રાજકોટના કટારિયા બ્રિજનું કામ હજુ સવા વર્ષ ચાલશે: 26 પિલર મુકાયા, સપ્ટેમ્બર 2027માં બ્રિજ ખુલ્લો મુકી દેવા તૈયારી
રાજકોટના કટારિયા ચોકડી પાસે 167 કરોડના ખર્ચે પોણો કિલોમીટર લાંબા અને 23.10 મીટર પહોળા આઈકોનિક બ્રિજનું કામ પૂરજોશમાં ચાલી રહ્યું છે. જો કે હજુ બ્રિજ તૈયાર થવામાં સવા વર્ષ જેવો સમય લાગી જનાર હોવાનું અને સપ્ટેમ્બર 2027 સુધીમાં તેને ખુલ્લો મુકી દેવામાં આવનાર હોવાનું મહાપાલિકાના સૂત્રોએ જણાવ્યું હતું.
આ બ્રિજનું અત્યાર સુધીમાં 35% કામ પૂર્ણ કરી લેવામાં આવ્યું છે. બ્રિજના તમામ 26 પિલર મુકી દેવામાં આવ્યા છે સાથે સાથે 26માંથી 24 પિલરની કેપ પણ તૈયાર થઈ ચૂકી છે. 104માંથી 52 ગર્ડર તૈયાર થયા છે તો અન્ડરપાસમાં 786 રનિંગ મીટરમાંથી 466 રનિંગ મીટરનું કામ પૂર્ણ કરાયું છે. અન્ડરપાસ બોક્સ રાફ્ટનું કામ પણ પૂર્ણ કરાયું છે અને સ્લેબનું કામ પણ પ્રગતિ હેઠળ છે. સુપર સ્ટ્રક્ચર અને એકસ્ટ્રા ડોઝ પોર્શનનું કામ હવે હાથ પર લેવામાં આવશે.
સૂત્રોએ ઉમેર્યું કે પ્રોજેક્ટના મહત્ત્વપૂર્ણ એવા એકસ્ટ્રા ડોઝ પોર્શન માટેની પૂર્વ તૈયારીઓ પૂરી કરવામાં આવી છે. આ કામગીરી માટેના પાઈલ બેઝનું 28 દિવસનું જરૂરી ટેસ્ટિંગ પણ પૂરું થયું છે. હાલમાં ડિઝાઇન મંજૂરી માટે મુકવામાં આવી છે જે મળી ગયા બાદ ઝડપથી ગ્રાઉન્ડ લેવલ પર કામગીરી શરૂ કરાશે. એકંદરે આ બ્રિજ માટે અત્યાર સુધીમાં 11422 ક્યુબિક મીટર કોંક્રિટ અને 1050 મેટ્રિક ટન સ્ટીલનો ઉપયોગ કરવામાં આવ્યો છે. આ બ્રિજ ખુલ્લો મુકાવાથી 2 લાખ લોકોને ફાયદો મળશે.
