આધાર ફ્રી થશે પણ LPG-CNG મોંઘા, તમારા ખિસ્સા પર પડશે ડબલ અસર

નવા મહિનાની શરૂઆત સાથે જ નવા નિયમો પણ દસ્તક દે છે. 1 જુલાઈ 2026થી દેશમાં 5 મોટા નાણાકીય ફેરફારો લાગુ થવા જઈ રહ્યા છે. આમાંથી કેટલાક નિર્ણયો તમારા ખિસ્સાને રાહત આપશે તો કેટલાક ખર્ચ વધારશે. આધારમાં ઈમેલ અપડેટ મફત થશે, પણ LPG, CNG, ATFના ભાવ અને HDFC ક્રેડિટ કાર્ડના નિયમોમાં ફેરફારથી તમારું બજેટ ખોરવાઈ શકે છે. જાણો કઈ વાત તમને ફાયદો કરાવશે અને ક્યાં સાવધાન રહેવું પડશે.

1. આધારમાં ઈમેલ અપડેટ હવે બિલકુલ ફ્રી 

UIDAIએ આધાર ધારકોને મોટી રાહત આપી છે. 1 જુલાઈથી 31 ડિસેમ્બર 2026 સુધી 6 મહિના માટે આધારમાં ઈમેલ આઈડી અપડેટ કે લિંક કરવાની સુવિધા એકદમ મફત રહેશે. હાલ આ માટે 75 + GST ચાર્જ લેવાય છે. પરંતુ ધ્યાન રાખો, આ ફ્રી સુવિધા માત્ર ‘આધાર મોબાઈલ એપ’ દ્વારા જ મળશે. સેન્ટર પર જશો તો પૈસા ચૂકવવા પડશે. ઈમેલ લિંકથી OTP, અલર્ટ અને આધાર ડાઉનલોડ વધુ સુરક્ષિત બને છે.

2. LPG સિલિન્ડરના ભાવમાં ફેરફાર થઈ શકે છે 

મિડલ ઈસ્ટના તણાવને કારણે LPGના ભાવમાં સત વધારો જોવા મળી રહ્યો છે. જૂનમાં કોમર્શિયલ સિલિન્ડર 53.50 મોંઘો થઈને દિલ્હીમાં 3113.50 પહોંચ્યો હતો. ઘરગથ્થુ સિલિન્ડરના ભાવ જૂનમાં સ્થિર હતા, પણ 1 જુલાઈએ ઓઈલ કંપનીઓ નવી કિંમતો જાહેર કરશે. આંતરાષ્ટ્રીય કિંમતોના આધારે ઘરગથ્થુ સિલિન્ડર મોંઘો થવાની શક્યતા છે, જેનાથી રસોડાનું બજેટ ખોરવાશે.

આ પણ વાંચો: 1 જુલાઈથી 6 મહિના સુધી આધાર ધારકો માટે આ સુવિધા બિલકુલ ફ્રી

3. ATF, CNG અને PNGના દરોમાં બદલાવ 

દર મહિનાની 1 તારીખે એવિએશન ટર્બાઇન ફ્યુઅલ, CNG અને PNGના ભાવ રિવાઈઝ થાય છે. જૂનમાં CNG અને ATF બંનેના ભાવ વધ્યા હતા. સરકાર PNGને પ્રોત્સાહન આપી રહી છે, એટલે જુલાઈમાં પણ આ ત્રણેય ઈંધણના ભાવમાં વધઘટ થઈ શકે છે. CNG મોંઘો થશે તો કાર-ઓટો ચલાવનારાઓનું ખર્ચ વધશે, અને એર ટિકિટ પણ મોંઘી થઈ શકે છે.

4. HDFC રેગૅલિયા ગોલ્ડ કાર્ડના લાઉન્જ નિયમો કડક 

HDFC બેન્કના પ્રીમિયમ કાર્ડ યુઝર્સ માટે ખરાબ સમાચાર. રેગૅલિયા ગોલ્ડ ક્રેડિટ કાર્ડ પર મળતી ફ્રી ડોમેસ્ટિક એરપોર્ટ લાઉન્જની સુવિધા હવે શરતી બની છે. બેન્કે નવી પોલિસી મુજબ, આગામી ત્રિમાસિક ગાળામાં ફ્રી લાઉન્જ જોઈતો હોય તો અગાઉના ક્વાર્ટરમાં કાર્ડથી ઓછામાં ઓછા 60,000 ખર્ચ કરવો ફરજિયાત રહેશે. લાઉન્જનો વધુ પડતો ઉપયોગ રોકવા બેન્કે આ પગલું લીધું છે, જેનાથી વારંવાર મુસાફરી કરનારાઓને ફટકો પડશે.

5. જુલાઈમાં બેન્કો સામાન્ય દિવસે ખુલ્લી રહેશે 

ગુજરાતના લોકો માટે રાહતની વાત એ છે કે જુલાઈ 2026માં કોઈ મોટી જાહેર રજા નથી. RBIના કેલેન્ડર મુજબ આ મહિને બેન્કો માત્ર બીજા-ચોથા શનિવાર અને રવિવારે જ બંધ રહેશે. બાકીના બધા દિવસે નિયમિત બેન્કિંગ કામકાજ ચાલુ રહેશે. એટલે પૈસા જમા-ઉપાડ, લોન કે અન્ય કામ માટે તમારે રજાનો ટેન્શન રાખવો નહીં પડે.

ખિસ્સા પર અસર:

ટૂંકમાં કહીએ તો 1 જુલાઈથી આધાર અપડેટ કરાવીને 75 બચાવી શકો છો, પણ LPG અને CNG મોંઘા થાય તો માસિક ખર્ચમાં 200-300નો વધારો થઈ શકે છે. HDFC કાર્ડ યુઝર હોય તો લાઉન્જ માટે ખર્ચનું પ્લાનિંગ જરૂરી છે.