કતારના મુખ્ય ગેસ હબમાં ભીષણ વિસ્ફોટમાં 54 ઘાયલ; 18 લાપતા
વૈશ્વિક ઊર્જા બજારમાં ચિંતા
કતારના રાસ લાફાન ઔદ્યોગિક વિસ્તારમાં આવેલા મુખ્ય કુદરતી ગેસ નિકાસ કેન્દ્રમાં રવિવારે રાત્રે થયેલા ભીષણ વિસ્ફોટ અને આગની ઘટનામાં ઓછામાં ઓછા 54 લોકો ઘાયલ થયા છે, જ્યારે 18 લોકો હજુ પણ લાપતા હોવાનું સત્તાવાર સૂત્રોએ જણાવ્યું છે. ઇરાન સાથેના યુદ્ધ દરમિયાન થયેલા હુમલાઓ બાદ બંધ કરાયેલી સુવિધાઓને ફરી કાર્યરત બનાવવાના પ્રયાસો દરમિયાન આ દુર્ઘટના સર્જાઈ હતી.
કતારએનર્જીના જણાવ્યા મુજબ રાસ લાફાન સ્થિત બરઝન ગેસ સપ્લાય સુવિધામાં પુનઃપ્રારંભની કામગીરી ચાલી રહી હતી ત્યારે અચાનક વિસ્ફોટ થયો અને ત્યારબાદ આગ ફાટી નીકળી હતી. શરૂઆતમાં થોડા લોકો જ ઇજાગ્રસ્ત થયા હોવાનું જણાવાયું હતું, પરંતુ કલાકો બાદ ગૃહ મંત્રાલયે ઘાયલો અને લાપતા લોકોની મોટી સંખ્યાની પુષ્ટિ કરી હતી.
આ પણ વાંચો: ૨૫૦ કિમીની ઝડપે કાર દોડાવતા બે મિત્રોના મોત
નોંધનીય છે કે ઇરાને હોર્મુઝની ખાડી બંધ કરી દેતાં કતારને ગેસ ઉત્પાદન અને નિકાસ કામગીરી અટકાવવી પડી હતી. હવે યુદ્ધવિરામ અને વાટાઘાટોની પ્રક્રિયા આગળ વધી રહી હોવાથી કતાર ફરીથી નિકાસ વ્યવસ્થા શરૂ કરવાનો પ્રયાસ કરી રહ્યું હતું. જોકે આ વિસ્ફોટે સમગ્ર પ્રક્રિયાને મોટો ઝટકો આપ્યો છે.
વિશ્વના અગ્રણી એલએનજી ઉત્પાદકોમાં સામેલ કતારમાં થયેલી આ ઘટનાથી વૈશ્વિક ઊર્જા બજારમાં ચિંતા ફેલાઈ છે. રાસ લાફાન વિશ્વના સૌથી મહત્વપૂર્ણ ગેસ નિકાસ કેન્દ્રોમાંનું એક ગણાય છે. માર્ચ મહિનામાં પણ ઇરાની મિસાઇલ હુમલાથી અહીં આગ લાગી હતી અને વ્યાપક નુકસાન થયું હતું. આ કુદરતી ગેસ સંપત્તિએ કતારને વૈશ્વિક સ્તરે પ્રભાવશાળી દેશ તરીકે ઉભરવામાં મહત્વની ભૂમિકા ભજવી છે.
અસરગ્રસ્ત ગેસ પ્લાન્ટનું કતાર માટે અદકેરું મહત્વ
રાસ લાફાન સ્થિત બરઝન ગેસ સપ્લાય પ્લાન્ટ દરરોજ આશરે 1.4 અબજ સ્ટાન્ડર્ડ ક્યુબિક ફૂટ વેચાણલાયક ગેસ ઉત્પાદન કરવાની ક્ષમતા ધરાવે છે. આ ગેસનો ઉપયોગ મુખ્યત્વે કતારમાં વીજ ઉત્પાદન અને દરિયાના પાણીના મીઠાશમુક્તીકરણ (ડિસેલિનેશન) પ્લાન્ટોને ચલાવવા માટે થાય છે. પ્લાન્ટમાં કતારનો લગભગ સંપૂર્ણ હિસ્સો છે, જ્યારે અમેરિકાની એક્સોનમોબિલની નાની ભાગીદારી પણ તેમાં સામેલ છે. કતારની ઊર્જા અને પાણી પુરવઠા વ્યવસ્થામાં આ સુવિધા અત્યંત મહત્વપૂર્ણ છે.
