રાજકોટ જિલ્લામાં ડિજિટલ કરન્સી આધારીત અનાજ વિતરણ માટે E-kycની કામગીરી પૂર્ણ
નવી સીસ્ટમનાં અમલથી ગ્રાહક ગમે ત્યાંથી રાશન લઇ શકશે
રાજકોટ સહીત સમગ્ર ગુજરાતમાં રાશનકાર્ડ ધારકોને સસ્તા અનાજનું રાશન લેવા જાય ત્યારે સર્વર ડાઉન હોવાના કારણે ધરમના ધક્કા થાય છે. આ હાલાકીમાંથી બહાર નીકળવા માટે રાજ્ય સરકારે સેન્ટ્રલ બેંક ડિજિટલ કરન્સી યોજના લઇ આવ્યું છે જેનો પાયલોટ પ્રોજેક્ટ શરૂ કરી દેવામાં આવ્યો છે ત્યારે હવે આ પ્રોજેકટ રાજકોટ જિલ્લામાં શરૂ કરવા યુધ્ધના ધોરણે કામગીરી ચાલી રહી છે. અત્યાર સુધીમાં ૧૬,૩૦૦થી વધુ રાશનકાર્ડ ઓન બોર્ડ કરાયા છે.
રાજકોટ જિલ્લામાં સેન્ટ્રલ બેંક ડિજિટલ કરન્સી પ્રોજેકટની કામગીરી ચાલી રહી છે જેમાં રાજ્ય સરકાર પુરવઠા વિભાગે પંજાબ નેશનલ બેંક સાથે ટાઇઅપ કરી ડિજિટલ કરન્સીની યોજના બનાવી છે જેમાં રાશનકાર્ડ ધારકો પાસે સ્માર્ટ ફોન હોય જેમાં ફુડ કુપન જનરેટ થશે જે કુપન સસ્તા અનાજના વેપારીની દુકાને ક્યુઆર કોડ સ્કેન કરતાની સાથે જ ગ્રાહકોને સસ્તા અનાજની કીટ મળી જશે.
આ નવી સીસ્ટમની અમલવારીથી સર્વર ડાઉન હોવાની વિટંબણામાંથી મુક્તિ મળી જશે એટલું જ નહીં આ સીસ્ટમ શરૂ થયા બાદ ગ્રાહક તેની ઇચ્છા મુજબ ગમે તે રાશનના વેપારી પાસેથી રાહતદરનું અનાજ, ખાંડ, ચોખા, તેલ સહીતની ચીજવસ્તુ લઇ શકશે.
રાજકોટ જિલ્લામાં ડિજિટલ કરન્સી આધારીત અનાજ વિતરણ માટે રાશનકાર્ડ ઓનબોર્ડ કરવાનું શરૂ કરી દેવાયું છે. જેમાં સરકાર જિલ્લાના ૧૧.૪૫ લાખ લાભાર્થીઓમાંથી કુલ ૧.૩૧ લાખ રાશનકાર્ડ એક્ટીવ છે જેમાંથી ૧૬,૩૦૦ના રાશનકાર્ડ ઓનબોર્ડ કરી દેવાયા છે. જ્યારે રાશનકાર્ડ ધારકોના પરિવારના સભ્યોની ઇ-કેવાયસીની ૯૮ ટકા કામગીરી પૂર્ણ થઇગઇ છે.
રાજકોટ જિલ્લા કલેકટર ડૉ. ઓમપ્રકાશના અધ્યક્ષ સ્થાને મળેલી બેઠકમાં ડિજિટલ કરન્સી આધારીત અનાજ વિતરણ વ્યવસ્થાની કામગીરી ઝડપી બનાવવા જિલ્લા પુરવઠા અધિકારી સુશીલ પરમારને ખાસ તાકીદ કરી છે.
ડિજિટલ કરન્સી પછી કરો પહેલા બે માસનું કમીશન તો ચુકવો: વેપારી
ડિજિટલ કરન્સી આધારીત અનાજ વિતરણ વ્યવસ્થા સામે રાજકોટ જિલ્લાના રેશનીંગના વેપારીઓમાં કચવાટ જોવા મયી રહ્યો છે. એક તરફ સરકાર ડિજિટલ કરન્સી આધારીત વિતરણ વ્યવસ્થાની વાતો કરે છે તો બીજી બાજુ બે-બે માસ થયા છતાં કેન્દ્ર સરકારે રાજકોટ સહિત રાજ્યભરના સસ્તા અનાજના વેપારીઓને કમીશન ચુકવ્યુ નથી.
રેશનીંગના વેપારીએ `વોઇસ ઓફ ડે’ સાથે વાતચીતમાં જણાવ્યું હતું કે, એકલા રાજકોટ જિલ્લામાં સસ્તા અનાજના વેપારીઓને બે માસનું કમીશન અને ક્રેડિટ મળી ૬૦ લાખ લેવાના નીકળે છે જે રકમ નહીં ચુકવતા ભારે રોષ જોવા મળી રહ્યો છે.
