બન્ને જૂથ વિવાદિત જમીન પર એકત્ર થતા થઇ માથાકૂટ, ત્રણ રાઉન્ડ હવામાં, બે ફાયર જમીન તરફ કર્યા
અમદાવાદના નેહરુનગર વિસ્તારમાં આવેલી જમીનની માથાકુટમાં નિવૃત ડીવાયએસપી ધડાધડ પાચ રાઉન્ડ ફાયરિગ કરતા નાસભાગ થઇ પડી હતી. ક બે જૂથો વચ્ચે ચાલી રહેલા જમીન સંબંધી વિવાદમાં આ ઘટના ઘટી હોવાનું પોલીસની પ્રાથમિક તપાસમાં સામે આવ્યું છે.
પોલીસ સૂત્રો પાસેથી મળતી માહિતી મુજબ, વિવાદિત જમીન પર બંને જૂથના ઈસમો સામસામે આવી ગયા હતા. શાબ્દિક ઘર્ષણ થયું હતું, ઉગ્રતા વધી જતા નિવૃત્ત ડીવાયએસપી અશ્વિન ચૌહાણે પોતાની પિસ્તોલ કાઢીને હવામાં ત્રણ રાઉન્ડ અને બે રાઉન્ડ જમીનમાં ફાયરીંગ કર્યું હતું. સદનસીબે કોઈ જાનહાનિ કે કોઈને ગંભીર ઈજા થઈ નહોતી.
ઘટનાનો વીડિયો પણ વાઈરલ થઈ રહ્યો છે, જેમાં નિવૃત્ત ડીવાયએસપી અશ્વિન ચૌહાણ કહી રહ્યા છે કે મારી મંજૂરી વગર આ પ્રોપર્ટીમાં તમે પગ કેવી રીતે મૂક્યો, બહાર નીકળો નહીંતર લાશો પડી જશે, કોર્ટમાં મળીશું, તેમ કહી એક બાદ એક રાઉન્ડ હવામાં ફાયરિગ કરે છે. સેટેલાઇટ પોલીસ સ્ટેશનનો કાફલો તાત્કાલિક ઘટનાસ્થળે દોડી ગયો હતો. બંને જૂથના ૧૦ જેટલા લોકોને રાઉન્ડઅપ કરાયા હતા,
નિવૃત્ત ડીવાયએસપી સામે ગુનો નોંધી આગળની કાયદેસરની કાર્યવાહી હાથ ધરી છે, પિસ્તોલને કબજે કરવામાં આવી છે. આ જમીનની માલિકી અને કબજા અંગે દસ્તાવેજી પુરાવાઓ સહિતની બાબતો અંગે પણ પોલીસે તપાસ હાથ ધરી છે. નિવૃત પોલીસ અધિકારીએ કરેલા ફાયરિગના પગલે પોલીસ બેડામાં પણ ભારે ચર્ચા જાગી છે.
