૧૧ કરોડના ખર્ચે ટેન્કરના ૧.૦૬ લાખ ફેરા કરાવી પાણી આપશે મહાપાલિકા!

કરોડોના ખર્ચે નખાયેલી ડીઆઈ પાઈપલાઈન મારફતે પૂરતા ફોર્સથી દૈનિક પાણી વિતરણની વાતો વચ્ચે…

૧૮માંથી ૧૦ વોર્ડના અનેક વિસ્તારો હજુ ટેન્કરયુગમાં જ જીવે છે: ટેન્ડર પ્રક્રિયામાં બે જ એજન્સીએ `રસ’ લીધો

પાંચ હજારથી ૨૦,૦૦૦ લીટરના ટેન્કર પાણી પહોંચાડવા જશે: આજે દરખાસ્ત પર નિર્ણય લેશે સ્ટેન્ડિંગ કમિટી

માત્ર કાગળ પર જ રહી ગયેલા સ્માર્ટ સિટી રાજકોટમાં કરોડો રૂપિયાના ખર્ચે મહાપાલિકા દ્વારા ડીઆઈ પાઈપ લાઈન નાખીને લોકોને હવે દૈનિક પૂરતા ફોર્સથી પાણી વિતરણ થશે તેવી મસમોટી વાતો કરી હતી. હજુ આખા શહેરમાં ડીઆઈ લાઈનનું નેટવર્ક પ્રસ્થાપિત થઈ શક્યું નથી બરાબર ત્યારે જ એવી આશ્ચર્યજનક વિગત સામે આવી છે કે શહેરના ૧૮માંથી ૧૦ વોર્ડના અનેક વિસ્તારો હજુ પણ ટેન્કરયુગમાં જીવી રહ્યા છે ! આ વિસ્તારોમાં પાણી સપ્લાયનું વ્યવસ્થિત નેટવર્ક ન હોવાને કારણે મહાપાલિકા ટેન્કર મારફતે પાણી વિતરણ કરી રહી છે ત્યારે હવે ૧૧ કરોડના ખર્ચે બે વર્ષ સુધી ૧૦ વોર્ડમાં ટેન્કરના ફેરા કરાવીને પાણી પૂરું પાડશે.

મ્યુનિસિપલ કમિશનર દ્વારા ટેન્કર મારફતે પાણી વિતરણ કરવાની કરાયેલી દરખાસ્ત પર આજે બુધવારે સ્ટેન્ડિંગ કમિટી દ્વારા નિર્ણય લેવામાં આવશે. આ માટે ઝોનવાઈઝ કરાયેલી ટેન્ડર પ્રક્રિયામાં માત્ર બે જ એજન્સીએ `રસ’ લેતા હવે તેમને કામ આપવાનું સુચન કરવામાં આવ્યું છે. આ એજન્સી ડી.બી.વઢરકિયા અને શાંતિલાલ ગાંગજીભાઈ એન્ડ કંપની નામની એજન્સી છે. બન્ને એજન્સી દ્વારા વોર્ડ નં.૧,૩,૪,૫,૬,૯, ૧૧, ૧૨, ૧૬ અને ૧૮ એમ દસ વોર્ડમાં પાંચ હજારથી લઈ ૨૦,૦૦૦ લીટરના ટેન્કર મારફતે દૈનિક, એકાંતરા, બે દિવસે પાણી વિતરણ કરવામાં આવશે.

આ પણ વાંચો: રૂા.૨૭૦ની થાળી વેચતા `બાલાજી થાળ’માંથી ધનેડાવાળો લોટ પકડાયો

આ પ્રમાણે જોવા જઈએ તો દસ વોર્ડમાં એક વર્ષ દરમિયાન ૧,૦૬,૮૭૪ ફેરા ટેન્કરના થશે. ટેન્કરના સૌથી વધુ ફેરા વોર્ડ નં.૧૮માં થવા પામશે. આ વોર્ડની ૬૮ સોસાયટી-વિસ્તારોમાં ટેન્કર મારફતે પાણી મોકલવામાં આવશે. શીતળાધાર શેરી નં.૩૩ અને ૨૫ સ્લમ વિસ્તાર હોવાથી ત્યાં નળ કનેક્શન નથી જ્યારે શિવાલય પરિસર પાસે પાણીની લાઈન નાખવા માટેની ટેન્ડર પ્રક્રિયા કરાઈ હોવાનું જાણવા મળ્યું છે. આ સિવાય અન્ય વિસ્તારો જેમાં હરિદ્વાર, મારૂતિ એપાર્ટમેન્ટ, શ્યામ કિરણ રેસિડેન્સી, વ્રજવાટિકા સોસાયટી, ભક્તિ એવન્યુ સહિતના વિસ્તારો કે જે વોર્ડ નં.૧૮માં સમાવિષ્ટ છે ત્યાં પાણી વિતરણ માટેની લાઈન જ ન હોવાથી ટેન્કર મારફતે જ પાણી આપવા સિવાયનો `રસ્તો’ મહાપાલિકા પાસે નથી.