કોઈ પણ પ્રકારના ફૂડ પેકેટમાં સ્ટેપલર પીન નહી મારી શકાય
-FSSAI નો નવો કડક નિયમ, ભંગ કરનાર સામે થશે કડક કાર્યવાહી
-વેપારીઓએ ફૂડ-ગ્રેડ સેફ્ટી ગ્લુ, દોરી, રબર બેન્ડ અથવા સેલ્ફ-લોકિંગ પેપર બોક્સ જેવા વિકલ્પો અપનાવવા પડશે.
ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ ગ્રાહકોના સ્વાસ્થ્ય અને સલામતીને ધ્યાનમાં રાખીને એક મોટો નિર્ણય લીધો છે. હોટલ, રેસ્ટોરન્ટ, બેકરી અને અન્ય ફૂડ બિઝનેસ ઓપરેટરો ને હવે ખાદ્ય પદાર્થોના પેકેજિંગમાં સ્ટેપલ પિન અથવા મેટલ વાયરનો ઉપયોગ કરવા પર સંપૂર્ણપણે પ્રતિબંધ મૂકી દીધો છે. જો કોઈ ફૂડ બિઝનેસ ઓપરેટર આ નિયમનો અનાદર કરશે, તો તેની સામે કાયદેસરની કડક કાર્યવાહી કરવામાં આવશે.
FSSAI ના સર્વેક્ષણમાં સામે આવ્યું છે કે, હોટલ, રેસ્ટોરન્ટ અને સ્થાનિક દુકાનદારો ખાદ્ય સામગ્રી પાર્સલ કરતી વખતે અથવા કેક બોક્સ, મીઠાઈના ડબ્બા, ફરસાણના પાઉચ અને ડેકોરેટિવ કેકને ફિક્સ કરવા માટે મોટા પાયે સ્ટેપલર પિન કે લોખંડના ઝીણા વાયરનો ઉપયોગ કરે છે.
આ પણ વાંચો: સરકારના જીડીપી વૃદ્ધિના આંકડા શંકાસ્પદ, રઘુરામ રાજને કહ્યું,” અર્થતંત્રમાં કંઈક ખોટું”
આ પદ્ધતિ ગ્રાહકોના સ્વાસ્થ્ય માટે અત્યંત જોખમી સાબિત થઈ શકે છે. ઘણી વખત પેકિંગ ખોલતી વખતે આ નાની પિન અજાણતા ખોરાકમાં ભળી જાય છે. જો આવી પિન ગ્રાહકના પેટમાં જતી રહે, તો શરીરના આંતરિક અંગોને ગંભીર નુકસાન કે ઈજા થઈ શકે છે. આ ગંભીર જોખમને ધ્યાનમાં રાખીને જ જાહેર જનતાના સ્વાસ્થ્યની સુરક્ષા કાજે આ એડવાઇઝરી બહાર પાડવામાં આવી છે.
વેપારીઓએ હવે સ્ટેપલરના બદલે ફૂડ-ગ્રેડ સેફ્ટી ગ્લુ, દોરી, રબર બેન્ડ અથવા સેલ્ફ-લોકિંગ પેપર બોક્સ જેવા સુરક્ષિત વિકલ્પો અપનાવવા પડશે.
નવો નિયમ કોને કોને લાગુ થશે
આ પ્રતિબંધ ફૂડ ઇન્ડસ્ટ્રી સાથે જોડાયેલી તમામ નાની-મોટી પેકેજિંગ પ્રક્રિયાઓ પર સમાન રીતે લાગુ પડશે: કેક બોક્સ, પેસ્ટ્રી કન્ટેનર અને બ્રેડના પેકેટ્સ, હોટલ કે રેસ્ટોરન્ટમાંથી મળતા તમામ પ્રકારના ફૂડ પાર્સલ્સ, કાજુ કતરી, પેંડા કે અન્ય મીઠાઈના બોક્સનું સીલિંગ, ફરસાણ, વેફર્સ કે ડ્રાયફ્રૂટ્સના પેકિંગ ટૂંકમાં, ગ્રાહક સુધી પહોંચતા કોઈપણ ખાદ્ય પદાર્થને બાંધવા, સીલ કરવા અથવા સ્ટેપલ કરવા માટે ધાતુની પિનનો ઉપયોગ હવે ગુનો ગણાશે.
