Bahrain Bapco Oil Company: ક્રૂડ ઓઇલના વધતાં ભાવ વચ્ચે બેહરીનની સૌથી મોટી ઓઇલ રિફાઇનરી પર ઇરાનનો હુમલો, 32 લોકો ઘાયલ

ઇરાન દ્વારા ખાડી વિસ્તારમાં હુમલાઓનો સિલસિલો વધુ તેજ બન્યો છે. સોમવારે ઇરાને બેહરીનની સૌથી મોટી ઓઇલ રિફાઇનરી BAPCO નજીક ડ્રોન હુમલો કરતા સમગ્ર વિસ્તારમાં ભારે ધુમાડાના ગોટાળા જોવા મળ્યા હતા. હુમલો બેહરીનની રાજધાની મનામા નજીક આવેલા સિત્રા વિસ્તારમાં થયો હોવાનું સત્તાવાર સૂત્રોએ જણાવ્યું છે.

હુમલાના કારણે ઓછામાં ઓછા 32 લોકો ઘાયલ થયા, જેમાં ચાર બાળકો અને બે મહિનાનું એક શિશુ પણ સામેલ છે. બેહરીનના આરોગ્ય મંત્રાલયે જણાવ્યું હતું કે ઘાયલોમાંથી ચારની હાલત ગંભીર છે. ડ્રોન હુમલાથી આસપાસના વિસ્તારમાં નુકસાન થયું હતું અને કેટલીક ઇમારતો તથા ઈન્ફ્રાસ્ટ્રક્ચરને અસર પહોંચી હતી.

સોશિયલ મીડિયા પર વાયરલ થયેલા વીડિયોમાં બેહરીનની મુખ્ય ઓઇલ રિફાઇનરીની દિશામાંથી ઘાટા કાળા ધુમાડાના ગોટાળા આકાશમાં ઉઠતા જોવા મળ્યા હતા. જોકે અધિકારીઓએ તરત જ સ્પષ્ટતા કરી હતી કે રિફાઇનરીને સીધી અસર થઈ છે કે નહીં તેની તપાસ ચાલુ છે. BAPCO રિફાઇનરી બેહરીનની સૌથી મહત્વપૂર્ણ ઉર્જા સુવિધા છે અને દેશના ક્રૂડ ઓઇલ પ્રોસેસિંગ તથા નિકાસ માટે કેન્દ્રિય ભૂમિકા ભજવે છે.

આ પણ વાંચો :અમેરિકા-ઇઝરાયલ વચ્ચે મતભેદ! ઇરાનના તેલ ભંડારો પર પૂછ્યા વિના કર્યો હુમલો, ઈઝરાયલની આ હરકતથી ટ્રમ્પ થયા લાલઘૂમ

હુમલા બાદ બેહરીનની રાજ્ય માલિકીની ઓઇલ કંપનીએ “ફોર્સ મેજ્યોર” જાહેર કર્યું છે. એટલે કે અનિશ્ચિત પરિસ્થિતિઓને કારણે તે હાલ માટે પોતાના આંતરરાષ્ટ્રીય કરારો પૂર્ણ કરી શકશે નહીં. આ પગલાંને કારણે વૈશ્વિક બજારમાં તેલ પુરવઠા અંગે ચિંતા વધી છે અને મધ્યપૂર્વના યુદ્ધના કારણે તેલના ભાવમાં પણ ઉછાળો નોંધાયો છે.

આ હુમલા પછી બેહરીનના હવાઈ ક્ષેત્રને તાત્કાલિક બંધ કરવામાં આવ્યું હતું, જેના કારણે બેહરીન ઇન્ટરનેશનલ એરપોર્ટ પર ફ્લાઇટ ઓપરેશન્સ તાત્કાલિક સ્થગિત કરવામાં આવ્યા હતા. એરપોર્ટ સત્તાવાળાઓએ જણાવ્યું હતું કે પરિસ્થિતિ સામાન્ય થયા બાદ જ હવાઈ સેવાઓ ફરી શરૂ થશે.

બેહરીન પર હુમલા સાથે જ ઇરાને અન્ય ખાડી દેશો પર પણ તાજા હુમલા શરૂ કર્યા હોવાના અહેવાલો સામે આવ્યા છે, જેના કારણે સમગ્ર ગલ્ફ વિસ્તારમાં સુરક્ષા તણાવ વધુ વધ્યો છે.

ખાડીમાં ઈરાની આક્રમણ

બેહરીન પર હુમલા સાથે જ ઇરાને અન્ય ખાડી દેશો પર પણ તાજા હુમલા શરૂ કર્યા હોવાના અહેવાલો સામે આવ્યા છે, જેના કારણે સમગ્ર ગલ્ફ વિસ્તારમાં સુરક્ષા સંબંધિત સ્થિતિ વધુ ગંભીર બની છે

સાઉદી અરેબિયા

સાઉદી અરેબિયાના રક્ષા મંત્રાલયે જણાવ્યું હતું કે રુબ અલ ખાલી રણ વિસ્તારમાં દેશની વાયુસેનાએ એક ડ્રોનને તોડી પાડ્યું હતું. આ ડ્રોન શાયબા ઓઇલફિલ્ડ તરફ જઈ રહ્યું હતું, જે દરરોજ લગભગ 10 લાખ બેરલ ક્રૂડ ઓઇલ ઉત્પાદન ક્ષમતા ધરાવે છે. તે પહેલાં સાઉદી સેનાએ પ્રિન્સ સુલતાન એરબેઝ પર નિશાન બનાવતા બેલિસ્ટિક મિસાઈલ હુમલાઓને પણ નિષ્ફળ બનાવ્યા હતા. ઇરાનના હુમલાઓમાં સાઉદી અરેબિયામાં ઓછામાં ઓછા બે લોકોના મોત થયા હોવાનું જણાવાયું છે.

કતાર

કતારના રક્ષા મંત્રાલયે જણાવ્યું હતું કે દેશની સેનાએ એક મિસાઈલ હુમલાને સફળતાપૂર્વક અટકાવ્યો હતો. રાજધાની દોહામાં અનેક ધડાકા સાંભળાયા હતા, જેના બાદ સરકાર દ્વારા નાગરિકોને ઘરમાં જ રહેવાની અપીલ કરવામાં આવી હતી.

કુવૈત

કુવૈતમાં પણ ઇરાન દ્વારા ડ્રોન હુમલાનો પ્રયાસ થયો હતો. કુવૈતી સેનાએ અનેક શત્રુ ડ્રોનને તોડી પાડ્યા હોવાનું જણાવ્યું છે. આ હુમલામાં મુખ્યત્વે ઈંધણ સંગ્રહ સુવિધાઓને નિશાન બનાવવાનો પ્રયાસ કરવામાં આવ્યો હતો.