ભારત થી નેપાળ અને વેનેઝુએલા થી જાપાન સુધીની ધરતી ધ્રુજી

ગુરુવારે ધરતીએ જાણે વિશ્વને એકસાથે હચમચાવી નાખ્યું. દક્ષિણ અમેરિકાના વેનેઝુએલામાં 7.5 ની તીવ્રતાના વિનાશક ભૂકંપે 22 માળની ઈમારત ધરાશાયી કરી દીધા પછી, એશિયામાં પણ ધરતી ધ્રુજી ઉઠી. જાપાનમાં 6.9 ની તીવ્રતાનો શક્તિશાળી આંચકો આવ્યો, જ્યારે ભારતના જમ્મુ-કાશ્મીર અને પાડોશી નેપાળમાં પણ હળવા આંચકા નોંધાયા. એક જ દિવસમાં 4 દેશોમાં ભૂકંપની શ્રેણી જોઈને વૈજ્ઞાનિકો અને નાગરિકો બંને ચિંતામાં મુકાયા છે. સદનસીબે વેનેઝુએલા સિવાય ક્યાંય મોટું જાનમાલનું નુકસાન થયું નથી, પણ આફ્ટરશોક્સનો ખતરો હજુ ટળ્યો નથી.

વેનેઝુએલા: 100 વર્ષનો સૌથી વિનાશક ભૂકંપ 

આ સિલસિલાની શરૂઆત બુધવારે સાંજે દક્ષિણ અમેરિકાના વેનેઝુએલાથી થઈ. રાજધાની કૅરાકસમાં 7.2 અને 7.5 ની તીવ્રતાના બે બેક-ટુ-બેક આંચકા આવ્યા. પરિણામે 22 માળની એક વિશાળ ઈમારત પત્તાના મહેલની જેમ તૂટી પડી અને એરપોર્ટના માળખાને પણ ભારે નુકસાન પહોંચ્યું. આને છેલ્લા 100 વર્ષના સૌથી વિનાશક ભૂકંપોમાંથી એક માનવામાં આવી રહ્યો છે. ત્યાં ભારે તબાહીના અહેવાલ છે.

આ પણ વાંચો: વૈશ્વિક ઓઈલ માર્કેટનું સત્તા કેન્દ્ર બદલાયું: ભાવિ વલણ હવે બીજું કોઈ નહીં પણ ચીન નક્કી કરશે

જાપાન: સવારે ટોક્યો પણ ધ્રુજ્યું, પણ સુનામી નહીં 

વેનેઝુએલા બાદ ગુરુવારે સવારે ઓફિસ સમય દરમિયાન જાપાનના ઇવાટે પ્રાંતના પૂર્વી દરિયાકાંઠે જમીનથી 50 કિ.મી ઊંડાઈએ 6.9 ની તીવ્રતાનો શક્તિશાળી ભૂકંપ આવ્યો. આંચકો એટલો જોરદાર હતો કે રાજધાની ટોક્યો પણ ધ્રુજી ઉઠ્યું. સાવચેતીના ભાગરૂપે બુલેટ ટ્રેન અને લોકલ ટ્રેનો તાત્કાલિક રોકી દેવાઈ. આઓમોરીના હાશિકામીમાં શાળાના બાળકો ગભરાઈ જતા વર્ગો એક દિવસ માટે બંધ કરી દેવાયા. સરકારી પ્રવક્તા મિનોરુ કિહારાએ જણાવ્યું કે હાલ કોઈ જાનહાનિ નથી. PM સનાએ તાકાઇચીએ નાગરિકોને આફ્ટરશોક્સ સામે સતર્ક રહેવા અપીલ કરી. જાપાન મેટ્રો એજન્સીએ સ્પષ્ટ કર્યું કે આ ભૂકંપથી સુનામીનો કોઈ ખતરો નથી.

ભારત: જમ્મુ-કાશ્મીરના પુલવામામાં વહેલી સવારે આંચકો 

ભારત પણ આ ધરતીકંપની શ્રેણીથી બચ્યું નહીં. ગુરુવારે વહેલી સવારે 2:36 વાગ્યે જમ્મુ-કાશ્મીરના પુલવામા વિસ્તારમાં જમીનથી 15 કિ.મી ઊંડાઈએ 3.5 ની તીવ્રતાનો હળવો આંચકો નોંધાયો. નેશનલ સેન્ટર ફોર સીસ્મોલોજીના ડેટા મુજબ આંચકાથી સ્થાનિકોમાં ગભરાટ ફેલાયો પણ કોઈ જાનમાલની ખોટ કે નુકસાનના સમાચાર નથી.

નેપાળ: પાડોશમાં પણ ધરતી ધ્રુજી 

ભારતના પાડોશી નેપાળમાં પણ ગુરુવારે સવારે 5:21 વાગ્યે IST મુજબ 3.8 ની તીવ્રતાનો ભૂકંપ આવ્યો. આ પહેલા રવિવારે પણ નેપાળના દુર્ગમ હુમલા જિલ્લાના શ્રીનગર વિસ્તારમાં 4.1 ની તીવ્રતાનો આંચકો આવી ચૂક્યો છે. નેપાળમાં પણ તાજેતરના આંચકાઓથી કોઈ નુકસાન નોંધાયું નથી.

ટૂંકમાં, એક જ દિવસમાં વેનેઝુએલાથી જાપાન અને ભારત-નેપાળ સુધી ધરતીએ પોતાનો રોદ્ર રૂપ બતાવ્યો. વૈજ્ઞાનિકો આને “ભૂકંપની શ્રેણી” ગણી રહ્યા છે. નિષ્ણાતોની સલાહ છે કે હિમાલય અને પેસિફિક રિંગ ઓફ ફાયર વિસ્તારના લોકોએ આફ્ટરશોક્સ અને આગામી આંચકા માટે હંમેશા તૈયાર રહેવું જોઈએ.