીઓને ઝડપી પાડવામાં આવ્યા. 20 અને 26 વર્ષ જૂના વોન્ટેડ આરોપીઓ પણ પોલીસના હાથે ચડ્યા છે.
ઝોન 7માં મેગા કોમ્બિંગ, 190 આરોપી ઝડપાયા
રથયાત્રા પૂર્વે શાંતિ જાળવવા માટે ઝોન 7 DCPની ટીમ દ્વારા મોટા પાયે સર્ચ ઓપરેશન ચલાવવામાં આવ્યું. વેજલપુર, સરખેજ, સેટેલાઈટ, વાસણા, પાલડી, એલિસ બ્રિજ અને બોડકદેવ સહિતના વિસ્તારોમાંથી પ્રોહિબિશન, મોટર વ્હીકલ એક્ટના ભંગ અને વોન્ટેડ કેસના કુલ 190 આરોપીઓની ધરપકડ કરવામાં આવી.
26 વર્ષ જૂનો બનાવટી નોટનો અને 20 વર્ષ જૂનો ચોરીનો વોન્ટેડ પકડાયો
આ ઓપરેશનમાં સૌથી મોટી સફળતા સરખેજ પોલીસને મળી, જેમણે વોન્ટેડ, નાસ્તા-ફરતા અને પ્રોહિબિશનના મળીને 47 આરોપીઓને ઝડપ્યા. સેટેલાઈટ પોલીસે વર્ષ 2005ના બનાવટી ચલણી નોટના કેસમાં ફરાર વનરાજ લબાના નામના 26 વર્ષ જૂના વોન્ટેડને ઝડપી પાડ્યો. તેવી જ રીતે વેજલપુર પોલીસે વર્ષ 2008ની સ્કોર્પિયો ગાડી ચોરીના કેસમાં ફરાર યુસુફખાન પઠાણ નામના 20 વર્ષ જૂના આરોપીની ધરપકડ કરી.
અન્ય રાજ્યોમાંથી પણ આરોપી ઝડપાયા
આ કાર્યવાહી દરમિયાન ઉત્તરાખંડ, મહારાષ્ટ્ર, રાજસ્થાન સહિત ગુજરાતના ગાંધીનગર, મહેસાણા, કચ્છ, રાજકોટ અને અમદાવાદના વિવિધ વિસ્તારોમાંથી આરોપીઓને પકડવામાં આવ્યા. આ તમામની સામે પોલીસે કાયદેસરની કાર્યવાહી શરૂ કરી છે.
10 થી 17 જુલાઈ સુધી પોલીસની રજાઓ રદ
DG દ્વારા મળેલા આદેશ મુજબ રથયાત્રાને લઈને 10 થી 17 જુલાઈ સુધી તમામ પોલીસ કર્મચારીઓની રજાઓ રદ કરવામાં આવી છે. અનિવાર્ય કારણ સિવાય કોઈને રજા આપવામાં આવશે નહીં. ક્રાઈમ બ્રાન્ચ અને શહેર પોલીસ દ્વારા શહેરમાં સત પેટ્રોલિંગ હાથ ધરવામાં આવશે જેથી રથયાત્રા શાંતિપૂર્ણ અને સુરક્ષિત રીતે સંપન્ન થાય.
