રાજકોટમાં એક કલાકમાં દોઢ ઈંચ વરસાદ: કરાં પણ જોરદાર વરસ્યા, અનેક વિસ્તારોમાં વૃક્ષ ધરાશાયી,ઠેર-ઠેર પાણી ભરાયા
કુદરતની કળા કેવી નિરાળી છે તેની કલ્પના કાળા માથાનો માનવી ક્યારેય કરી શક્યો નથી અને કરી શકવાનો પણ નથી. ફરીવાર કુદરતે આવી જ કળા બતાવી ગરમીથી શેકાતાં રાજકોટને એક જ કલાકમાં ઠંડુંગાર કરી દીધું હતું. ગુરૂવારે બપોરે 4 વાગ્યે આસપાસ રાજકોટમાં વરસાદ વરસવાનું શરૂ થયું હતું જે એક કલાક સુધી યથાવત રહેતા 1.5 ઇંચ પાણી વરસી જવાને કારણે વાતાવરણમાં ઠંડક પ્રસરી ગઈ હતી. આ સાથે જ રાજકોટમાં સવારે 8:30 વાગ્યે 24 ડિગ્રી, બપોરે 2:30 વાગ્યે 35 ડિગ્રી અને સાંજે 5:30 વાગ્યે તો જાણે કે શિયાળો હોય તે પ્રમાણે તાપમાનનો પારો ગગડીને 19 ડિગ્રીએ પહોંચી ગયો હતો!
શહેરમાં એક કલાક સુધી વરસાદ તો પડ્યો જ હતો સાથે સાથે 15 મિનિટ સુધી માથામાં ઢીમડા થઈ જાય તેવા μεγάા કરાં પણ પડતાં તેના અવાજથી લોકો ગભરાઈ ગયા હતા. આ સાથે જ વર્ષો બાદ રાજકોટમાં કરાંનો વરસાદ પણ જોવા મળ્યો હતો. વાતાવરણમાં પલટાને કારણે બપોરે 4 વાગ્યે મધરાત જેવું અંધારું થઈ જતાં વિઝિબિલિટી સાવ ઘટી જતાં ભરબપોરે વાહનચાલકોએ પોતાના વાહનની હેડલાઈટ ચાલુ કરવી પડી હતી.
બીજી બાજુ વાતાવરણે અચાનક જ પલટો લેતા વરસાદ અને કરા પડ્યા હતા સાથે સાથે વીજળીના કડાકા-ભડાકાને કારણે લોકોમાં ગભરાટ ફેલાઈ જવા પામ્યો હતો. વરસાદને કારણે અનેક વિસ્તારોમાં વૃક્ષ ધરાશાયી થઈ જવાને કારણે વીજળી ગુલ થઈ ગઈ હતી સાથે સાથે દર વરસાદની જેમ આ વખતે પણ ઠેર-ઠેર પાણીના તળાવ પણ ભરાઈ ગયા હતા.
વરસાદની આગાહી
વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જેવી સિસ્ટમ સક્રિય
વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જેવી સિસ્ટમ સક્રિય થવાને કારણે ગુજરાતના વાતાવરણમાં પલટો આવ્યો છે. જેના કારણે મોડી રાતથી અમદાવાદ, ગાંધીનગર, કચ્છ સહિત રાજ્યના અનેક વિસ્તારોમાં ભારે પવન ફૂંકતા ધૂળની ડમરીઓ ઊડી હતી. હવામાન વિભાગે આ દરમિયાન ત્રણ કલાકનું નોકકાસ્ટ (Nowcast) જાહેર કર્યું છે, જેમાં અનેક જિલ્લાઓમાં રેડ એલર્ટ જાહેર કરાયું છે.
9 જિલ્લાઓમાં રેડ એલર્ટ
હવામાન વિભાગના નોકકાસ્ટ મુજબ, આજે (19 માર્ચ) દેવભૂમિ દ્વારકા, પોરબંદર, જામનગર, રાજકોટ, જૂનાગઢ, ગીર-સોમનાથ, દીવ, કચ્છ, અમરેલી અને પાટણ જિલ્લાઓમાં પવનની ઝડપ 62થી 87 કિ.મી. પ્રતિ કલાક રહેશે અને કમોસમી વરસાદને કારણે રેડ એલર્ટ જાહેર કરાયું છે.
જ્યારે મોરબી, સુરેન્દ્રનગર, બોટાદ, ભાવનગર, બનાસકાંઠા, સાબરકાંઠા, મહેસાણા, અમદાવાદ, ગાંધીનગર, અરવલ્લી અને મહીસાગર જિલ્લાઓમાં પવનની ઝડપ 41થી 61 કિ.મી. પ્રતિ કલાક રહેશે. આ સાથે કમોસમી વરસાદ, મેઘગર્જના અને કરા પડવાની શક્યતા પણ છે.
ખેડા, આણંદ, વડોદરા, પંચમહાલ, દાહોદ, છોટા ઉદેપુર, ભરૂચ, નર્મદા, સુરત, તાપી, ડાંગ અને નવસારી, વલસાડ જિલ્લાઓમાં યલો એલર્ટ જાહેર કરાયું છે.
