રિપિટ હિસ્ટ્રી, ડિફીટ હિસ્ટ્રી: ભારત બન્યું ક્રિકેટનું ‘બાદશાહ’, સૂર્યાબ્રિગેડે 150 કરોડ લોકોના દિલ જીતી લીધા, સળંગ બીજો ટી-20 વર્લ્ડકપ ભારતના નામે
ટી-20 વર્લ્ડકપનો ફાઈનલ મુકાબલો, અમદાવાદનું નરેન્દ્ર મોદી સ્ટેડિયમ અને સામે ન્યુઝીલેન્ડની ટીમ કે જેની સામે ભારતીય ટીમ ટી-20 વર્લ્ડકપમાં ક્યારેય જીતી શકી નહોતી, સાથે સાથે પાછલા વર્લ્ડકપને જીતવાનો પડકાર… આ બધી જ ચેલેન્જને પાછળ છોડી ટીમ ઇન્ડિયાએ ક્રિકેટમાં ઈતિહાસ દોહરાવ્યો છે અને સાથે સાથે ઈતિહાસ બદલ્યો પણ છે. ફાઈનલમાં ન્યુઝીલેન્ડને 96 રનથી કારમો પરાજય આપી ભારતની ‘સૂર્યાબ્રિગેડે’ 150 કરોડ દિલ ખુશ કરી દીધા હતા. આ સાથે જ ભારતે ત્રીજી વખત ટી-20 વર્લ્ડકપ પણ જીત્યો છે. ભારત એવો પહેલો દેશ બન્યો છે જેણે ટી-20 વર્લ્ડકપ ટ્રોફીને ડિફેન્ડ મતલબ કે બચાવી છે.
ટોસ હાર્યા બાદ પહેલાં બેટિંગ કરવા માટે ઉતરેલી ભારતીય ટીમે 20 ઓવરમાં 255 રનનો રેકોર્ડ સ્કોર બનાવ્યો હતો. આ કોઈ પણ ટી-20 વર્લ્ડકપના ફાઈનલમાં ટીમે બનાવેલો સૌથી મોટો સ્કોર હતો. આ સ્કોર સુધી પહોંચાડવામાં સંજૂ સેમસને સૌથી મોટી ભૂમિકા ભજવી હતી જેણે સળંગ ત્રીજી ફિફટીની મદદથી 89 રન બનાવ્યા હતા. જ્યારે ઈશાન કિશને પણ વર્લ્ડકપમાં પોતાની ત્રીજી ફિફટી ફટકારી હતી. ટૂર્નામેન્ટમાં નિષ્ફળ રહેલા અભિષેક શર્માએ ફાઈનલમાં પોતાનો રંગ બતાવતા 50 રન બનાવ્યા હતા તો અંતમાં આવેલા શિવમ દુબેએ માત્ર 8 બોલમાં 26 રન બનાવી નાખ્યા હતા. ન્યુઝીલેન્ડ તરફથી જેમ્સ નીશમે સૌથી વધુ 3 વિકેટ મેળવી હતી.
આ પછી જસપ્રિત બુમરાહ અને અક્ષર પટેલે બોલિંગમાં ન્યુઝીલેન્ડના બેટરોનો દાટ વાળી દીધો હતો. અક્ષર પટેલે ફિન એલન અને ગ્લેન ફિલિપ્સને સસ્તામાં આઉટ કર્યા હતા. જ્યારે બુમરાહે રચિન રવિન્દ્રને પેવેલિયન મોકલ્યો હતો. માત્ર 72 રનના સ્કોરે ન્યુઝીલેન્ડની 5 વિકેટ પડી ગઈ હતી જેના કારણે ન્યુઝીલેન્ડની હાર નિશ્ચિત બની ગઈ હતી. અંતમાં બુમરાહે ઝડપથી 3 વિકેટ મેળવી લેતાં ન્યુઝીલેન્ડ માત્ર 159 રનમાં ઢેર થઈ ગયું હતું.
