રાજકોટ વાઈબ્રન્ટમાં નવી એરોસ્પેસ-ડીફેન્સ પોલિસીની જાહેરાતની સંભાવના: આવનારા સમયમાં ગુજરાત બનશે ડીફેન્સ હબ
રાજકોટમાં આગામી તા. 11 અને 12 દરમિયાન યોજાનારી વાઈબ્રન્ટ સમિટમાં રાજ્ય સરકાર નવી એરોસ્પેસ અને ડીફેન્સ પોલિસીની જાહેરાત કરી શકે છે. સુત્રોના જણાવ્યા અનુસાર, રાજ્ય સરકારે 2016માં જાહેર કરેલી એરોસ્પેસ અને ડિફેન્સ પોલિસની મુદત 31 ડિસેમ્બર, 2025ના રોજ પૂર્ણ થઈ ગઈ છે.
રાજ્ય સરકારના સૂત્રોએ જણાવ્યું કે, ગુજરાત એન્જિનિયરિંગ અને કાસ્ટિંગ ઉદ્યોગોમાં મજબૂત પાયો ધરાવે છે અને તેમાંના મોટા ભાગના MSME છે. રાજ્યમાં એરોસ્પેસ અને સંરક્ષણ ઉત્પાદનના વિકાસથી આ એકમોને મોટો ફાયદો થઈ શકે છે. તેમણે વધુમાં ઉમેર્યું કે, જૂની નીતિએ રાજ્યમાં કેટલાક મોટા રોકાણો આકર્ષ્યા અને ભવિષ્યના વિકાસ માટે પાયો નાખવામાં મદદ કરી હતી.
આ ઉપરાંત સૂત્રોએ ઉમેર્યું કે, કેટલીક મોટી કંપનીઓએ વિદેશી ભાગીદારો સાથે મળીને આ ઉદ્યોગમાં સાહસ કર્યું છે, પરંતુ તેમણે OEMની વિશિષ્ટતાઓ મુજબ જ ઉત્પાદન કરવું પડે છે અને OEM દ્વારા નિર્દિષ્ટ સપ્લાયર્સનો જ ઉપયોગ કરવો પડે છે. આના કારણે સ્થાનિક ઉદ્યોગોનો વિકાસ થઈ શકતો નથી.
આ પણ વાંચો :વાવડીમાં બનશે રાજકોટનો પહેલો ‘સ્પોન્જ પાર્ક’: તાપમાનને ‘કાબૂ’માં રાખી શકાશે, ચોખ્ખી હવા પ્રાપ્ત થઈ શકશે,જાણો સ્પોન્જ પાર્કમાં બીજુ શું શું હશે?
સૂત્રો મુજબ, સંરક્ષણ માટે ઇન્ડસ્ટ્રિયલ કોરિડોર ઉદ્યોગની વસ્તીને બદલે ભૌગોલિક ક્લસ્ટરોના આધારે વિકસાવવો જોઈએ. ઉદાહરણ તરીકે, ટેક્સટાઇલ યુનિટ, કેમિકલ યુનિટ, IT સેટઅપ અને કાસ્ટિંગ ફાઉન્ડ્રી આ તમામ સંરક્ષણ ક્ષેત્રના સપ્લાયર્સ છે. આવા વૈવિધ્યસભર ઉદ્યોગો માટે એક અલગ `ડિફેન્સ પાર્ક’ બનાવવો વ્યવહારુ નથી. તેના બદલે, ઉદ્યોગો જ્યાં છે ત્યાં જ રહેવા દઈને તેમની આસપાસ એક કોરિડોર બનાવી શકાય છે.
ગુજરાતે 2016માં રાજ્યને એરોસ્પેસ અને ડિફેન્સ ક્ષેત્ર માટે મેન્યુફેક્ચરિંગ અને R&D હબ તરીકે સ્થાપિત કરવા માટે પ્રોત્સાહક યોજના સાથે વ્યાપક નીતિ રજૂ કરી હતી. આ નીતિનો ઉદ્દેશ્ય રાજ્યની ઔદ્યોગિક તાકાત, ખાસ કરીને મજબૂત એમ.એસ.એમ.ઈ. ક્ષેત્રને રાષ્ટ્રીય સંરક્ષણ લક્ષ્યો અને મેક ઇન ઇન્ડિયા અભિયાન સાથે જોડવાનો હતો.
સ્થાનિક સુત્રો અનુસાર, રાજકોટમાં અને ખાસ કરીને શાપર-વેરાવળ તથા મેટોડા જી.આઈ.ડી.સી.માં હથિયારોનાં પાર્ટસ તથા એરોસ્પેસને લગતા પાર્ટસ બની રહ્યા છે. હજુ આવનારા દિવસોમાં વધુ મોટા પ્રમાણમાં પાર્ટસ બને તે માટે તૈયારી ચાલી રહી છે. હવે રાજ્ય સરકાર જે પોલિસી જાહેર કરે અને તેમાં મેક ઇન ઈન્ડયાને પ્રોત્સાહન આપે તેવી અપેક્ષા ઉદ્યોગકારો રાખી રહ્યા છે.
