દેશના સર્વિસ સેક્ટરમાં કેવો રહ્યો દેખાવ ? શું આવ્યો રિપોર્ટ ? જુઓ

દેશના અર્થતંત્રની ગાડી યોગ્ય રીતે ચાલી રહી છે અને ખાસ કરીને સર્વિસ સેક્ટરમાં સારો દેખાવ રહ્યો છે. જુલાઈની સરખામણીએ ઓગસ્ટમાં સર્વિસ સેક્ટરની વૃદ્ધિમાં વધારો થયો છે. તેમાં માર્ચ પછીનું સૌથી ઝડપી વિસ્તરણ જોવા મળ્યું હતું. આ માહિતી માસિક સર્વેમાં આપવામાં આવી છે.

એચએસબીસી ઈન્ડિયા ભારત સર્વિસીસ પીએમઆઈ બિઝનેસ એક્ટિવિટી ઈન્ડેક્સ જુલાઈમાં 60.3થી ઓગસ્ટમાં વધીને 60.9 થઈ ગયો. માર્ચ પછીનું આ સૌથી ઝડપી વિસ્તરણ છે. આને મોટે ભાગે ઉત્પાદકતા લાભો અને સકારાત્મક માંગ વલણો દ્વારા ટેકો મળ્યો હતો.

પરચેઝિંગ મેનેજર્સ ઈન્ડેક્સની ભાષામાં, 50થી ઉપરનો સ્કોર એટલે પ્રવૃત્તિઓમાં વિસ્તરણ અને 50થી નીચેનો સ્કોર એટલે સંકોચન ગણાય છે પણ ઓગસ્ટની પ્રગતિ નોંધપાત્ર રહી છે.

એચએસબીસી ચીફ ઇકોનોમિસ્ટ પ્રાંજુલ ભંડારીએ જણાવ્યું હતું કે, “સેવા ક્ષેત્રે ઝડપી વ્યાપાર પ્રવૃત્તિને કારણે ઓગસ્ટમાં દેશ માટે એકંદર પીએમઆઇએ મજબૂત વૃદ્ધિ દર્શાવી હતી. માર્ચ પછીનું આ સૌથી ઝડપી વિસ્તરણ હતું. આ વૃદ્ધિ મુખ્યત્વે નવા કોન્ટ્રાક્ટ, ખાસ કરીને સ્થાનિક કોન્ટ્રેક્ટ્સમાં વધારાને કારણે થઈ હતી.

કિંમતોની વાત કરીએ તો, કાચા માલની કિંમતમાં છ મહિનામાં સૌથી ઓછો વધારો થયો છે, સમાન વલણ ઉત્પાદન અને સેવા બંને ક્ષેત્રોમાં જોવા મળ્યું હતું. આના કારણે ઓગસ્ટમાં ‘આઉટપુટ’ મૂલ્ય ફુગાવો ઘટ્યો હતો.